Ресулларың ишлери
5 Хананя ве Сапфира атлы бир әр-аял эмләгиниң бир бөлегини сатдылар. 2 Хананя пулуң уҗундан алып, оны гизлейәр-де (мундан аялының хем хабары барды), галаныны ресуллара элтип берйәр. 3 Шонда Петрус оңа шейле дийди: «Хананя, сен нәме үчин Шейтана ичиңе гирмәге ёл берип, мукаддес руха гаршы ялан сөзледиң ве сатылан меллегиң пулуның бир бөлегини гизледиң? 4 Эйсем, сен меллеги сатманкаң-да, ол сениңки дәлмиди? Оны сатаныңдан соң хем пулы өз ислейшиңе гөрә совуп билмезмидиң? Сен нәдип йүрегиңде шейле эрбет затлар хакда пикир эдип билдиң? Сен адамлара дәл-де, Худая ялан сөзледиң». 5 Хананя бу сөзлери эшиден бадына, ере йыкылып, җан берди. Муны эшиденлериң әхлиси җуда горкдулар. 6 Шонда бирнәче йигит еринден турды-да, оны мата долап, җайламага алып гитдилер.
7 Үч сагат төвереги вагт геченсоң, онуң аялы гелди. Онуң хич затдан хабары ёкды. 8 Петрус оңа: «Айтсана, сиз меллегиңизи шунча пула сатдыңызмы?» дийди. Ол хем: «Хава» дийип җогап берди. 9 Шонда Петрус оңа: «Сиз нәме үчин Ехованың* рухуны алдаҗак болуп дил дүвүшдиңиз? Ынха адамыңы җайлан адамлар гапа голайлап гелйәрлер, олар сени-де алып гидерлер» дийди. 10 Ол шол бада ере йыкылып, җан берди. Йигитлер ичерик гиренлеринде, Сапфираның өлүп ятаныны гөрдүлер ве оны алып гитдилер-де, адамсының янында җайладылар. 11 Шонда Иерусалимдәки әхли йыгнаклар ве болан ваканы эшиден адамлар җуда горкдулар.
12 Хава, ресуллар адамларың арасында көп аламатлар ве гудратлар гөркезйәрдилер. Оларың хеммеси «Сүлейманың сүтүнлери» дийилйән ерде йыгнанышярдылар. 13 Элбетде, оларың хатарына гошулмага хеммелериң гайраты чатмаярды; муңа гарамаздан, адамлар шәгиртлер хакда говы пикирдедилер. 14 Халыпамызың адына иман эдйән эркекдир аялларың саны гитдигиче артярды. 15 Адамлар сыркавлары дүшекчелерде ве дүшеклерде гетирип, улы ёлларда гойярдылар. Олар Петрус геченде, иң болманда, онуң көлегеси кәбирлериниң үстүне дүшүп, сыркавлары сагалдар дийип умыт эдйәрдилер. 16 Иерусалимиң даш-төверегинде ерлешйән шәхерлерден хем энчеме адамлар гелйәрди. Олар сыркавлары ве җынлардан эҗир чекйән адамлары гетирйәрдилер. Оларың әхлиси-де сагалярды.
17 Эмма баш руханы ве онуң янындакылар, ягны саддукейлериң дини топарының* агзалары гахардан хем-де гөрипликден яңа өзүни саклап билмедилер. 18 Олар ресуллары туссаг эдип, шәхериң түрмесине басдылар. 19 Эмма гиҗе Ехованың* перишдеси гелип, түрмәниң дервезелерини ачды ве олары бошадып, шейле дийди: 20 «Гидиң-де, ыбадатхана барып, адамлара эбеди яшайыш хакда әхли затлары гүррүң бермегиңизи довам эдиң». 21 Олар перишдәниң сөзлерини эшиденде, сәхер билен ыбадатхана бардылар-да, Худайың сөзүни өвредип башладылар.
Баш руханы ве онуң янындакылар Меҗлисиң* агзаларыны, ысрайыл халкының яшулуларыны йыгнадылар. Олар ресуллары гетиртмек үчин түрмә адам ибердилер. 22 Эмма ыбадатхананың гаравуллары түрмә геленлеринде, олары тапман, ызларына доландылар-да, гөренлерини хабар берип, 23 шейле дийдилер: «Биз түрмә баранымызда, онуң гапыларының берк япыкдыгыны, агзында-да гаравулларың дурандыгыны гөрдүк. Йөне гапыны ачанымызда, онуң ичинде хич ким ёк экен». 24 Ыбадатхананың гөзегчиси ве улы руханылар муны эшиденлеринде, инди нәме боларка дийшип, чыкгынсыз ягдая дүшдүлер. 25 Шол бада бири гелип: «Ине, сизиң түрмә басан адамларыңыз ыбадатханада өвредип дурлар» дийди. 26 Шонда ыбадатхананың гөзегчиси эсгерлери билен гидип, олары алып гелди. Йөне олар гүйч уланмадылар, чүнки адамлар дашлар өйдүп горкдулар.
27 Шейлеликде, олар ресуллары гетирип, Меҗлисиң* өңүнде дуруздылар. Баш руханы олары сорага чекип, 28 шейле дийди: «Биз сизе шол адамың ады билен өвретмезлиги берк табшырыпдык. Сиз болса өз таглыматыңыз билен бүтин Иерусалими долдурдыңыз, онуң өлүмине-де* бизи гүнәкәрлеҗек болярсыңыз». 29 Шонда Петрус ве бейлеки ресуллар шейле җогап бердилер: «Биз адама дәл-де, Хөкүмдарымыз Худая гулак асмалыдырыс. 30 Ата-бабаларымызың Худайы сизиң пүрсе чүйләп* өлдүрен Исаңызы дирелтди. 31 Худай оны Баш Ёлбашчы хөкмүнде бейгелдип, саг тарапында отуртды ве адамлары халас эдип, яшайыш бермек үчин белледи. Худай муны ысрайыл халкының тоба эдип, гүнәлериниң багышланмагы үчин этди. 32 Муңа биз-де, мукаддес рух-да шаятдыр. Худай мукаддес рухуны Оңа хөкүмдар хөкмүнде гулак асянлара берйәндир».
33 Олар бу сөзлери эшиденде, гахар-газаба мүнүп, ресуллары өлдүрмекчи болдулар. 34 Шонда Меҗлисде* отуран, халк арасында хорматланян ве Кануның мугаллымы болан Гамалиел атлы бир фарисей еринден турды-да, ресуллары аз вагтлык дашарык чыкармагы буюрды. 35 Соңра ол отуранлара шейле дийди: «Эй ысрайыллылар, бу адамлара нәме этмекчи болсаңыз-да, сересап болуң. 36 Себәби мундан бирнәче вагт өң, Тевдас атлы бири пейда болды. Ол өзүни хондан бәрси сайып, 400 төвереги адамы ызына эертди. Эмма оны өлдүренлеринде, онуң ызына эеренлериң әхлиси даргап, дөреден топары ёк болды. 37 Соңра илат язувы гечирилен дөври Яхуда атлы җелилели бир адам пейда болды. Онуң ызына дүшен адамлар хем барды. Ол хем өленде, ызына эеренлериң әхлиси даргады. 38 Шонуң үчин сизе диййәрин, бу адамларың ишине гошулмаң, олары өз гүнүне гоюң. Эгер оларың өвредйән затлары я-да иши ынсанлардан болса, өз-өзүнден даргар. 39 Эгер Худайдан болса, сиз олары ёк эдип билмерсиңиз, гайтам, Худая гаршы чыкян адамлар боларсыңыз». 40 Шейлеликде, олар онуң маслахатыны кабул эдип, ресуллары чагырдылар-да, олары гамчыладылар*. Соңра Исаның ады хакда гүррүң бермеклерини бес этмеги табшырып, олары гойбердилер.
41 Олар Исаның ады зерарлы масгараланмага мынасып боландыклары үчин Меҗлисден* шатланып чыкдылар. 42 Олар хер гүн ыбадатхана барып ве өйден-өе гидип, адамлара өвретмеклерини хем-де Месих Иса хакда хош хабары вагыз этмеклерини бес этмейәрдилер.