1 Петрус
2 Шейлеликде, хер хили эрбетликден, яланчылыкдан, икийүзлүликден, гөрипликден ве гыбат этмекден гача дуруң. 2 Яңы доглан бәбеклер ялы Худайың сөзи болан пәк сүйди күйсәң, себәби сиз ол аркалы халас болуп билерсиңиз. 3 Чүнки сиз Халыпамызың ягшылыгыны дадып гөренсиңиз.
4 Сиз Халыпамызың, ягны дири дашың хузурына гелдиңиз. Адамлар бу дашы инкәр этсе-де, Худай оны сайлады ве гыммат сайды. 5 Сизиң өзүңиз хем рухы өйи эмеле гетирйән дири дашлар болуп, Иса Месих аркалы Худая ярамлы рухы гурбанлары хөдүрлемек үчин мукаддес руханылар болдуңыз. 6 Шонуң үчин Язгыларда: «Ине, мен Сионда сайланан дашы, гымматбаха бурч дашыны гойярын. Оңа иман эден адам хич хачан лапыкеч болмаз» дийилйәр.
7 Шол себәпли ол сизиң үчин гымматлыдыр, чүнки сиз иман эдйәрсиңиз. Эмма иман этмейәнлер үчин «гурлушыкчыларың герек дәл дийип зыңан дашы иң ваҗып даш* болды». 8 Шейле-де ол «бүдремәге ве йыкылмага себәп болян даш болды». Олар Худайың сөзүне гулак асмаяндыклары үчин бүдрейәрлер. Оларың соңы хем шейле болар. 9 Эмма сиз гараңкылыкдан ягтылыга Чагыраның «аҗайып хәсиетлерини* әхли ерлерде ыглан этмәге сайланан миллет, патышалар болуп гуллук эдйән руханылар ве айратын гуллугы берҗай этмек үчин мукаддес халк болдуңыз». 10 Сиз өң халк дәлдиңиз, йөне инди Худайың халкы болдуңыз. Сизе өң рехим эдилмейәрди, инди болса рехим эдилйәр.
11 Эзиз доганларым, сизи гелмишеклер ве вагтлайын яшайҗылар хөкмүнде үндейәрин: өзүңизе* гаршы сөвешйән тен хөвеслеринден гача дуруң. 12 Сизи эрбет иш эдйәнлер хөкмүнде гүнәкәрлейән адамларың арасында өзүңизи говы эдим-гылымлы алып барың. Шонда олар сизиң ягшы ишлериңизи гөрүп, Худайың барлаг гүни оны шөхратландырып билерлер.
13 Халыпамызың хатырасына әхли ынсан хәкимиетлерине: патыша 14 я-да онуң эрбетлик эдйәнлери җезаландырмак ве ягшылык эдйәнлери өвмек үчин иберйән хәкимлерине табын болуң. 15 Себәби Худай сиз барада нәдогры затлары айдян акылсыз адамлары дымдыртмак үчин сизиң ягшы ишлери этмегиңизи ислейәр. 16 Сиз — азат адамлар, йөне азатлыгыңызы эрбет ишлериң үстүни өртмек үчин дәл-де, Худайың гуллары хөкмүнде уланың. 17 Әхли адамлара хормат гоюң, бүтин дүнйәдәки доганлары* сөйүң, Худайдан горкуң, патышаны сылаң.
18 Хызматкәрлер хоҗайынларына улы хормат билен табын болсунлар. Диңе ягшы ве пайхаслы хоҗайынлара дәл, эйсем, ынҗык хоҗайынлара-да табын болсунлар. 19 Себәби Худайың өңүнде пәк ынсабыны сакламак үчин адалатсызлыкдан эҗир чекип, кынчылыклара* чыдаян адам Оңа яраяндыр. 20 Догрудан-да, этмишлериңиз үчин сизи уранларында чыдаян болсаңыз нәме сылагыңыз бар? Эмма ягшы ишлери эдйәндигиңиз үчин кынчылыклара дөз гелсеңиз, бу Худая яраяндыр.
21 Аслында, сиз шонуң үчин хем чагырылыпдыңыз. Себәби Месих хем сизиң үчин эҗир чекди ве ызына долы эермегиңиз үчин гөрелде галдырды. 22 Ол хич хили гүнә этмеди, екеҗе ялан сөз хем айтмады. 23 Оңа сөгенлеринде, сөгмеди; эҗир чекенде, хайбат атмады, гайтам, өзүни адалатлы хөкүм чыкарян Худая табшырды. 24 Ол бизиң гүнәден азат эдилмегимиз* ве догры яшамагымыз үчин җебир пүрсүне* чүйленип, гүнәлеримизи өз беденинде гөтерди. «Сиз онуң яралары аркалы сагалдыңыз». 25 Себәби сиз азашан гоюнлар ялыдыңыз, инди болса җаныңызы гораян чопана ве гөзегчә доландыңыз.