Галатялылар

1 Адамлар я-да бир адам тарапындан дәл-де, Иса Месих ве оны өлүмден дирелден Ата Худайымыз тарапындан ресул эдилип белленен мен Павлус, 2 янымдакы әхли доганлар билен Галатядакы йыгнаклара хат язярын.

3 Ата Худайымыздан ве Халыпамыз Иса Месихден сизе мерхемет хем парахатлык болсун. 4 Ата Худайымызың ислегине гөрә Месих бизи шу залым дүнйәден* халас этҗек болуп, гүнәлеримиз үчин өзүни гурбан этди. 5 Худая бакы ве эбеди шөхрат болсун. Омын.

6 Месихиң мерхемети аркалы чагыран Худайдан сизиң шейле чалт йүз өврүп, башга хош хабары кабул эдендигиңизе гаты гең галярын. 7 Элбетде, башга хич хили хош хабар ёкдур, йөне кәбир адамлар сизе пәсгел берип, Месих барадакы хош хабары ёймак ислейәрлер. 8 Эмма биримиз я-да гөкден бир перишде гелип, бизиң вагыз эден хош хабарымыздан башга хош хабары ыглан этсе, гой, оңа нәлет болсун. 9 Биз өңем айдыпдык, мен ене-де айдярын: эгер кимдир бири сизиң кабул эден хош хабарыңыздан башга зады вагыз эдйән болса, гой, оңа нәлет болсун.

10 Эйсем, мен адамларың гөвнүнден турҗак болярынмы я-да Худайың? Эгер адамларың гөвнүнден турмак ислейән болсам, онда Месихиң гулы болмаздым. 11 Доганлар, сизе вагыз эден хош хабарымың адамлардан дәлдигини билмегиңизи ислейәрин. 12 Мен оны адамдан алмадым, адамдан хем өвренмедим. Маңа оны Иса Месих аян болуп берди.

13 Элбетде, сиз мениң ехуды дининдекәм, өзүми нәхили алып барандыгым барада эшиденсиңиз. Мен Худайың йыгнагыны гүйчли ызарлаярдым ве оны ёк этмек ислейәрдим. 14 Мен ехуды дининде көп дең-душларымдан ве илдешлеримден хас-да өкдедим, ата-бабаларымың дәп-дессурыны өрән ыхласлы берҗай эдйәрдим. 15 Эмма мени дүнйә индирен ве өз мерхемети билен чагыран Худай шуны макул билди, 16 ягны Оглы хакдакы хош хабары башга халклара вагыз этмегим үчин, оны маңа аян этди. Ол мени сайланда, мен шол бада адамлардан* маслахат сорамага гитмедим. 17 Менден өң ресул боланларың янына Иерусалиме-де гитмедим. Йөне Арабыстана гидип, соңра Дамаска доландым.

18 Мен 3 йылдан соң, Кифаны* гөрмек үчин Иерусалиме гитдим ве янында 15 гүн болдум. 19 Эмма Халыпамызың доганы Якупдан башга ресулларың хич бирини гөрмедим. 20 Шу язян затларымың ялан дәлдигини Худайың өңүнде айдярын.

21 Соңра мен Сирияның ве Киликияның төверегиндәки этраплара бардым. 22 Йөне Месихиң Яхудадакы йыгнаклары мени танамаярдылар. 23 Олар мен хакда: «Өң бизи ызарлап, ёк этмекчи болан адамың инди өзи хош хабары вагыз эдйәр» дийип эшидипдирлер. 24 Шейдип, мен аркалы Худайы шөхратландырып башладылар.