Матта
3 Соңра сува чүмдүрйән* Яхя гелип, Яхуданың чөлүнде вагыз эдип башлады. 2 Ол: «Тоба эдиң, себәби гөгүң Патышалыгы* голайлашды» диййәрди. 3 Шейлеликде, Худайың Ишая пыгамбер аркалы: «Чөлде бириниң сеси эшидилйәр: „Ехова* үчин ёл тайярлаң! Онуң ёдаларыны догрулаң“» диен сөзлери берҗай болды. 4 Яхяның дүе йүңүнден гейими, билинде дериден гушагы барды. Ол чекиртге ве ябаны ары балыны иййәрди. 5 Онуң янына Иерусалимиң, бүтин Яхуданың ве Иордан дерясының даш-төверегиндәки әхли ерлерден адамлар гелйәрди. 6 Олар гүнәлерини ачык боюн алярдылар, Яхя хем олары Иордан дерясында сува чүмдүрйәрди.
7 Ол энчеме фарисейлериң* ве саддукейлериң* сува чүмдүрилмәге гелйәндиклерини гөрүп, олара шейле дийди: «Эй алахөвренлер несли! Сизе етип гелйән хөкүм гүнүнден гачып гутуларсыңыз дийип ким айтды? 8 Тоба эдйәндигиңизи гөркезйән ишлери эдиң. 9 Сиз өзүңизе: „Биз Ыбрайымың несли“ диймегиңизи бес эдиң. Себәби Худай шу дашлардан хем Ыбрайыма несил өндүрип билер. 10 Палта агачларың дүйбүнде эййәм тайын дурандыр. Говы миве бермейән хер бир агач чапылып, ода ташланар. 11 Мен сизи тоба эдйәндигиңиз үчин сува чүмдүрйәрин, эмма менден хас ыгтыярлы бири гелйәр. Мен онуң аякгабыны чыкармага-да мынасып дәлдирин. Ол сизи мукаддес рух ве от билен чүмдүрер*. 12 Онуң элинде галла совурян күреги* бар. Ол галланы долы арассалап, бугдайы аммара үйшүрер, саманы болса сөнмез отда якар».
13 Соңра Иса сува чүмдүрилмек үчин Җелиледен Яхяның янына Иордана гелди. 14 Эмма Яхя: «Мен сени дәл-де, сен мени сува чүмдүрмели дәлми нәме?» дийип, оны саклаҗак болды. 15 Иса оңа: «Мени саклаҗак болма, себәби биз шейдип Худайың ислейән әхли затларыны берҗай этмелидирис» дийип җогап берди. Шондан соң Яхя оны сакламады. 16 Иса сува чүмдүрилип, деррев ондан чыкды. Ине, гөк ачылды ве Яхя Худайың рухуның кепдери кимин Исаның үстүне инип гелйәндигини гөрди. 17 Шонда гөкден: «Бу мениң сөйгүли Оглум, мен ондан разыдырын» диен сес эшидилди.