1 Петрус
3 Аяллар, сиз хем янёлдашыңыза табын болуң. Эгер олар Худайың Сөзүни диңлемейән болсалар, онда айдян сөзлериңизе дәл-де, эдим-гылымыңыза середип иман эдерлер. 2 Себәби олар сизиң арасса, пәк яшайшыңызы ве чуңңур хорматыңызы гөрерлер. 3 Гой, сизиң даш кешбиңизи диңе бир сач өрме, алтын шай-сеплер я-да гымматбаха эшиклер дәл-де, 4 эйсем, йүрегиңиздәки солмаян оваданлык, ягны юваш ве юмшак хәсиет* безесин, чүнки Худай бу затлары хас гыммат сайяндыр. 5 Гечмишде Худая умыт баглап яшан мукаддес аяллар хем янёлдашларына табын болуп, өзлерини безейәрдилер. 6 Сара хем Ыбрайыма табын болуп, оңа хоҗайыным диййәрди. Эгер сиз ягшы ишлери эдйән болсаңыз ве горка ёл бермесеңиз, Сараның чагалары хасапланарсыңыз.
7 Әрлер, сиз хем өзүңизи аялыңыз билен пайхаслы алып барың. Олара эҗиз гап хөкмүнде гарап, хормат гоюң, ёгсам Худай догаларыңызы диңлемез. Себәби аяллар хем сизиң билен дең хатарда Худайың мерхемети аркалы яшайшы мирас аларлар.
8 Галыберсе-де, әхлиңиз пикирдеш, дуйгудаш, рехимдар, песгөвүнли болуң ве бири-бириңизе доганлык сөйгиңиз болсун. 9 Яманлык эдене яманлык этмәң, бири-бириңизе гөвне дегиҗи сөзлери айтмаң, гайтам, Худайың сайланлары хөкмүнде ягшы сөзлери айдың, шонда сиз Онуң патасыны аларсыңыз*.
10 «Ким яшайшы говы гөрүп, ягшы гүнлерде яшамак ислесе, дилини эрбетликден ве ялан сөзлерден сакласын. 11 Гой, ол яманлыкдан совлуп, ягшы ишлери этсин; парахатлыгы агтарып, оңа ымтылсын. 12 Себәби Ехованың* назары догры адамлара дикилендир, гулаклары оларың ялбармаларыны эшидйәндир. Эмма Ехова* эрбет иш эдйәнлере гаршыдыр».
13 Догрудан-да, ягшы ишлере ыхласлы болсаңыз, ким сизе яманлык эдер? 14 Эмма догрулык үчин эҗир чекйән болсаңыз, онда багтлысыңыз. Йөне адамларың горкян затларындан горкмаң*, алада-да этмәң. 15 Йүрегиңизде Месихи Халыпамыз хөкмүнде мукаддес хасаплаң. Умыдыңыз хакда сораг берен хер кесе җогап бермәге хемише тайын болуң, йөне муны юмшаклык ве чуңңур хормат билен эдиң.
16 Ынсабыңызы пәк саклаң, Месихиң шәгиртлери хөкмүнде өзүңизи говы алып барың, шонда сизе гаршы геплейән адамлар муны гөрүп утанарлар. 17 Себәби яман иш эдип азап чекениңизден, ягшылык эдип эҗир чекениңиз говудыр (эгер Худай муңа ёл берйән болса). 18 Хатда догры адам болан Месих хем догры дәллериң гүнәлерини айырмак үчин бир гезекде хемишелик өлди. Ол муны сизи Худай билен ярашдырмак үчин этди. Ол ынсан болуп өлди, йөне рух болуп дирелдилди. 19 Соңра гидип, туссаглыкдакы рухлара вагыз этди. 20 Нухуң гүнлеринде гәминиң ясалмагына Худай сабырлы* гарашярка, шол рухлар гулак асмандылар, шонда бары-ёгы секиз адам* сувдан халас болупды.
21 Бу вака сува чүмдүрилмек билен деңешдирилйәр. Хәзир болса сиз сува чүмдүрилмек билен, Иса Месихиң дирелиши аркалы халас болярсыңыз. Бу бедениңи кирден арассаламагы дәл-де, Худайдан пәк ынсабы дилемеги аңладяндыр. 22 Месих гөге гидип, Худайың саг тарапында отурды ве перишделер, ыгтыярлылар, гүйчлер оңа табын эдилди.