Еврейлер
2 Ине, шонуң үчин хем биз имандан азашмаз ялы, эшиден затларымыза өңкүден хас көп үнсли болмалы. 2 Эгер перишделер аркалы айдылан сөзлериң* хакыкатдыгы тассыкланып, адам хер бир этмиши ве гулак асмазлыгы үчин адалата лайык җезасыны алан болса, 3 онда биз Худайың халас этмек үчин эден ишлерине бипервай гарасак, җезадан гутулып билерисми? Себәби гутулыш хакда илкинҗи болуп Халыпамыз вагыз этди, онуң сөзлерини эшиден адамлар хем муны тассыклады. 4 Худайың өзи хем аламатлардыр гөрнүшлери гөркезип, хер дүрли гудратлы ишлери эдип ве ислегине гөрә гуллукчыларына мукаддес рух сылагыны берип, бу хакда шаятлык этди.
5 Себәби ол бизиң гүррүң эдйән гелеҗекки дүнйәмизи перишделере табын этмеди. 6 Эмма шаятларың бири шейле дийипди: «Сен адамы ятлар ялы я-да онуң аладасыны эдер ялы, ынсан оглы нәме? 7 Сен оңа перишделерден аз-кем пес дереҗе бердиң; оны шөхрат ве хормат билен сылагладың. Оңа өз эллериң билен эден ишлериң үстүнден ыгтыяр бердиң. 8 Әхли зады онуң аякларының астына табын этдиң». Худай бар зады оңа табын эденде, табын эдилмедик зат галмады. Эмма биз әхли задың оңа табын боландыгыны хениз гөрмейәрис. 9 Йөне биз перишделерден аз-кем пес дереҗе берлип, өлүме сезевар боландыгы үчин шөхрат ве хормат билен сылагланан Исаны гөрйәрис. Ол Худайың мерхемети аркалы хеммелер үчин өлүми дадандыр.
10 Хемме зат Худайың шөхраты үчин ве ол аркалы бардыр. Ол көп огулларыны шөхрата етирмек үчин Баш Ёлбашчының эҗир чекмегине ёл берди. Шейдип, Ёлбашчы олары халас этмәге укыплы болды. 11 Исаның-да, онуң мукаддес эденлериниң-де атасы бирдир. Шонуң үчин хем Иса олара «доганларым» диймәге чекинмейәр. 12 Ол: «Мен сениң адыңы доганларыма ыглан эдерин; йыгнакда сени айдым билен шөхратландырарын» диййәр. 13 Башга бир ерде: «Мен саңа бил багларын» диййәр. Шейле-де: «Ине, мен ве Ехованың* маңа берен чагалары» диййәр.
14 Шейлеликде, «чагалар» ынсан беденинде* боландыгы себәпли, ол хем ынсан болды. Ол муны өз өлүми аркалы өлүмиң себәпкәри болан Иблиси ёк этмек үчин этди. 15 Шейле-де бүтин өмрүне өлүм горкусының есирлигинде яшаянларың әхлисини азатлыга чыкармак үчин этди. 16 Аслында, ол перишделере дәл-де, Ыбрайымың неслине* көмек этмек үчин гелди. 17 Ол әхли затда «доганлары» ялы болды. Нетиҗеде, Худайың ишлерини ерине етирмекде рехимдар хем-де вепалы баш руханы болуп, адамлары Худай билен ярашдырар ялы, оларың гүнәлери үчин гурбан хөдүрледи. 18 Ол сынага учрап, эҗир чекендиги себәпли, сынага учраянлара көмек этмеги башаряндыр.