Филипилилер
3 Шейлеликде, доганларым, Худая хемише шатлык билен гуллук эдиң. Сизе өң язан затларымы ене-де язмагы кын гөрмейәрин, себәби олар сизи горар.
2 Ахлаксыз*, башгалара зыян етирйән ве сүннетленмеги өңе сүрйән* адамлардан сересап болуң. 3 Аслында, бизиң сүннетимиз хакыкыдыр, себәби биз Худайың рухы билен мукаддес гуллугы берҗай эдйәрис, Месих Исаның эден ишине буйсанярыс ве ынсан беденине бил багламаярыс. 4 Беден бабатда буйсанмалы болса, мен буйсанмалы.
Егер бири беденине буйсанмага хакы бардыр өйтсе, онда мениң хакым хас көпдүр. 5 Себәби мен секизинҗи гүн сүннетлендим, өзүмем ысрайыл халкындан, бенямин тайпасындан, миллетим еврей, ата-энем хем еврей; кануна гөрә фарисейдирин; 6 месихчилер йыгнагыны ызарламакда ыхласлыдым; кануның табшырыкларыны биркемсиз берҗай эдйәрдим. 7 Эмма газанан затларымдан Месих үчин хөвес билен йүз өвүрдим. 8 Хава, мен Халыпамыз Месих Иса бабатдакы гымматлы билими алмак үчин әхли задымдан гечдим. Месих билен достлашмак үчин хемме задымдан йүз өвүрдим ве оларың барыны зир-зибил хасаплаярын. 9 Месих билен бирликде болмак үчин Кануна эерип газанан догручыллыгым билен дәл-де, Месихе иман эдип, догручыл болмак ислейәрин. Себәби Худай иман эдйән адамлары догручыл хасаплаяр. 10 Мен Месихи ве оны дирелдениң гүйҗүни танамак ислейәрин. Мен Месих ялы эҗир чекип, Месих ялы өлмек ислейәрин. 11 Муны илкинҗи дирелиши алмага мүмкинчилигим болсун дийип эдйәрин.
12 Йөне мен эййәм сылагымы алдым я-да кәмиллиге етдим дийҗек болмаярын. Гайтам, Месих Иса мени нәме үчин сайлан болса, шоңа етҗек болуп җан эдйәрин. 13 Доганлар, мен сылагымы эййәм аландырын өйтмейәрин; йөне бир зады анык билйәрин: ызда галан затлары унудып, өңдәки затлара ымтылярын. 14 Мен Худайың Месих Иса аркалы берҗек сылагыны, ягны гөкдәки яшайшы алмак максады билен ылгаярын. 15 Шонуң үчин, гой, рухы тайдан етишенлеримиз шейле пикирде ве гарайышда болсунлар. Эгер бириңиз башгача пикир эдйән болса, Худай оңа догры гарайышда болмага ёл ачар. 16 Эмма Худая гуллук этмекде нәхили үстүнлик газанан болсак, гелиң, шейле этмегимизи довам эделиң.
17 Доганлар, хеммәңиз менден гөрелде алың ве назарыңызы бизиң гөрелдәмизе гөрә яшаянлара дикиң. 18 Себәби көплери өзлерини Месихиң җебир пүрсүниң душманы ялы алып барярлар. Мен олар хакда өң хем көп айдыпдым, хәзирем гөзяшлар дөкүп айдярын. 19 Шейле адамларың соңы өлүмдир, оларың худайы гарынларыдыр*, утанчсыз затларына буйсанярлар, пикирлери дүнъеви затлардадыр. 20 Эмма бизиң раятлыгымыз гөклердедир ве биз халасгәримизе, ягны гөкдәки Халыпамыз Иса Месихе сабырсызлык билен гарашярыс. 21 Ол гүйҗи аркалы әхли зады өзүне табын эдип, эҗиз беденимизи өз шөхратлы бедени ялы эдер.