Эфеслилер
1 Худайың ислеги билен Месих Исаның ресулы болан мен Павлус, Эфесдәки мукаддеслере ве Месих Исаның вепалы шәгиртлерине хат язярын.
2 Ата Худайымыздан ве Халыпамыз Иса Месихден сизе мерхемет хем парахатлык болсун.
3 Халыпамыз Иса Месихиң Атасына ве Худайына шөхрат болсун. Себәби ол бизи гөкде Месих аркалы рухы берекетлере эе этди. 4 Ол Месих билен бирликде болмагымыз үчин бизи дүнйәниң башлангыҗындан сайлады. Шонуң үчин биз Худайың өңүнде сөйгүде гезип, мукаддес ве айыпсыз болмалы. 5 Себәби ол өз ниетине ве ислегине гөрә бизи өңүнден сайлап, Иса Месих аркалы өзүне огуллыга алды. 6 Шейлеликде, сөйгүли Оглы аркалы бизе бейик мерхеметини гөркезен Худай шөхратланар. 7 Худай Оглы аркалы төлег* төләп, бизи азат этди. Хава, Оглуның ганы аркалы гүнәлеримиз багышланды. Худайың мерхемети, гөр, нәхили бейик!
8 Ол бизе бай мерхемети билен бирликде акылдарлык ве дүшүнҗе берип, 9 ислегиниң мукаддес сырыны аян этди. Ол муны өңүнден кесгитләп, ислегине гөрә этди. 10 Белленен вагт доланда, Худай ниетини* амала ашырмак үчин гөкдәки ве ердәки затларың әхлисини Месихде бирлешдирер. Хава, ол әхли зады Месихде бирлешдирер. 11 Биз онуң билен бирликдедирис ве Худай бизи мирасдүшерлер хөкмүнде белледи. Әхли зады өз ислеги боюнча амала ашырян Худай бизи өз ниетине лайыклыкда өңүнден сайлады. 12 Шейлеликде, Месихе илкинҗи болуп умыт багланлар, ягны биз Худайы шөхратландырып, оңа алкыш айтмалыдырыс. 13 Йөне сиз хем хакыкат сөзүни, ягны сизе гутулыш берйән хош хабары эшидип, Месихе умыт багладыңыз. Шейле-де иман эдениңизден соң, Худайың Месих аркалы вада берен мукаддес рухы билен мөхүрлендиңиз. 14 Мукаддес рух Худайың вада берен задыны алҗакдыгымыза кепил гечйәндир. Шейдип, Худай өз халкыны азат этмек үчин төлег төледи. Бу оны улы шөхрата эе эдер.
15 Ине, шонуң үчин хем мен сизиң Халыпамыз Иса иман эдйәндигиңизи ве әхли мукаддеслере сөйгиңизи гөркезйәндигиңизи эшидип, 16 сизиң үчин Худая миннетдарлык айтмагымы бес этмейәрин. Сизи хемише догаларымда агзап, 17 шөхрата эе болан Атадан, ягны Халыпамыз Иса Месихиң Худайындан сизе акылдарлык рухуны бермеги ве аян эден затларына дүшүнип, ол хакда догры билим алмагыңызы дилейәрин. 18 Ол сизиң нәхили яшайша чагырыландыгыңызы ве мукаддеслер үчин нәхили шөхратлы байлыгың тайярланандыгыны билмегиңиз үчин йүреклериңизи* ачды 19 хем-де бизе, ягны иман эдйәнлере өзүниң деңи-тайы болмадык бейик гүйҗүни берди. Онуң бейик гүйҗи 20 Месихи өлүмден дирелдип, гөкде саг тарапында отурданда аян болды. 21 Худай оны хер бир хөкүметден, ыгтыярлыкдан, гүйчден, хөкүмдарлыкдан ве башга-да атлардан бейгелдип, диңе бир хәзирки дүнйәде* дәл, эйсем, гелҗекки дөвүрде-де хас бейгелдер. 22 Шейле-де Худай әхли зады онуң аякларының астына табын этди ве хемме йыгнаклара баш эдип белледи. 23 Месихиң бедени болан йыгнаклар онуң хәсиетлери билен долудыр. Хава, Месих әхли зады хемме тараплайын долдуряндыр.