Еврейлер
9 Көне әхте гөрә мукаддес гуллук ве ер йүзүндәки мукаддес чадыр бабатда дүзгүнлер барды. 2 Чадыр ики отагдан ыбаратды. Биринҗи отагда чырадан, стол ве онуң үстүнде хөдүр эдилйән чөреклер дурярды; оңа «Мукаддес отаг» дийилйәрди. 3 Икинҗи тутының аңырсында «Иң мукаддес отаг» дийилйән отаг барды. 4 Ол ерде алтындан ясалан бухур якылян гап ве бүтинлей гызыла гапланан әхт сандыгы барды. Сандыгың ичинде ичи манналы алтындан ясалан җам, Харуның гүллән хасасы ве йүзүне Худайың кануны язылгы әхт дашлары барды. 5 Сандыгың үстүнде шөхратлы керуплар отырды, оларың көлегеси гапагың үстүне дүшйәрди. Сандыгың гапагы Худай билен ярашдырмагы аңладярды. Эмма инди булар хакда җикме-җик гүррүң этмегиң гереги ёк.
6 Бу затлар шейдип гурналандан соң, руханылар мукаддес гуллугы берҗай этмек үчин хер гүн биринҗи отага гирйәрдилер. 7 Эмма икинҗи отага баш руханы йылда бир гезек еке өзи гирйәрди. Шонда ол өзи ве халкың билмән эден гүнәлери үчин ган алып гирмелиди. 8 Биринҗи отаг энтек айрылманды, шонуң үчин мукаддес рух мукаддес отага барян ёлуң хениз ачылмандыгыны аян эдйәр. 9 Чадыр шу гүнлер болуп гечйән затларың нусгасыды. Шоңа гөрә-де совгатлар ве гурбанлар хәзире ченли хөдүрленйәр. Эмма олар мукаддес гуллугы берҗай эдйән адамың ынсабыны арассалап, кәмиллиге етирмеги башармады. 10 Йөне совгатдыр гурбанлар диңе иймит, ичги хөдүрлемек ве адамларың хем-де уланылян затларың арассаланмагы* билен чәкленйәрди. Канундакы бу дүзгүнлер бедене дегишлиди ве олар әхли зады дүзетмек үчин белленен вагт гелйәнчә герекди.
11 Эмма Месих эййәм берҗай болан ягшы затларың баш руханысы хөкмүнде гелди. Ол ынсан эли билен ясалмадык, ягны ер йүзүнде болмадык бейик ве хас говы чадыра гирди. 12 Ол Иң мукаддес отага гечилериң ве яш өкүзлериң ганы билен дәл-де, өз ганы билен гирип, бизи бир гезекде хемишелик халас этди*. 13 Эгер гечилериң, өкүзлериң ве яш сыгрың күли эрбет иш эден адамлара сепилип, олары Худайың өңүнде арасса эдйән болса, 14 онда эбеди херекет эдйән мукаддес рухуң тәсири билен өзүни Худая айыпсыз гурбан хөкмүнде хөдүрлән Месихиң ганы хас бейик дәлми нәме? Онуң ганы бизиң дири Худая гуллук этмегимиз үчин ынсабымызы өли ишлерден арассалаяндыр.
15 Ине, шонуң үчин хем Месих тәзе әхти гиризмек үчин төвеллачы болды. Ол көне әхтиң голы астындакы адамлары эден гүнәлеринден өз төлеги* аркалы азат этмек үчин өлди. Шейлеликде, чагырыланлар вада эдилен эбеди мирасы алып билерлер. 16 Себәби әхтиң болан еринде оны баглашан адамың өлмеги зерурдыр. 17 Аслында, әхт өлүм аркалы тассыкланыляндыр, себәби оны баглашан адам дирикә, әхтиң гүйҗи ёкдур. 18 Хатда көне әхтиң хем гүйҗе гирмеги үчин ган дөкүлмелиди. 19 Себәби Муса Кануның әхли табшырыкларыны бүтин халка айданда, ол яш өкүзлериң, гечилериң ганыны сув билен гарыпды. Соңра бир таяга* беркидилен гырмызы реңкли йүңи гана батырып, оны әхт китабына* ве бүтин халка сепди. 20 Шонда Муса: «Бу Худайың сизе берҗай этмегиңиз үчин табшыран әхт ганыдыр» дийди. 21 Шейле-де ол ганы чадыра ве мукаддес гуллукда уланылян гаплара сепди. 22 Хава, Кануна гөрә әхли зат ган аркалы арассаланяндыр, ган дөкүлмесе, гүнәлериң багышланмагы мүмкин дәлдир.
23 Шонуң үчин гөкдәки затларың нусгасы болан затлар малларың ганы билен арассаланмалыды. Эмма гөкдәки затлар үчин мал гурбанындан хас говы гурбан герекди. 24 Себәби Месих гөкдәки хакыкы затларың нусгасы болан ве ынсан эли билен ясалан мукаддес отага гирмеди, гайтам, бизиң үчин Худайың хузурында* пейда болды. 25 Ол муны хер йыл Иң мукаддес отага өз ганы билен дәл-де, малларың ганы билен гирйән баш руханы ялы гайта-гайта этмәнди. 26 Ёгсам, ол дүнйәниң башлангыҗындан бәри, өвран-өвран эҗир чекмели боларды. Ол өз җаныны гурбан берип, гүнәлери айырмак үчин дүнйәниң* ахырында бир гезекде хемишелик аян болды. 27 Адамларың бир гезек өлүп, соңра хөкүм эдилиши ялы, 28 Месих хем өзүни бир гезекде хемишелик хөдүрләп, көп адамларың гүнәлерини өз үстүне алды; эмма ол икинҗи гезек гүнәлери айырмак үчин дәл-де, оңа йүрекден гарашянлары халас этмәге гелер.