Еврейлер
4 Худайың дынчлык ерине гирмәге хениз хем мүмкинчилигимиз бар. Шол себәпли, гелиң, бу вададан өзүмизи махрум этмекден сересап болалың. 2 Ата-бабаларымыз ялы бизе-де хош хабар ыглан эдилди; эмма олара эшиден сөзлери пейда гетирмеди, себәби оларда гулак асан адамларыңкы ялы берк иман ёкды. 3 Эмма биз иман эдендигимиз үчин Онуң дынчлык ерине гирйәрис. Йөне Худай дүнйәни ярадандан соң, эден ишлеринден дынч алса-да, ата-бабаларымыз хакда: «Мен гахар билен: „Олар мениң дынчлык ериме гирмезлер“ дийип ант ичдим» дийди. 4 Язгыларың башга бир еринде болса единҗи гүн барада: «Худай единҗи гүн әхли ишлеринден дынч алды» дийилйәр. 5 Муңа гарамаздан, Худай: «Олар мениң дынчлык ериме гирмезлер» диййәр.
6 Хош хабары илкинҗи болуп эшиденлер гулак асмандыклары үчин Худайың дынчлык ерине гирип билмедилер. Йөне кәбириниң хениз хем ол ере гирмәге мүмкинчилиги бар. 7 Худайың: «Шу гүн сиз мениң сесиме гулак асмак ислесеңиз, гахарымы гетирип, кесирлик этмәң» диен сөзлери шу хатда эййәм агзалыпды. Гөршүмиз ялы, Худай энчеме вагт геченсоң, Давудың мезмурында «Шу гүн» диймек билен, ол гүни айратын белләп гечйәр. 8 Эгер Ешув олары дынчлык ере алып баран болсады, онда Худай башга бир гүн барада айтмалы болмазды. 9 Шейлеликде, Худайың халкы үчин Сабат гүни ялы дынч гүни хенизем бардыр. 10 Себәби Худайың эден ишлеринден дынч алшы ялы, дынчлык ере гирен адам хем эден ишлеринден дынч аландыр.
11 Шол себәпли, гелиң, хич биримиз гулак асмадыкларың ызына эермез ялы, дынчлык ере гирмек үчин элимизде барыны эделиң. 12 Худайың сөзи дири хем тәсирлидир. Ики тарапы кесгир гылычдан хем йитидир, ол адама шейле чуң батяр велин, онуң ички* ве дашкы* дүнйәсини аян эдйәр, сүңклери бөлүп, йилиге ченли барып етйәр. Пикирлери ве йүрегиң ниетлерини хөкүм эдйәр. 13 Хич ким ве хич зат Худайың назарындан гизлин галян дәлдир. Әхли зат онуң өңүнде ачык хем айдыңдыр, биз хем оңа җогап бермелидирис.
14 Бизиң гөге гирен бейик баш руханымыз бар. Ол Худайың Оглы Исадыр. Шонуң үчин, гелиң, оңа болан иманымыз хакда гүррүң бермеги довам эделиң. 15 Себәби бизиң баш руханымыз эҗизликлеримизе дуйгудашлык билдирип билйәндир. Ол бизиң ялы әхли затда сыналса-да, гүнә эден дәлдир. 16 Шонуң үчин, гелиң, Худайың мерхемет тагтына якынлашып, чекинмән* дога эделиң. Шонда көмеге мәтәч боланымызда, ол бизе рехимдарлык билдирип, мерхемет эдер.