Ресулларың ишлери
26 Агриппа Павлуса: «Саңа өзүңи горамак үчин сөз берилйәр» дийди. Шонда Павлус элини узадып, ышарат этди-де, сөзе башлады:
2 «Агриппа патыша, ехудыларың мени гүнәкәрләп, айдян затлары бабатда өзүми шу гүн сениң өңүңде горап билйәндигиме бегенйәрин. 3 Эсасан-да, сен ехудыларың дәп-дессурлары ве оларың арасында турян давалары бабатда говы билйәнсиң. Шол себәпли мени сабырлы диңлемегиңи хайыш эдйәрин.
4 Аслында, өз халкымың арасында-да, Иерусалимде-де мениң яшлыкдан нәхили дурмуш алып барандыгымы хемме ехудылар говы билйәр. 5 Олар мени өңден хем говы танаярлар. Эгер ислеселер, олар мениң фарисейлериң дини топарына дегишли боландыгымы ве оңа берк эерип яшандыгымы тассыклап билерлер. 6 Инди болса Худайың ата-бабаларымыза берен вадасына умыт эдйәндигим үчин, мени хөкүм эдйәрлер. 7 Халкымызың 12 тайпасы хем гиҗе-гүндиз Худая мукаддес гуллугы ыхласлы берҗай эдип, шу ваданың ерине етишини гөрмәге умыт эдйәр. Сизиң Алыхезретлериңиз, ехудылар мени, ине, шу умыт үчин айыплаярлар.
8 Сизиң кәбириңиз нәме үчин Худай өлен адамлары дирелдип билмез өйдйәрсиңиз? 9 Аслында, мениң өзүм хем назаретли Исаның адына гаршы көп затлары этмегиң догрудыгына ынанярдым. 10 Иерусалимде-де шейле затлары эдипдим, улы руханылардан ыгтыяр алып, көп шәгиртлери* түрмә басдым. Олара җеза берленде, мен муны макуллапдым. 11 Көпленч хемме синагогалара айланып, олары җезаландырдым, зорлук билен иманларындан дәндирҗек болдум. Мениң олара болан гахар-газабым шейле гүйчлүди велин, хатда башга шәхерлере-де айланып, олары ызарлапдым.
12 Шу ниет билен, мен улы руханылардан ыгтыяр хем хат алып, Дамаска барярдым. 13 Сизиң Алыхезретлериңиз, ёлда баряркам, гүндизиң гүнортаны гөкден гүйчли Гүн шөхлеси инип, бизиң даш-төверегимизи ягтылтды. 14 Бизиң барымыз ере йыкылдык, шонда мен еврей дилинде: „Савул, Савул, сен нәме үчин мени ызарлаярсың? Сен эесиниң таягыны* депйән өкүз ялы өзүңи гынаярсың“ диен сес эшитдим. 15 Мен оңа: „Агам, сен ким боларсың?“ дийдим. Халыпамыз маңа: „Мен сениң ызарлаян Исаң. 16 Ериңден тур, чүнки мен сени гуллукчым эдип сайладым. Сен гөрен затларыңа ве өзүм бабатда гөркезҗек затларыма шаятлык этмелисиң. Ине, шонуң үчин хем мен саңа гөрүндим. 17 Мен сени ехудыларың ве бейлеки халкларың арасына ёллаярын, олардан халас хем эдерин. 18 Мен сени оларың гөзлерини ачмагың, гараңкылыкдан ягтылыга чыкармагың ве Шейтаның голы астындан азат эдип, Худая доланмаклары үчин иберйәрин. Шейлеликде, маңа иман этмек билен, оларың гүнәлери багышланар ве мукаддеслере берилйән мирасы алып билерлер“.
19 Эй Агриппа патыша, мен гөкден инен гөрнүше гаршы чыкып билмедим. 20 Шонуң үчин илки Дамаска, соңра Иерусалиме бардым. Шейле-де бүтин Яхуда юрдуна ве башга халклара айланып, адамлары тоба этмәге хем-де тоба эдйәндиклерини гөркезйән ишлери эдип, Худая доланмага чагырдым. 21 Ине, шонуң үчин хем ехудылар мени ыбадатханада тутуп, өлдүрҗек болдулар. 22 Эмма мен Худайың көмеги билен, шу гүне ченли улудан-кичә, әхли адамлара хош хабары дүшүндирип гелйәрин. Мен олара Пыгамберлериң ве Мусаның айданларындан артык хич зат айтмадым. 23 Месихиң эҗир чекмелидиги, өлүмден илкинҗи болуп дирелмелидиги ве онуң хем ехудылара, хем башга халклара ягтылыгы ыглан этмелидиги хакда айдярдым».
24 Павлус шу затлары гүррүң берип дурка, Фест батлы сес билен гыгырып: «Павлус, сен акылыңдан азашыпсың! Көп окамаклык сени дәлиредипдир!» дийди. 25 Эмма Павлус шейле дийди: «Сизиң Алыхезретлериңиз хөкүмдар Фест, мен дәлирәмок, мен хакыкаты ве сагдын дүшүнҗели сөзлери айдярын. 26 Аслында, патыша хем муны говы билйәр, шонуң үчин мен оңа чекинмән* аркайын йүзленйәрин. Бу затларың хич бириниң онуң назарындан сыпмандыгына долы ынанярын, себәби олар гизлинликде болманды. 27 Агриппа патыша, сиз пыгамберлериң айданларына ынанярсыңызмы? Мен сизиң ынаняндыгыңызы билйәрин». 28 Эмма Агриппа Павлуса: «Сен гаты ынамлы геплейәрсиң. Говусы, гепиңи гой, ёгсам аз салымдан мени хем месихчи эдерсиң» дийди. 29 Павлус оңа: «Мен диңе сизиң дәл, эйсем, шу ерде отуран әхли адамларың хем иру-гич мениң ялы болмагыны Худайдан дилег эдйәрин; йөне шейле зынҗырлар билен баглы болмакларыны ислемейәрин» дийди.
30 Шонда патыша еринден турды. Хөкүмдар Фест, Берника ве оларың янында отуран адамлар хем турдулар. 31 Чыкып баряркалар, олар бири-бирине: «Бу адам өлүме я-да түрмә мынасып иш этмәндир» дийишдилер. 32 Соңра Агриппа Фесте: «Эгер ол Сезара арз этмедик болса, оны бошатса-да боларды» дийди.