Ресулларың ишлери
10 Кайсарияда Корнелий атлы бир адам барды. Ол Италияның гошунының* йүзбашысыды. 2 Корнелий ве онуң өй-ичерисиндәкилер худайхон адамларды. Ол гарыплара көмек эдип, элмыдама Худая дога эдерди. 3 Бир гезек ол сагат докуз* төвереги гөрнүшде Худайың перишдесини ачык-айдың гөрди. Ол оңа: «Корнелий!» дийип йүзленди. 4 Корнелий оңа серетди-де, титрәп: «Нәме, Агам?» дийип сорады. Перишде оңа шейле дийди: «Худай сениң догаларыңы эшитди ве гарыплара көмек эдйәндигиңи гөрди. 5 Хәзир болса Яфа адам уграт-да, Петрус дийилйән Симуны чагыр. 6 Оны деңзиң кенарында яшаян Симун атлы дери уссасы өйүне мыхман алды». 7 Перишде гиден бадына, Корнелий ики хызматкәрини ве бир худайхон эсгерини янына чагырды. 8 Болан затлары гүррүң берди-де, олары Яфа угратды.
9 Олар ёлуны довам эдип, эртеси шәхере голайлап гелйәрдилер. Шонда Петрус сагат алты* төвереги дога этмек үчин җайың үчегине* чыкды. 10 Ол җуда аҗыгып, бир затлар иеси гелди. Нахар тайярланып йөркә, Петрус гөрнүш гөрди. 11 Ол гөрнүшде гөгүң ачылып, бир улы сачагың дөрт уҗундан салланып, ашак дүшүп гелйәнини гөрди. 12 Сачакда дүрли гөрнүшли хайванлар, сүйренҗилер ве гушлар барды. 13 Шонда перишде оңа: «Петрус, тур-да, булары союп ий!» дийди. 14 Эмма Петрус: «Агам, мен муны өмүрем этмерин. Себәби мен хич хачан хапа ве харам затлары иен дәлдирин» дийди. 15 Перишде оңа икинҗи гезек: «Худайың арассалан затларына инди хапа дийме» дийди. 16 Бу ягдай үч гезек гайталанды ве сачак деррев гөге галды.
17 Петрус гең галып, гөрен гөрнүшиниң манысы хакда ойланып дурка, Корнелийиң иберен адамлары Симуның өйүниң ниредедигини сорап, онуң гапысына гелип дурдулар. 18 Олар өй эесини чагырып, ондан Петрус дийилйән Симуны сорадылар. 19 Петрус хенизем гөрен гөрнүши хакда ойланып отырды. Шонда мукаддес рух оңа шейле дийди: «Ине, сени үч адам сорап гелди. 20 Ашак дүш-де, олар билен гит. Бу адамлара асла шүбхеленме, себәби олары мен угратдым». 21 Петрус ашак дүшүп, олара: «Сизиң гөзлейән адамыңыз мен. Сиз нәме үчин гелдиңиз?» дийди. 22 Олар: «Бизи сениң яныңа йүзбашы Корнелий угратды. Ол догручыл, худайхон адамдыр, ехуды халкының арасында-да ягшы ады бар. Худайың мукаддес перишдеси оңа сени өйүне чагырып, айтҗак сөзлериңи диңлемеги табшырды» дийдилер. 23 Петрус олара өе гирмеги ве мыхман болмагы хайыш этди.
Ертеси гүн Петрус туруп, олар билен биле ёла дүшди. Яфада яшаян кәбир доганлар хем онуң яны билен гитдилер. 24 Шол гүнүң эртеси ол Кайсария гелип етди. Корнелий болса әхли доган-гарындашларыны ве якын достларыны өйүне чагырып, Петруса гарашып отырды. 25 Петрус геленде, Корнелий оны гаршы алып, дыза чөкди-де, оңа тагзым этди. 26 Эмма Петрус оны еринден галдырып: «Тур; менем сениң ялы адам» дийди. 27 Соңра онуң билен геплешип, өе гиренде, ол ерде энчеме адамларың йыгнанандыгыны гөрди. 28 Петрус олара шейле дийди: «Сиз Кануна гөрә ехудыларың башга миллетли адам билен гатнашмалы я-да онуң өйүне гирмели дәлдигини говы билйәнсиңиз. Эмма Худай маңа хич бир адамы хапа я-да харам хасапламалы дәлдигини гөркезди. 29 Шол себәпли мен бу ере гелмәге гаршы болмадым. Ери, сиз мени нәме үчин чагырдыңыз?»
30 Корнелий оңа шейле дийди: «Дөрт гүн мундан өң, эдил шу вагт сагат докузда* өйде дога эдип дуркам, бирденкә өңүмде ак эшикли бир адам пейда болды. 31 Ол маңа шейле дийди: „Корнелий, Худай сениң догаларыңы эшитди ве гарыплара көмек эдйәндигиңи гөрди. 32 Шонуң үчин Яфа адам уграт-да, Петрус дийилйән Симуны чагыр. Оны деңзиң кенарында яшаян Симун атлы дери уссасы өйүне мыхман алды“. 33 Мен деррев сениң яныңа адам угратдым, гелениң говы болды. Хәзир болса бизиң хеммәмиз Худайың хузурында дуруп, Ехованың* сен аркалы айтҗак әхли табшырыкларыны диңлемәге тайындырыс».
34 Шонда Петрус гүррүңе башлап, шейле дийди: «Мен, догрудан-да, Худайың хич кими ала тутмаяндыгына гөз етирдим. 35 Ол Өзүнден горкян ве догрулык эдйән ислендик халкдан болан адамы кабул эдйәндир. 36 Худай әхлимизиң Халыпамыз болан Иса Месих аркалы ысрайыл огулларына парахатлык барадакы хош хабары ыглан этди. 37 Сиз Яхяның сува чүмдүрилмек барада вагыз эдендигини ве соңра Җелиледен башлап, тутуш Яхудада эдилен гүррүңлери билйәнсиңиз. 38 Худай мукаддес рухы ве гүйҗи аркалы назаретли Исаны месх этди. Иса әхли ерлере айланып, ягшы ишлери эдерди ве Иблис зерарлы эҗир чекен адамлары сагалдарды, себәби Худай онуң биленди. 39 Биз онуң ехудыларың юрдунда ве Иерусалимде эден әхли ишлерине шаятдырыс. Олар болса оны пүрсе чүйләп* өлдүрдилер. 40 Эмма үчүнҗи гүн Худай Исаны дирелдип, адамлара оны гөрмәге мүмкинчилик берди. 41 Ол өлүмден диреленде, Худай оны хеммелере дәл-де, диңе онуң билен ийип-иченлере, ягны бизе гөрмәге мүмкинчилик берди. Худай муны өңүнден белләпди. 42 Шейле-де Иса бизе адамлара вагыз этмеги ве Худайың оны дирилери хем өлүлери хөкүм этмәге белләндиги хакында биркемсиз шаятлык этмеги табшырды. 43 Әхли пыгамберлер шуны шаятлык этдилер: Худай Иса Месихе иман эден адамларың гүнәлерини онуң ады аркалы багышлар».
44 Петрус бу затлары гүррүң берип дурка, диңләп отуранларың әхлисине мукаддес рух инди. 45 Петрусың яны билен гелен сүннетленен шәгиртлер мукаддес рухуң* өзге миллетлилериң үстүне инйәндигини гөрүп, хайран галдылар. 46 Себәби оларың башга диллерде гепләп, Худайы шөхратландыряндыкларыны эшитдилер. Шонда Петрус: 47 «Бу адамлар хем бизиң ялы мукаддес рухы алдылар. Эйсем, ким олара сува чүмдүрилмәге пәсгел берип билер?» дийди. 48 Шейлеликде, Петрус олара Иса Месихиң ады билен сува чүмдүрилмеги табшырды. Соңра олар Петруса бирнәче гүн янларында галмагы хайыш этдилер.