Лука
5 Бир гезек Иса Генесарет* көлүниң якасында Худайың сөзүни өвредип дурка, мәреке оны гысып башлады. 2 Шонда ол кенарың якасында дуран ики саны гайыгы гөрди, балыкчылар болса гайыкдан дүшүп, торларыны ювуп дурдулар. 3 Иса гайыкларың бирине мүнүп, онуң эеси Симундан кенардан бираз аңыррак йүзмеги хайыш этди. Соңра ол гайыкда отурып, мәрекә өвредип башлады. 4 Иса сөзүни тамамландан соң, Симуна: «Чуң ере йүз-де, торлары шол ере зың» дийди. 5 Симун болса: «Мугаллым, биз бүтин гиҗе җан этсек-де, хич зат тутуп билмедик, йөне сениң айдяндыгың үчин торлары ташлайын» дийип җогап берди. 6 Торларыны ташланларында, олар шейле көп балык тутдулар велин, торлар йыртылып башлады. 7 Шонда олар ышарат эдип, бейлеки гайыкдакы ёлдашларыны көмеге чагырдылар. Олар ики гайыгы-да балыкдан долдуранларында, гайыклар гарк болуп башлады. 8 Симун Петрус муны гөрүп, Исаның өңүнде дыза чөкди-де: «Агам, мен сениң яныңда болмага мынасып дәлдирин, мен бир гүнәли адам ахырын» дийди. 9 Балыгың җуда көп дүшендигини гөрүп, Симун ве гайыкдакыларың әхлиси, 10 шол санда Симуның балыкчы ёлдашлары, ягны Зебедейиң огуллары Якуп билен Яхя хем дийсең хайран галдылар. Эмма Иса Симуна: «Горкма, сен мундан бейләк адамлары тутян балыкчы боларсың» дийди. 11 Шейлеликде, олар гайыкларыны кенара чыкардылар-да, олары гоюп, Исаның ызына дүшдүлер.
12 Бир гезек Иса шәхерлериң бириндекә, ине, онуң янына тутуш эндамы хейвере кеселли бир адам гелди. Ол Исаның өңүнде йүзин йыкылды-да, оңа ялбарып: «Халыпам, эгер сен ислесең, мени тәмиз эдип билерсиң» дийди. 13 Иса элини узадып, оңа дегирди-де: «Ислейәрин, тәмиз бол!» дийди. Ол адам шол бада хейвере кеселинден сагалып, тәмиз болды. 14 Иса оңа муны хич киме айтмазлыгы табшырып: «Гит-де, өзүңи рухана гөркез. Олара шаятлык болар ялы, Мусаның канунына гөрә сагаландыгың үчин гурбанлык гетир» дийди. 15 Эмма Иса хакдакы хабар хемме ере яйрады ве биргиден мәреке оны диңлемек хем-де сыркавлыгындан сагалмак үчин үйшүп янына барярды. 16 Муңа гарамаздан, ол көпленч дога этмек үчин чола ере гидйәрди.
17 Бир гезек Иса бир өйде адамлара өвредип отырды. Отуранларың арасында Җелиләниң ве Яхуданың әхли обаларындан хем-де Иерусалимден гелен фарисейлер*, Кануны өвредйән мугаллымлар барды. Ехова* Иса сыркавлары сагалтмак үчин гүйч берипди. 18 Ине, адамлар бир ысмазы дүшекде гетирип, Исаның янына элтҗек болдулар. 19 Олар мәрекеден яңа ичерик гирип билмедилер. Шонуң үчин җайың үстүне чыкып, онуң үчегини ачдылар-да, ысмазы дүшеги билен биле мәрекәниң ортасында дуран Исаның өңүне дүшүрдилер. 20 Иса оларың иманыны гөренде, ысмаза: «Сениң гүнәлериң багышланды» дийди. 21 Шонда канунчылар* ве фарисейлер* өз араларында: «Худая дил етирер ялы, бу ким болупдыр? Худайдан башга гүнәлери багышлап билйән бармы нәме?» дийишдилер. 22 Иса оларың пикирини билип: «Сиз нәме үчин йүрегиңизде бейле затлар барада пикир эдйәрсиңиз? 23 Хайсы сөзлери айтмак аңсат: „Сениң гүнәлериң багышланды“ диймекми я-да „Тур-да, йөре“ диймек? 24 Эмма сиз Ынсан оглуның ер йүзүнде гүнәлери багышламага ыгтыярының бардыгыны билмегиңиз үчин...» дийди-де, ысмаз адама: «Саңа диййәрин, тур, дүшегиңи ал-да, өйүңе гайт» дийди. 25 Ол хем хеммелериң гөзүниң алнында дүшегини алды-да, Худайы шөхратландырып, өйүне гайтды. 26 Шонда хеммелер муңа хайран галып, Худайы шөхратландырып башладылар ве горкудан долуп: «Биз шейле аҗайып затлары хич хачан гөрмәндик!» дийишдилер.
27 Шондан соң Иса йөрәп барярка, салгытханада отуран Леви* атлы салгытчыны гөрүп, оңа: «Мениң шәгирдим бол» дийди. 28 Ол хем еринден турды-да, хемме затларыны гоюп, онуң ызына дүшди. 29 Шонда Леви Иса үчин өз өйүнде улы отурылышык гурнады, нахарланып отуран мыхманларың арасында энчеме салгытчылар хем барды. 30 Фарисейлер ве канунчылар муны гөренде, нәгилелик билдирип, онуң шәгиртлерине: «Сиз нәме үчин салгытчылар ве гүнәкәрлер билен ийип-ичйәрсиңиз?» дийдилер. 31 Иса олара: «Лукман саг адамлара дәл-де, сыркавлара герекдир. 32 Мен догры адамлары дәл-де, гүнәкәрлери тоба чагырмага гелдим» дийип җогап берди.
33 Кәбир адамлар онуң янына гелип: «Яхяның хем-де фарисейлериң шәгиртлери йыгы-йыгыдан агыз беклейәрлер ве ялбарып дога эдйәрлер, сениң шәгиртлериң болса ийип-ичип йөрлер» дийдилер. 34 Иса олара: «Эйсем, сиз өйленйән йигит янларындака, тоя гелен мыхманлара агыз бекледип билермисиңиз? 35 Эмма өйленйән йигидиң олардан алынҗак гүнлери гелер; шонда олар агыз бекләрлер» дийди.
36 Иса олара шейле мысал гетирди: «Хич ким тәзе дондан кесип алып, көне дона яма салмаз. Эгер ол шейле этсе, онда тәзе яма йыртылар. Тәзе дондан алнан яма көне дона лайык гелмейәр. 37 Шейле-де хич ким тәзе шерабы көне мешиклере* гуймаяр. Эгер гуйса, онда тәзе шерап мешиклери йыртып, ондан дөкүлер ве мешиклер заяланар. 38 Эмма тәзе шерап тәзе мешиклере гуюлмалыдыр. 39 Хич ким көне шерабы дадып гөренсоң, тәзе шерабы ичеси гелмез. Ол „Көнеси говы экени“ диер».