Матта
2 Хиродесиң* патышалык эдйән дөври Яхуданың Бейтуллахам шәхеринде Иса догуляр. Бирнәче вагтдан соңра, Гүндогардан Иерусалиме мүнечҗимлер* гелип: 2 «Ехудыларың патышасы болмалы оглан ниреде? Биз Гүндогарда онуң йылдызыны гөрүп, оңа тагзым этмәге гелдик» дийдилер. 3 Муны эшидип, Хиродес патыша ве Иерусалимиң халкы ховсала дүшдүлер. 4 Ол улы руханыларың ве канунчыларың әхлисини йыгнап, Месихиң ниреде дүнйә инмелидигини сорады. 5 Олар шейле дийдилер: «Ол Яхуданың Бейтуллахам шәхеринде догулмалы, себәби пыгамберликде шейле язылгы: 6 „Эй Яхуданың Бейтуллахам шәхери, сен Яхуда хөкүмдарлары үчин асла кичи дәлсиң. Себәби ысрайыл халкымы чопан кимин бакҗак хөкүмдар сенден дөрәр“».
7 Хиродес мүнечҗимлери гизлинликде янына чагырып, йылдызы хачан гөрендиклерини чинтгәп сорады. 8 Соңра олары Бейтуллахама ёллап, шейле дийди: «Гидиң-де, чаганы говуҗа гөзләң. Оны тапсаңыз, маңа хабар бериң, себәби менем оңа тагзым эдесим гелйәр». 9 Олар патышаның айданларыны диңләп, ёла дүшдүлер. Ине, оларың Гүндогарда гөрен йылдызы ёл гөркезип, чаганың өйүне етип сакланды. 10 Олар муны гөрүп, өрән бегендилер. 11 Мүнечҗимлер өе гирип, чаганы ве онуң эҗеси Меръеми гөрдүлер. Олар чага тагзым эдип, алтын, ладан* ве мирра* совгат бердилер. 12 Эмма Худай олара дүйшүнде Хиродесиң янына бармазлыгы дуйдурды. Шол себәпли олар юрдуна башга ёл билен доландылар.
13 Олар гайдансоң, Ехованың* перишдеси Юсубың дүйшүне гирип: «Тур, чаганы, аялыңы ал-да, Мүсүре гач ве нәме этмелидигиңи айдянчам, шол ерде гал. Себәби Хиродес чаганы өлдүрҗек болуп, оны гөзләп йөр» дийди. 14 Юсуп укудан оянып, шол гиҗәниң өзүнде чаганы ве аялыны алды-да, Мүсүре гитди. 15 Ол Хиродес арадан чыкянча, шол ерде галды. Шейдип, Ехованың* пыгамбер аркалы: «Мен оглумы Мүсүрден чагырдым» диен сөзлери берҗай болды.
16 Хиродес мүнечҗимлериң алдандыгыны биленде, гахар-газаба мүнди. Ол Бейтуллахама ве онуң даш-төверегине адам иберип, мүнечҗимлерден аныклан вагтына гөрә ики яша ченли әхли огланлары өлдүртди. 17 Шонда Еремия пыгамбериң айдан шу сөзлери ерине етди: 18 «Рама шәхеринде агы ве аҗы перят сеси эшидилйәр. Рахел чагалары үчин аглаяр ве хич ким оңа теселли берип билмейәр, себәби инди онуң чагалары ёк».
19 Хиродес өленден соң, Ехованың* перишдеси Мүсүрде Юсубың дүйшүне гирип: 20 «Тур, чаганы ве аялыңы ал-да, Ысрайыл топрагына долан, себәби чаганы өлдүрҗек болян адам арадан чыкды» дийди. 21 Шонда ол чаганы ве аялыны алып, Ысрайыла доланды. 22 Эмма Юсуп Хиродесиң ерине оглы Археласың патыша боландыгыны эшиденде, Яхуда бармага горкды. Шейле-де ол дүйшүнде Худайдан дуйдурыш алып, Җелиле этрабына гитди. 23 Юсуп Назарет шәхерине барып орнашды. Шейдип, пыгамберлериң: «Оңа назаретли* диерлер» диен сөзлери берҗай болды.