Ресулларың ишлери
11 Яхудадакы ресуллар ве доганлар өзге миллетлериң хем Худайың сөзүни кабул эдендигини эшитдилер. 2 Петрус Иерусалиме геленде, сүннетленмегиң тарапдарлары оңа нәгилелик билдирип: 3 «Сен сүннетленмедик адамларың өйүне гирип, олар билен ийип-ичдиң» дийишдилер. 4 Шонда Петрус олара болан затлары җикме-җик дүшүндирип башлады:
5 «Мен Яфа шәхеринде дога эдип дуркам, гөрнүшде гөгүң ачылып, бир улы сачагың дөрт уҗундан салланып, ашак, яныма дүшүп гелйәнини гөрдүм. 6 Сачагың ичинде дүрли гөрнүшли хайванлардыр йыртыҗылар, сүйренҗилер ве гушлар барды. 7 Шонда мен перишдәниң: „Петрус, тур-да, булары союп ий!“ диенини эшитдим. 8 Эмма мен: „Агам, мен муны өмүрем этмерин. Себәби мен хич хачан хапа я-да харам зады агзыма алан дәлдирин“ дийдим. 9 Перишде икинҗи гезек маңа: „Худайың арассалан затларына инди хапа дийме“ дийип җогап берди. 10 Бу ягдай үч гезек гайталанды, соңра әхли зат гөге галды. 11 Эдил шол вагт Кайсариядан иберилен үч адам бизиң болян өйүмизиң гапысына гелип дурды. 12 Шонда мукаддес рух маңа асла шүбхеленмән, олар билен гитмеги табшырды. Шу алты доган хем мениң яным билен гитди. Шейдип, биз ол адамың өйүне гирдик.
13 Ол өйүнде бир перишдәни гөрендигини ве онуң шейле диендигини айтды: „Яфа адам иберип, Петрус дийилйән Симуны чагыр. 14 Ол саңа ве машгала агзаларыңа халас болмак үчин нәме этмелидигини айдар“. 15 Мен олара гүррүң берип башланымда, мукаддес рух илкибашда бизе иниши ялы, олара-да инди. 16 Шонда Халыпамызың бирнәче гезек: „Яхя сува чүмдүрйәрди, эмма сиз мукаддес рух билен чүмдүрилерсиңиз“ диен сөзлери ядыма дүшди. 17 Шейлеликде, эгер Худай Халыпамыз Иса Месихе иман эденлере, ягны бизе берен мукаддес рухуны олара-да берен болса, онда Худая гаршы гидер ялы, мен ким болупдырын?»
18 Олар бу сөзлери эшиденлеринде, Петруса нәгиле болмагыны бес этдилер ве Худайы шөхратландырып: «Диймек, Худай башга халклара-да тоба эдип, яшайша говушмага мүмкинчилик берйәр» дийдилер.
19 Стефанусың өлдүрилмеги билен дөрән ызарламалар себәпли башга ерлере дарган шәгиртлер Финикия, Кипре ве Антиохия барып етдилер. Йөне олар диңе ехудылара вагыз эдйәрдилер. 20 Эмма оларың арасында Кипрден ве Киренадан Антиохия геленлер хем барды. Олар грекче геплейән адамлар билен гүррүңдеш болуп, Халыпамыз Иса хакдакы хош хабары ыглан эдйәрдилер. 21 Ехова* олар биленди, энчеме адамлар хем иман эдип, Халыпамызың шәгирди болдулар.
22 Бу хабар Иерусалимдәки йыгнага барып етенде, олар Антиохия Барнабасы ибердилер. 23 Ол бу ере геленде, Худайың олара мерхемет эдендигини гөрүп, бегенди ве олары мундан бейләк-де Халыпамыза вепалы болмага хөвеслендирди. 24 Барнабас җуда ягшы, мукаддес рухдан долы ве иманы берк адамды. Шонуң үчин көп адамлар Халыпамыза иман этди. 25 Ол Савулы гөзләп тапмак үчин Тарсуса гитди. 26 Оны тапып, Антиохия алып гайтды. Олар тутуш бир йылың довамында йыгнага барып, мәрекә өвредйәрдилер. Шонда шәгиртлер илкинҗи сапар Антиохияда Худайың гөркезмеси билен «месихчи» диен ады алдылар.
27 Шол гүнлер Иерусалимден Антиохия бирнәче пыгамберлер гелди. 28 Оларың арасындакы Агабус атлы пыгамбер рухуң гөркезмесине гөрә бүтин ер йүзүнде улы ачлыгың болҗакдыгыны айтды. Онуң эден пыгамберлиги Клавдийиң дөврүнде ерине етди. 29 Шейлеликде, шәгиртлериң херси башардыгындан Яхудада яшаян доганлара көмек этмеги йүрегине дүвдүлер. 30 Олар йыгнан затларыны Барнабас билен Савул аркалы яшулулара угратдылар.