Ресулларың ишлери
12 Шол вагтлар Хиродес* патыша йыгнагың кәбир агзаларыны ызарлап башлады. 2 Ол Яхяның доганы Якубы гылыч билен өлдүрди. 3 Ол мунуң ехудылара ярандыгыны гөренде, Петрусы-да туссаг этмекчи болды. Шол гүнлер Петир* байрамыды. 4 Ол Петрусы тутуп, түрмә басды. Петрусы дөрт топардан ыбарат болан эсгерлер гаравуллаярды. Хер топарда дөрт эсгер барды. Петир байрамы геченден соң, Хиродес оны халкың өңүне чыкармакчыды*. 5 Шейлеликде, Петрус түрмедеди, йыгнак болса ол хакда Худая гиҗе-гүндиз дога эдйәрди.
6 Хиродес Петрусы халкың өңүне чыкармакчыды. Шол гиҗе Петрус зынҗыра багланып, ики эсгериң арасында уклап ятырды. Түрмәниң дервезесине болса гаравуллар сакчылык эдйәрди. 7 Бирденкә Ехованың* перишдеси пейда болуп, Петрусың отуран ерини ягтылтды. Ол Петрусы ыралап оярды-да: «Чалтрак тур!» дийди. Шонда онуң элиндәки зынҗырлар гачды. 8 Перишде оңа: «Эгин-эшигиңи ве аякгабыңы гей» дийди. Ол айдылышы ялы-да этди. Соңра перишде оңа: «Донуңы гей-де, ызыма дүш» дийди. 9 Петрус отуран еринден чыкды-да, ызына дүшди, эмма перишде аркалы болян затларың хакыкатдан-да боляндыгына дүшүнмейәрди. Ол гөрнүш гөрйәндирин өйдйәрди. 10 Биринҗи ве икинҗи гаравуллардан гечип, олар шәхере чыкян демир дервезәниң янына баранларында, дервезе өз-өзүнден ачылды. Олар чыкып, көче билен баряркалар, бирденкә перишде гөзден гайып болды. 11 Шонда Петрус Ехованың* оны Хиродесден ве ехудыларың этҗек болян яманлыгындан халас этмек үчин перишдесини иберендигине дүшүнди.
12 Петрус әхли зада дүшүненден соң, Маркус дийилйән Яхяның эҗеси Меръемиң өйүне гитди. Ол ерде бирнәче шәгиртлер йыгнанып, дога эдйәрдилер. 13 Ол дервезәниң гапысыны каканда, Рода атлы хызматкәр гыз кимиң гелендигини гөрмек үчин чыкды. 14 Ол Петрусың сесини тананда, бегенҗинден яңа дервезәни ачмагы-да унудып, ичерик ылгап гирди ве өйде отуранлара дервезәниң агзында Петрусың дурандыгыны хабар берди. 15 Олар оңа: «Сен нәме, акылыңдан азашдыңмы?» дийдилер. Эмма ол шонда-да Петрусың гелендигини айдярды. Шонда олар: «Бейле болса, онда ол онуң перишдесидир» дийишдилер. 16 Петрус болса хенизем гапыны какып дурды. Олар гапыны ачанларында, Петрусы гөрүп, хайран галдылар. 17 Эмма ол эли билен ышарат эдип, олара юваш болмагы табшырды. Соңра Ехованың* оны түрмеден чыкарышыны җикме-җик гүррүң берди-де: «Муны Якуба ве бейлеки доганлара хабар бериң» дийди. Өзи болса башга ере гитди.
18 Ирден эсгерлер Петрусың ёкдугыны гөрүп, ховсала дүшдүлер. 19 Хиродес оны җан эдип гөзлесе-де, тапып билмеди. Шонда ол гаравуллары сорага тутуп, олара темми бермеги буюрды. Өзи болса Яхудадан Кайсария гидип, бирнәче вагт шол ерде галды.
20 Хиродес Сур билен Сидон халкына гахарлыды. Шонда оларың яшайҗылары патыша билен ярашмак үчин онуң янына гелдилер ве патышаның өйүндәки ишлере җогапкәр Бластусы өз тарапына гечмәге ырып, көмек этмеги хайыш этдилер. Себәби олар азык харытларыны патышаның юрдундан алярдылар. 21 Хиродес белленен гүн патышалык лыбасыны гейип, хөкүм күрсүсинде отурды ве җемагата йүзленип, сөз сөзледи. 22 Шонда йыгнанан мәреке батлы сес билен: «Бу адамың дәл-де, Худайың сеси!» дийип гыгырды. 23 Ол Худайы шөхратландырмандыгы себәпли, Ехованың* перишдеси оны шол бада кеселе учратды. Онуң эндам-җаны гуртлады, шейдип, ол өлди.
24 Ехованың* сөзи болса гитдигиче яйраярды, көп адамлар хем иман эдйәрди.
25 Барнабас билен Савул Иерусалимде ярдам этмек ишини тамамлап, Антиохия доландылар. Олар янлары билен Маркус дийилйән Яхяны-да алып гитдилер.