Ресулларың ишлери
25 Фест Яхуда велаятына гелип, хөкүмдарлыгы кабул этди ве үч гүнден соң Кайсариядан Иерусалиме гелди. 2 Улы руханылар ве ехудыларың абрайлы адамлары Павлусы айыплап, Фесте арз этдилер. Олар оңа ялбарып, 3 Павлусы Иерусалиме ибермеги хайыш этдилер. Аслында, олар Павлусы ёлда гелйәркә өлдүрмек үчин букуда гарашмагы дил дүвшүпдилер. 4 Эмма Фест олара Павлусың Кайсарияда болмалыдыгыны, өзүниң болса тизден шол ере бармакчыдыгыны айтды. 5 Ол: «Эгер ол адам бир нәдогры иш эден болса, гой, ёлбашчыларыңыз мениң билен гидип, оны айыпласынлар» дийди.
6 Фест 8-10 гүн төвереги Иерусалимде болуп, соңра Кайсария гитди. Эртеси гүн ол хөкүм күрсүсинде отурды-да, Павлусы гетирмеги буюрды. 7 Оны гетиренлеринде, Иерусалимден гелен ехудылар дашына үйшүп, оңа агыр гүнәлери йөңкейәрдилер, йөне айдян затларыны субут эдип билмейәрдилер.
8 Павлус болса өзүни горап: «Мен не ехудыларың Канунына, не ыбадатхана, не-де Сезара гаршы гүнә этдим» дийди. 9 Фест болса ехудылара яранҗак болуп, Павлуса: «Сен шу затлар үчин Иерусалиме гидип, мениң өңүмде хөкүм эдилмек ислейәрмиң?» дийди. 10 Эмма Павлус шейле дийди: «Мен Сезарың хөкүм күрсүсиниң өңүнде дурун, шу ерде-де маңа хөкүм чыкарылмалы. Мениң ехудылара яманлык этмәндигими сениң өзүң хем говы билйәрсиң. 11 Эгер мен җенаятчы болуп, өлүме мынасып бир иш эден болсам, онда мен өлүме хөкүм эдилмекден гачмаярын. Йөне бу адамларың маңа йөңкейән айыпламалары ялан болса, онда хич кимиң мени оларың элине бермәге хакы ёкдур. Мен Сезара арз эдйәрин!» 12 Шонда Фест меҗлисиң агзалары билен маслахатлашып, оңа: «Сен Сезара арз этдиң дәлми, онда Сезарың янына-да гидерсиң» дийди.
13 Бирнәче гүн геченсоң, Агриппа* патыша билен Берника* Фести гөрмек үчин Кайсария гелдилер. 14 Олар бирнәче гүн болансоң, Фест Агриппа патыша Павлусың ишини гүррүң берип, шейле дийди:
«Бу ерде Феликсиң туссагда галдырып гиден бир адамы бар. 15 Мен Иерусалимдекәм, улы руханылар ве ехудыларың яшулулары онуң үстүнден арз эдип, җезаландырмагы сорадылар. 16 Эмма мен римлилериң канунына гөрә адамы оны айыплаянлар билен йүзлешдирмән ве өзүни горамага мүмкинчилик бермән, хөкүм этмәге хич кимиң хакының ёкдугыны айтдым. 17 Шол себәпли олар шу ере геленде, мен эртеси гүн хаял этмән хөкүм күрсүсине гечдим-де, оны гетирмеги буюрдым. 18 Мен оны эрбет иш эдендир өйдүпдим, эмма олар оны хич хили эрбет ишлерде айыплап билмедилер. 19 Олар йөне бир өз дини ве Иса дийилйән бир өлен адам бабатда давалашярдылар. Йөне Павлусың айтмагына гөрә, ол дирелипдир. 20 Мен оларың нәме хакда давалашяндыгына долы дүшүнмедим. Шонуң үчин мен Павлуса Иерусалиме гидип, бу меселә шол ерде середилмеги теклип этдим. 21 Эмма ол Августың* чыкарҗак карарына гарашмагы хайыш этди. Шол себәпли мен оны Сезарың янына уградянчам, шу ерде сакламагы буюрдым».
22 Шонда Агриппа Фесте: «Мен хем оны диңлемек ислейәрин» дийди. Ол хем: «Сен оны эртир диңләп билерсиң» дийди. 23 Эртеси гүн Агриппа билен Берника овадан ша лыбасларыны гейип, гошун серкерделери ве шәхериң абрайлы адамлары билен бирликде хөкүм эдилйән җая гирдилер. Шонда Фест эсгерлере Павлусы гетирмеги буюрды. 24 Фест шейле дийип йүзленди: «Эй Агриппа патыша ве шу ерде отуранлар! Сизиң гөрйән шу адамыңыз хакда Иерусалимде-де, шу ерде-де әхли ехудылар онуң яшамага мынасып дәлдиги барада гыгырышыпдылар. 25 Йөне мен онуң өлүме мынасып хич зат этмәндигине гөз етирдим. Ол Августа арз эденде, мен онуң янына ибермек карарына гелдим. 26 Эмма мен ол хакда Җенабыма* язмага дегерли зат тапмадым. Шонуң үчин мен оны сизиң әхлиңизиң, айратын хем, эй Агриппа патыша, сизиң яныңыза гетирдим. Сиз бу иши дерңәниңизден соң, менде Августа язмага дегерли себәп болар. 27 Мениң пикиримче, туссаг эдилен адамың нәмеде айыпланяндыгыны гөркезмән, оны ибермек догры дәл».