Маркус
3 Иса ене-де синагога барды. Ол ерде эли ысмаз* бир адам барды. 2 Фарисейлер Исаны айыплаҗак болуп, Сабат гүни* бу адамы сагалдармыка дийип, оны үнсли сынлаярдылар. 3 Иса эли ысмаз* адама: «Ериңден тур-да, орта чык» дийди. 4 Соңра Иса фарисейлере: «Кануна гөрә Сабат гүни ягшылык этмек догрумы я-да яманлык? Адамың җаныны халас этмекми я-да өлдүрмек?» дийди. Олар хич зат җогап бермедилер. 5 Иса даш-төверегиндәки адамлара нәгилелик билен серетди, оларың доңйүрекдигине гаты гынанып, яңкы адама: «Элиңи узат» дийди. Ол хем узаданда, эли шол бада сагалды. 6 Шонда фарисейлер ол ерден чыкып, Исаны өлдүрмек үчин деррев Хиродесиң тарапдарлары* билен маслахатлашып башладылар.
7 Иса шәгиртлери билен деңзе тарап гитди. Шонда Җелиледен ве Яхудадан гелен улы мәреке онуң ызына дүшди. 8 Исаның эден энчеме ишлери барада эшидип, онуң янына хатда Иерусалимден, Идумеядан, Иордан дерясының бейлеки тарапындан ве Сур билен Сидондан* улы мәреке гелди. 9 Мәреке онуң дашыны гуршап, дыкнышык дөретмез ялы, Иса шәгиртлерине бир кичи гайык тайярламагы табшырды. 10 Ол көп адамлары сагалтды. Шол себәпли агыр кеселли адамларың хеммеси оңа элини дегирҗек болуп, янына дыкнышып барярдылар. 11 Хатда залым рухлар хем Исаны гөренде, онуң аягына йыкылып: «Сен Худайың Оглусың» дийип гыгырярдылар. 12 Эмма Иса олара өзи хакда хич киме гүррүң бермезлиги энчеме гезек берк табшырды.
13 Соңра Иса дага чыкды ве кәбир шәгиртлерини чагырды, олар хем янына бардылар. 14 Шонда ол вагыз этмәге ибермек үчин 12 адамы сайлап, олары «ресуллар» дийип атландырды. Олар Иса билен биле болярдылар. 15 Ол ресулларына җынлары ковуп чыкармага-да ыгтыяр берди.
16 Ине 12 ресулың атлары: Симун (Иса оңа Петрус диен ады хем берди), 17 Зебедейиң оглы Якуп ве онуң доганы Яхя (Иса олара Бенирегош диен ады хем берди, ол «гөк гүррүлдисиниң огуллары» диймеги аңладяр), 18 Андреас, Филипус, Бартоломей, Матта, Томас, Алфейиң оглы Якуп, Таддевус, Симун Кананит* 19 хем-де Иса дөнүклик эден Иуда Искариот.
Соңра Иса өе гирди. 20 Ол ере ене-де мәреке йыгнанды. Шол себәпли олар хатда нахар хем ийип билмедилер. 21 Эмма бу болян затлар хакда Исаның доган-гарындашлары эшиденде: «Ол акылындан азашыпдыр» дийип, оны алып гитмек үчин гелдилер. 22 Шейле-де Иерусалимден гелен канунчылар: «Бу адамың ичинде Беелзебул* бар. Ол җынлары җынларың хөкүмдары аркалы ковуп чыкаряр» дийдилер. 23 Иса олары янына чагырып, шейле мысал гетирди: «Шейтан нәдип Шейтаны ковуп чыкарсын? 24 Эгер бир патышалыгың адамлары агзала болсалар, оларың патышалыгы йыкылар. 25 Я-да бир машгаланың агзалары өз арасында агзала болса, оларың машгаласы даргар. 26 Шейлеликде, эгер Шейтан хем өз җынларына гаршы чыкса, онда онуң патышалыгы берк дурмаз, гайтам, йыкылар. 27 Эгер бири гүйчли адамың өйүне гирип, эмләгини огурлаҗак болса, онда илки онуң эл-аягыны даңар. Диңе шондан соң онуң өйүни талап билер. 28 Сизе догрусыны айдярын, адамлар нәхили гүнә этселер-де, хатда Худая дил етирселер-де, оларың гүнәси багышланар. 29 Эмма мукаддес руха дил етирен адамы Худай хич хачан багышламаз, ол эбедилик гүнәли болар». 30 Иса муны «Онуң ичинде залым рух бар» диендиклери үчин айтды.
31 Соңра Исаның эҗеси ве доганлары гелдилер-де, дашарда дуруп, оны чагырмак үчин бирини ибердилер. 32 Адамлар болса Исаның дашыны гуршап отырды. Шонда оларың бири: «Эҗең билен доганларың сени сорап, дашарда гарашып дурлар» дийди. 33 Эмма Иса адамлара: «Мен кими эҗем хем-де доганларым хасаплаярын?» дийди. 34 Соңра янында отуран адамлары гөркезди-де: «Ине мениң эҗем хем доганларым! 35 Ким Худайың ислегини берҗай эдйән болса, шол мениң доганым, уям хем эҗемдир» дийди.