Ресулларың ишлери
16 Павлус Дербә, соңра Листра шәхерине гелди. Ол ерде Тимотеос атлы бир шәгирт барды. Онуң эҗеси ехудыды ве Иса иман эдйәрди, какасы болса грекди. 2 Тимотеосың Листрада ве Иконияда яшаян доганларың арасында ягшы ады барды. 3 Павлус оны яны билен алып гитмек иследи. Йөне шол ерлерде яшаян ехудылар себәпли башда оны сүннетледи. Чүнки хеммелер Тимотеосың какасының грекдигини билйәрди. 4 Олар шәхерме-шәхер айланып, Иерусалимдәки ресулларың ве яшулуларың гелен карарыны ыглан эдйәрдилер хем-де олары берҗай этмеги табшырярдылар. 5 Шейлеликде, йыгнаклар иманда беркәп, шәгиртлериң саны гүн-гүнден артярды.
6 Мукаддес рух Худайың сөзүни Азияда вагыз этмеги гадаган эдендиги үчин, олар Фригия ве Галатя юрдуның үсти билен гечип гитдилер. 7 Мисия геленлеринден соң, Битиния гитҗек болдулар. Йөне Иса мукаддес рух аркалы олара ругсат бермеди. 8 Шейлеликде, олар Мисияның үсти билен Троас шәхерине гелдилер. 9 Гиҗе гөрнүшде Павлусың янына бир македониялы адам гелип, ондан: «Македония гел-де, бизе көмек эт» дийип хайыш этди. 10 Павлус гөрнүши гөрен бадына, биз Македония гитмекчи болдук, себәби Худайың бизи шол ердәки адамлара хош хабары ыглан этмәге чагыряндыгына дүшүндик.
11 Биз Троасдан деңзиң үсти билен гөни Самофракия адасына гитдик, эртеси гүн Непаль шәхерине бардык. 12 Соңра Римиң колониясы ве Македония велаятының эсасы шәхери болан Филипә гитдик. Ол ерде бирнәче гүн болдук. 13 Сабат гүни* шәхериң дервезесинден чыкып, деряның голайына бардык, себәби ол ерде дога эдилйән ериң бардыгыны эшидипдик. Шол ерде отурып, йыгнанан аяллара вагыз эдип башладык. 14 Ол ерде Лидия атлы тиятиралы бир худайхон аял барды; ол гырмызы реңкли матадыр эшиклери сатярды. Лидия Павлусың айдянларыны үнсли диңледи, себәби Ехова* онуң йүрегини долы ачыпды. 15 Ол тутуш өй-ичериси билен сува чүмдүрилип, соңра бизе: «Эгер сиз мени Ехова* вепалы хасаплаян болсаңыз, онда мениң өйүмде мыхман болуң» дийип ялбарды. Шейдип, ол бизи өйүне алып гитди.
16 Бир гүн биз дога эдилйән ере баряркак, җынлы хызматкәр гыза душдук. Ол җының көмеги билен гелеҗеги айдып*, хоҗайынларына көп газанч гетирйәрди. 17 Бу гыз ызымыза дүшүп: «Бу адамлар Бейик Бирибарың гулларыдыр, олар сизе гутулыш ёлуны ыглан эдйәрлер» дийип гыгырярды. 18 Ол энчеме гүнләп шейле эденсоң, Павлус халыс ядап, ызына өврүлди-де, җына: «Иса Месихиң адындан саңа онуң ичинден чыкмагы буюрярын» дийди. Җын хем шол бада чыкды.
19 Гызың хоҗайынлары гирдеҗисиз галандыкларыны гөренде, Павлус билен Силасы тутдулар-да, сүйрәп базара ёлбашчыларың янына алып гитдилер. 20 Шәхер хәкимлериниң янына гетиренлеринде, олары айыплап, шейле дийдилер: «Булар шәхеримизиң парахатлыгыны бозярлар. Бу ехудылар 21 бизиң, ягны римлилериң канунына гаршы гелйән дәп-дессурлары яйрадып, шолара гөрә яшамагы өвредйәрлер». 22 Шонда бүтин мәреке олара гаршы аяга галды. Шәхер хәкимлери оларың эшиклерини чыкарып, таяк билен урмагы буюрдылар. 23 Олары енҗип, соңра түрмә басдылар, түрмечә болса олары берк горамагы табшырдылар. 24 Шейле берк табшырык берлендиги үчин, түрмечи олары түрмәниң иң ички гөзенегине ташлап, аякларыны-да гандаллады.
25 Павлус билен Силас ярыгиҗе төвереклери дога эдип, Худая өвгүли айдымлар айдярдылар. Түрмедәкилер болса олары диңлейәрди. 26 Бирденкә гүйчли ер титрәп, тутуш түрмәни сарсдырды. Шол бада әхли гапылар ачылды ве отуранларың хеммесиниң зынҗырлары гачды. 27 Түрмечи оянанда, гапыларың ачыкдыгыны гөрүп, туссаглар гачандыр өйтди ве гылыҗыны чыкарып, өзүни өлдүрҗек болды. 28 Эмма Павлус батлы сес билен: «Җаныңа каст этме, бизиң хеммәмиз шу ерде!» дийип гыгырды. 29 Шонда түрмечи чыралары гетирдип, ичерик күрсәп гирди. Ол горкудан яңа титрәп, Павлус билен Силасың өңүнде дыза чөкди. 30 Соңра олары дашарык чыкарып: «Җенаплар, халас болмак үчин, мен нәме этмели?» дийди. 31 Олар: «Халыпамыз Иса иман эт, шонда сенем, өйүңдәкилерем халас боларсыңыз» дийдилер. 32 Павлус билен Силас оңа ве өйүндәкилериниң әхлисине Ехованың* сөзүни вагыз этдилер. 33 Шонда түрмечи гиҗәниң ичинде олары алып гитди-де, яраларыны ювды. Соңра бүтин машгала агзалары билен шол бада сува чүмдүрилди. 34 Түрмечи Павлус билен Силасы өйүне гетирди-де, оларың өңүнде сачак язып, нахар гойды. Ол өй-ичериси билен Худая иман эдендигине дийсең бегенйәрди.
35 Даң атанда, шәхер хәкимлери гаравуллары иберип: «Ол адамлары бошадың» дийди. 36 Түрмечи муны Павлуса хабар берип: «Шәхер хәкимлери адам иберип, сизиң икиңизи бошатмагы табшырды. Шонуң үчин чыкың-да, аркайын гидибериң» дийди. 37 Эмма Павлус: «Олар бизе, Рим раятларына хөкүм чыкарылманка, хеммелериң өңүнде енҗип, түрмә басдылар. Инди болса хич киме билдиртмән бошатҗак болярлармы? Ёк, баша бармаз! Гой, өзлери гелип, бизи чыкарсынлар» дийди. 38 Гаравуллар муны шәхер хәкимлерине хабар бердилер. Олар болса Павлус билен Силасың Римиң раятларыдыгыны биленлеринде, җуда горкдулар. 39 Шәхер хәкимлери гелдилер-де, олара ялбарып, түрмеден чыкардылар ве шәхерден гитмеги хайыш этдилер. 40 Павлус билен Силас болса түрмеден чыкып, Лидияның өйүне бардылар, доганлары гөрүп, олары рухландырдылар. Соңра ёла рована болдулар.