Галатялылар

6 Доганлар, эгер бири билмән ялңыш әдим әтсе, сиз, рухы тайдан өсенлер, оны юмшаклык билен дүзетмәге чалшың. Эмма өзүңиз хем сынага дүшмез ялы, үнсли болуң. 2 Бир-бириңизиң йүкүңизи гөтериң. Шейле этсеңиз, Месихиң кануныны берҗай эдерсиңиз. 3 Эгер кимдир бири хич ким болуп-да, өзүни ваҗып сайян болса, онда ол өзүни алдаяндыр. 4 Йөне, гой, хер ким өз эдйән ишлерини барласын, олары башгаларыңкы билен деңешдирмесин. Шонда ол эдйән ишлеринден шатлык тапар. 5 Себәби хер ким өз җогапкәрчилигини өзи чекмелидир.

6 Худайың сөзүни өвренен адам хем өз гезегинде шейле затлары өвредйән адамлар билен әхли ягшы затларыны пайлашсын.

7 Өзүңизи алдамаң: Худайың үстүнден гүлйән адам җезасыз галмаз. Адам нәме эксе, шоны-да орар. 8 Себәби тен хөвеслерине экйән адам ондан өлүм* орар, мукаддес руха экйән адам болса, рухдан эбеди яшайыш орар. 9 Шонуң үчин ягшы ишлери этмеги гоймалың. Себәби ягшылык этмекден ядамасак*, өз вагтында мивесини орарыс. 10 Гелиң, хениз мүмкинчилигимиз барка*, хемме адамлара, эсасан-да, имандашларымыза ягшылык эделиң.

11 Мен шу хаты өз элим билен яздым. Середиң, хатымың харплары-да улы.

12 Сизи сүннетленмәге меҗбур этҗек болян адамларың әхлиси даш кешби* билен башгаларда говы тәсир галдырмак ислейәрлер. Шейдип, олар Месихиң җебир пүрси* себәпли ызарланмакдан гача дурҗак болярлар. 13 Хатда сүннетленен адамлар хем Кануны берҗай этмейәрлер. Эмма олар сизиң тениңиз аркалы магтанып билер ялы, сүннетленмегиңизи ислейәрлер. 14 Мен болса Халыпамыз Иса Месихиң җебир пүрсүнден* башга хич зада магтанмак ислемейәрин. Ол аркалы дүнйә мениң үчин, мен хем дүнйә үчин өлендирин*. 15 Сүннетленмек я-да сүннетленмезлик ваҗып дәлдир, йөне тәзе ярадылыш ваҗыпдыр. 16 Шу дүзгүне эерйән әхли адамлара, ягны Худайың Ысрайылына парахатлык ве рехимдарлык болсун.

17 Гой, мундан бейләк хич ким маңа азар бермесин. Себәби мениң беденимде Исаның гулудыгымы гөркезйән тагма бар.

18 Доганлар, догры гарайшыңыз үчин Халыпамыз Иса Месих сизе мерхемет этсин. Омын.