Ресулларың ишлери
4 Петрус билен Яхя адамлара гүррүң берип дурка, ыбадатхананың гөзегчиси, руханылар ве саддукейлер* гелдилер. 2 Олар ресулларың халка Худайың сөзүни өвредип, Исаның өлүмден дирелендиги хакда ач-ачан гүррүң берйәндиклерини гөрүп гахарландылар. 3 Шонда олар буларың икисини тутуп, эртеси гүне ченли туссаглыкда сакладылар, себәби эййәм гүн яшыпды. 4 Эмма ресуллары диңлән адамларың көпүси иман этдилер, оларың саны 5 мүңе голайды.
5 Эртеси ехудыларың ёлбашчылары, яшулулары ве канунчылар Иерусалимде йыгнанышдылар. 6 Оларың арасында улы руханы Ханна, баш руханы Каяфа, Яхя, Исгендер ве улы руханының әхли доган-гарындашлары барды. 7 Олар Петрус билен Яхяны өңлеринде дурзуп: «Сиз бу затлары кимиң ыгтыяры ве ады билен эдйәрсиңиз?» дийип, сорап башладылар. 8 Шонда Петрус мукаддес рухдан долуп, шейле дийди:
«Эй халкың ёлбашчылары ве яшулулары, 9 сиз хәзир бизиң ягшы иш эдип, агсак адамы нәдип сагалдандыгымызы билмек ислейәрсиңиз. 10 Онда сиз ве тутуш ысрайыл халкы, билип гоюң: бу агсак адам сизиң пүрсе чүйлән, йөне Худайың өлүмден дирелден назаретли Иса Месихиң ады билен сизиң өңүңизде саг-аман дур. 11 Сизиң, ягны „гурлушыкчыларың герек дәл дийип зыңан дашы иң ваҗып даш* болды“. 12 Шейле-де гөк астында Иса Месихден* башга хич киме адамлары халас этмәге ыгтыяр берлен дәлдир».
13 Олар Петрус билен Яхяның батыргайлыгыны, билимсиз* ве сада адамлардыгыны гөренлеринде, җуда гең галдылар. Шонда оларың Исаның янында болан адамлардыгына дүшүндилер. 14 Эмма ики шәгирдиң янындакы сагалан адамы гөрүп, олара хич зат дийип билмедилер. 15 Шонда буларың үчүсине Меҗлисиң* отагындан дашарык чыкмагы буюрдылар ве өзара маслахатлашып, 16 шейле дийдилер: «Биз олары нәме этсеккәк? Догруданам, олар улы гудрат гөркездилер, муны Иерусалимиң әхли яшайҗылары гөрди, бизем муны инкәр эдип билмерис. 17 Говусы, гелиң, шу вака башга ерлере-де яйрамаз ялы, олары горкузып, Исаның ады хакда инди хич киме гүррүң бермезлиги табшыралың».
18 Соңра олары чагырып, Исаның ады хакда хич ерде ве хич зат айтмазлыгы я-да өвретмезлиги берк табшырдылар. 19 Эмма Петрус билен Яхя шейле җогап бердилер: «Өзүңиз ойланып гөрүң, эйсем, Худая дәл-де, сизе гулак асмак догрумы? 20 Биз гөрен ве эшиден затларымыз хакда гүррүң бермеги бес эдип билмерис». 21 Шонда олара хайбат атдылар-да, гойбердилер, себәби темми бермәге хич хили эсас тапмадылар. Үстесине-де, олар адамлардан горкдулар, чүнки хеммелер болан затлар үчин Худайы шөхратландырярды. 22 Гудрат билен сагалан адам 40 яшларындан геченди.
23 Олар бошадыландан соң, бейлеки шәгиртлериң янына бардылар ве улы руханылар билен яшулуларың айданларыны гүррүң бердилер. 24 Шәгиртлер муны эшиденлеринде, оларың әхлиси билеликде батлы сес билен Худая шейле дога этдилер:
«Эй Бейик Хөкүмдар, сен гөги, ери, деңзи ве ондакы әхли затлары яратдың. 25 Сен мукаддес рухуң билен өз гуллукчың болан атамыз Давут аркалы шейле дийдиң: „Миллетлер нәме үчин ховсала дүшдүлер, халклар нәме үчин бош затларың пикирини эдйәрлер? 26 Ер йүзүниң патышалары аяга галдылар, хөкүмдарлар Ехова* хем-де онуң Месихине гаршы йыгнандылар“. 27 Догрудан-да, Хиродес* билен Понтиус Пилатус башга халкларың адамлары ве ысрайыл халкы билен биле шу шәхерде йыгнанып, сениң месх эден мукаддес гуллукчыңа гаршы чыкдылар. 28 Бу затлар сениң ыгтыярың билен, өңүнден айдышың ялы, сениң ислегиңе гөрә болды. 29 Инди болса, Ехова*, оларың хайбат атышына үнс бер ве өз гулларыңа сөзүңи батыргайлык билен вагыз этмәге көмек эт. 30 Сагалтмак үчин гүйч бермегиңи ве мукаддес гуллукчың Исаның ады билен аламатлардыр гудратлар гөркезмегиңи довам эт».
31 Шәгиртлер гызгын дога эденлеринде, оларың отуран өйи сарсды ве әхлиси мукаддес рухдан долуп, Худайың сөзүни батыргайлык билен вагыз эдип башладылар.
32 Иман эденлериң көпүси бир җан*, бир тенди*. Олар хатда затларыны өзүниңки хасапламаярдылар, гайтам, олары башгалар билен пайлашярдылар. 33 Ресуллар болса Халыпамыз Исаның дирелиши хакда өкделик билен шаятлык этмегини довам эдйәрдилер, Худай хем олара мерхеметини боллук билен эчйәрди. 34 Догрудан-да, олар хич зада мәтәч дәлдилер. Себәби әхлиси меллеклерини я-да өйлерини сатып, алан гирдеҗисини 35 ресуллара гетирип берйәрдилер. Олар хем пуллары хер кимиң зерурлыгына гөрә пайлаярдылар. 36 Ресулларың арасында Барнабас («Гөвүнлик оглы» диймеги аңладяр) дийип таналян аслы кипрли Юсуп атлы бир левили барды. 37 Ол хем меллегиниң бир бөлегини сатып, пулуны ресуллара гетирип берди.