Ресулларың ишлери
8 Стефанус өлдүриленде, Савул муны макуллапды.
Шол гүн Иерусалимдәки йыгнаклара гаршы айылганч ызарланмалар башланды. Ресуллардан башга шәгиртлериң әхлиси Яхуда ве Самария даргадылар. 2 Худайхон адамлар Стефанусы алып җайладылар ве онуң үчин улы яс тутдулар. 3 Савул болса йыгнаклара ёвуз дарашып башлады. Ол өйме-өй гирип, эркекдир аяллары сүйрәп чыкарярды ве олары түрмә басярды.
4 Эмма шәгиртлер даргасалар-да, баран ерлеринде адамлара Худайың сөзи хакда хош хабары вагыз эдйәрдилер. 5 Филипус Самария шәхерине барып, Месих барада вагыз эдип башлады. 6 Мәреке Филипусың айдянларыны үнсли диңләп, гөркезйән аламатларыны сынлаярды. 7 Ол ерде биртопар җынлы адамлар барды. Җынлар адамлардан чыканда, гаты сес билен гыгырярдылар. Шейле-де энчеме ысмаз ве майып адамлар сагалярды. 8 Шәхериң адамлары бу затлара өрән бегенйәрдилер.
9 Шол шәхерде Симун атлы бир адам барды. Ол җадыгөйлик билен Самарияның халкыны хайран галдырып, өзүни бейик адам хасаплаярды. 10 Әхли адамлар, улудан-кичә бары оңа середип: «Бу адам Бейик Худайың Гүйҗүдир» дийишйәрдилер. 11 Олар җадыгөйлик билен эдилйән затлара хайран галып, бираз вагтлык онуң ызына эердилер. 12 Эмма Филипус гелип, Худайың Патышалыгы ве Иса Месихиң ады хакдакы хош хабары вагыз эденде, адамлар иман этдилер. Шонда эркекдир аяллар сува чүмдүрилдилер. 13 Симуның өзи-де Исаның шәгирди болды. Ол сува чүмдүриленден соң, Филипусың янындан айрылмаярды; онуң гөркезйән аламатларына ве улы гудратлы ишлерине хайран галярды.
14 Иерусалимдәки ресуллар Самарияның халкының Худайың сөзүни кабул эдендигини эшиденлеринде, ол ере Петрус билен Яхяны угратдылар. 15 Ресуллар барып, оларың мукаддес рухы алмаклары үчин дога этдилер. 16 Себәби олар Халыпамыз Исаның ады билен сува чүмдүрилселер-де, хениз мукаддес рухы алмандылар. 17 Соңра оларың үстүне эллерини гоянларында, олара мукаддес рух инди.
18 Симун ресулларың эллериниң гоюлмагы аркалы рухуң инйәндигини гөренде, олара пул хөдүрләп: 19 «Адамларың үстүне элими гоянымда, олар мукаддес рух алар ялы, маңа-да шейле ыгтыяр бериң» дийди. 20 Эмма Петрус оңа шейле җогап берди: «Пулуң өзүң билен биле хеләк болсун. Себәби сен Худайың җомартлык билен берйән рухуны* пула сатын аларын өйтдүң. 21 Худайың назарында йүрегиң пәк болмандыгы үчин, сениң бу ишде хич хили пайың болмаз. 22 Шонуң үчин тоба эт ве эрбет ёлуңдан дәнип, Ехова* ялбар. Белки, шонда ол сениң йүрегиңдәки эрбет пикирлери багышлар. 23 Гөрйән велин, сен зәхерден ве эрбетликден долы адам экениң». 24 Симун олара: «Айданларыңызың хич бири башыма инмез ялы, сиз мениң үчин Ехова* ялбарың» дийди.
25 Ресуллар шол ерде биркемсиз шаятлык этдилер ве Ехованың* сөзүни ыглан эденлеринден соң, Иерусалиме доланмак үчин ёла дүшдүлер. Олар ёл бойы самариялыларың энчеме обаларында хош хабары вагыз этдилер.
26 Ехованың* перишдеси Филипуса: «Тур-да, гүнорта тарапа, Иерусалимден Газа барян чөллүк ёла дүш» дийди. 27 Ол хем ёла дүшди. Гидип барярка, Эфиопияның аял патышасының* бүтин хазынасына гөзегчилик эдйән эфиопиялы бир везире* душды. Ол Иерусалиме Худая сежде этмек үчин гелипди, 28 хәзир болса өйүне гайдып барярды ве арабада Ишая пыгамбериң китабыны окап отырды. 29 Шонда мукаддес рух Филипуса: «Гит-де, арабаның янына бар» дийди. 30 Филипус арабаның янында ылгап барярка, везириң Ишая пыгамбериң китабыны окап отурандыгыны эшитди. Шонда ол: «Сен окаян затларыңа дүшүнйәрмиң?» дийип сорады. 31 Ол: «Эйсем, бири дүшүндирмесе, мен нәдип дүшүнейин?» дийди. Шонда ол Филипусдан араба мүнүп, янында отурмагы хайыш этди. 32 Везир шол вагт Язгыларың шу парчасыны окап отырды: «Оны гоюн кимин өлдүрмәге алып барярдылар. Ол гыркымчының өңүнде гузы кимин сесини чыкармаярды, агзыны-да ачмаярды. 33 Оны кемсидип, адалатсызлык этдилер. Онуң гелип чыкышы хакда ким гүррүң берсин? Себәби онуң җаны ер йүзүнден алыняр».
34 Соңра везир Филипусдан: «Айтсана, пыгамбер муны ким хакда айдяр? Өзи хакдамы я-да башга бири хакда?» дийип сорады. 35 Шонда Филипус Язгыларың шу еринден башлап, оңа Иса хакда хош хабары гүррүң берди. 36 Ёлда баряркалар, олар бир сувлы ере гелип етдилер. Шонда везир: «Ынха сув! Мениң сува чүмдүрилмегиме нәме пәсгел берйәр?» дийди. 37 *—— 38 Везир арабаны сакламагы буюрды, оларың икиси-де сува гирди ве Филипус оны сува чүмдүрди. 39 Олар сувдан чыканларында, Ехованың* рухы шол бада Филипусы алып гитди. Шондан соң везир оны гөрмеди ве шатлык билен ёлуны довам этди. 40 Филипус болса Ашдода етип, тә Кайсария барянча, ёл бойы хош хабары вагыз этди.