Ресулларың ишлери
3 Бир гүн Петрус билен Яхя дога эдилйән вагты, ягны сагат докузда* ыбадатхана гитдилер. 2 Шол вагт бир догабитди агсак адамы гетирдилер. Оны хер гүн ыбадатхана гелйән адамлардан пул диләр ялы, «Овадан» дийилйән дервезәниң өңүне гетирйәрдилер. 3 Ол Петрус билен Яхяның ыбадатхана гирип баряныны гөренде, олардан пул диләп башлады. 4 Петрус билен Яхя оңа ичгин серетдилер, шонда Петрус оңа: «Бизе серет» дийди. 5 Ол хем бир зат берерлер өйдүп, олара үнсли серетди. 6 Петрус оңа: «Мениң күмшүмем ёк, алтынымам. Йөне бар задымдан берейин: назаретли Иса Месихиң адындан саңа диййәрин, тур-да, йөре!» дийди. 7 Петрус агсак адамың саг элинден тутуп, оны еринден галдырды. Онуң аякларына ве топукларына шол бада гүйч гелди. 8 Ол бөкүп аягына галды-да, йөрәп башлады. Соңра олар билен биле ыбадатхана гирди ве йөрәп баршына, бөкҗекләп Худайы шөхратландырярды. 9 Хеммелер онуң йөрәп, Худайы шөхратландыряндыгыны гөрдүлер. 10 «Овадан» дийилйән дервезәниң өңүнде отурып, пул дилейән адамы тананларында, олар аңк-таңк болуп, доңуп галдылар.
11 Ол хенизем Петрус билен Яхяның янындан айрылман йөрди. Адамлар муңа дийсең хайран галып, оларың янына, ягны «Сүлейманың сүтүнлери» дийилйән ере ылгашып гелдилер. 12 Муны гөрен Петрус мәрекә йүзленип, шейле дийди: «Эй ысрайыллылар, биз агсак адамы хамала өз гүйҗүмиз я-да Худая вепалылыгымыз билен йөреден ялы нәме үчин хайран галып, бизе середйәрсиңиз? 13 Ата-бабаларымызың, ягны Ыбрайымың, Ысхагың ве Якубың Худайы өз Гуллукчысы Исаны шөхратландырды. Пилатус оны бошатмакчы болса-да, сиз ондан йүз өврүп, оны өлүме табшырдыңыз. 14 Сиз Пилатусдан ганхор адамы бошатмагы талап эдип, мукаддес ве догручыл адамдан йүз өвүрдиңиз. 15 Хава, сиз яшайыш берйән Баш Ёлбашчыны өлдүрдиңиз. Худай болса оны өлүмден дирелтди, биз муңа шаятдырыс. 16 Биз Исаның адына иман этдик, шол себәпли-де сизиң гөрйән ве билйән шу адамыңыз аяга галды. Сизиң өңүңизде дуран агсак адам бизиң иманымыз аркалы сагалды. 17 Доганлар, мен сизиң ве ёлбашчыларыңызың бу затлары билмән эдендиклерине дүшүнйәрин. 18 Худай буларың болҗакдыгыны пыгамберлери аркалы өңүнден айдыпды, шол себәпли оларың ерине етмеги үчин, Месихиң эҗир чекмегине ёл берди.
19 Шейлеликде, Ехова* гүнәлериңизи багышлап, сизе рахатлык берер* ялы, тоба эдиң ве яшайшыңызы үйтгедиң*. 20 Шонда ол сизиң үчин белленен Месих Исаны ёллар. 21 Худай әхли зады дикелтҗекдигини мукаддес пыгамберлери аркалы айдыпды. Шол дөвүр гелйәнчә, Иса гөкде гарашмалы. 22 Муса-да шейле дийипди: „Худайыңыз Ехова* сизиң араңыздан мениң ялы бир пыгамбер белләр. Сиз онуң әхли айдянларыны диңлемелисиңиз. 23 Эгер кимдир бири шол Пыгамбере гулак асмаса, Худай оны ёк эдер“. 24 Самувелден башлап шу гүнлере ченли пыгамберлериң әхлиси ол хакда ачык айдярдылар. 25 Сиз пыгамберлериң ве әхтиң огулларысыңыз. Худай сизиң ата-бабаларыңыз билен әхт баглашып, Ыбрайыма: „Сениң неслиң* аркалы ер йүзүндәки әхли машгалалар берекет алар“ дийди. 26 Худай өз Гуллукчысыны белләп, оны илки билен сизе иберди. Ол муны хер бириңизиң эрбет ишлерден дөнүп, берекет алмагыңыз үчин этди».