Еврейлер

8 Айтҗак болян эсасы пикиримиз шудур: Бизиң шейле баш руханымыз бар, ол гөкде Бейик Худайың тагтының саг тарапында отурандыр. 2 Ол хакыкы чадырың иң мукаддес еринде хызмат эдйән гуллукчыдыр. Бу чадыры адам дәл-де, Ехова* гурандыр. 3 Хер бир баш руханы совгатлары ве гурбанлары хөдүрлемек үчин белленендир; шоңа гөрә-де бу гуллукчы хем гурбан хөдүр этмелиди. 4 Эгер ол ер йүзүнде болан болсады, онда ол руханы болуп билмезди, себәби Кануна гөрә совгатлары хөдүрлейән адамлар эййәм беллененди. 5 Шол адамларың ерине етирйән мукаддес гуллугы гөкдәки затларың нусгасы ве көлегесиди. Муса хем чадыры гурмак бабатда гөркезме аланда, Худай оңа: «Сен әхли зады дагда гөркезен нусгам боюнча этмелисиң» дийипди. 6 Эмма Иса өңки руханылара гараныңда, хас аҗайып гуллуга эе болды, себәби ол хас говы әхтиң төвеллачысыдыр. Бу әхт өңкүден хем хас говы вадалара эсасланандыр.

7 Эгер биринҗи әхт кемсиз болан болсады, онда икинҗиси герек болмазды. 8 Себәби Худай ысрайыл халкындан кемчилик тапып, шейле сөзлери айтды: «Ехова* шейле диййәр: „Ине, шейле гүнлер етип гелйәр, мен ысрайыл огуллары ве Яхуда өйи билен тәзе әхт баглашарын. 9 Бу әхт оларың ата-бабаларының элинден тутуп, Мүсүр топрагындан алып чыкан гүнүм баглашан әхтим ялы дәлдир. Себәби олар мениң әхтиме вепалы галмадылар. Шонуң үчин хем мен оларың аладасыны этмегими бес этдим“ дийип, Ехова* айдяр.

10 Ехова* шейле диййәр: „Шол гүнлерден соң мен ысрайыл халкы билен әхт баглашарын. Канунларымы оларың аңларына гуюп, йүреклерине язарын. Мен оларың Худайы, олар хем мениң халкым болар.

11 Оларың хич бири гайдып илдешлерине ве доганларына: „Ехованы* танаң!“ дийип өвретмезлер. Себәби оларың улудан-кичә бары мени танарлар. 12 Мен олара эден эрбет ишлери үчин рехим эдерин ве оларың гүнәлерини гайдып ятламарын“».

13 Худай «тәзе әхт» диймек билен, өңкүсини көнелтди. Көне әхт гитдигиче көнелип, ёк эдилмәге якындыр.