Матта

22 Иса ене-де мысаллар аркалы өвредип, шейле дийди: 2 «Гөкдәки Патышалыгы* оглуны өерип, той тутян патыша меңзетсе болар. 3 Ол гулларыны иберип, той дабарасына адамлары чагырды, йөне чагырыланлар гелмек ислемеди. 4 Шонда ол башга гулларыны иберип: „Чагырыланлара айдың: Ине, мен гүнортанлык нахары тайярладым, өкүзлер ве иң говы маллар союлды, хемме зат тайын. Тоя гелиң“ дийди. 5 Эмма олар муңа бипервай гарап, бири өз меллегине, бейлекиси сөвда-сатык ишлерине гитди. 6 Галанлары болса гуллары енҗип өлдүрдилер.

7 Патышаның муңа җуда гахары гелди. Ол гошуныны иберип, олары өлдүрди ве шәхерини отлады. 8 Соңра ол гулларына шейле дийди: „Той тайяр, эмма чагырыланлар мынасып болмады. 9 Шонуң үчин гидиң-де, шәхериң улы ёлларына чыкып, хеммелери тоя чагырың“. 10 Олар хем улы ёллара чыкып, эрбет диймән, ягшы диймән, адамларың барыны чагырдылар. Шейдип, той җайы мыхмандан долды.

11 Патыша гелип, мыхманлара сын эденде, оларың арасында той эшигини геймедик бир адамы гөрди. 12 Шонда ол: „Достум, сен бу ере той эшигини геймән нәдип гирип билдиң?“ дийип сорады. Ол хич зат җогап бермеди. 13 Соңра патыша хызматкәрлерине: „Мунуң эл-аягыны даңып, гараңкылыга ташлаң. Ол ерде гөзяш дөкүп, алачсызлыкдан яңа дишини гыҗар“ дийди.

14 Хава, чагырыланлар көп, сайлананлар аздыр».

15 Соңра фарисейлер гидип, Исаны сөзүнде тутмак үчин өзара диллешдилер. 16 Олар шәгиртлерини Хиродесиң тарапдарлары* билен биле Исаның янына ибердилер. Олар хем гелип шейле дийдилер: «Мугаллым, биз сениң догручыл ве Худайың ёлуны хакыката лайык өвредйәндигиңи билйәрис. Сен адамлара яранҗак болмаярсың, оларың дереҗесине серетмейәрсиң. 17 Айтсана, сениң пикириңче, патыша* салгыт төлемек догрумы я-да ёк?» 18 Эмма Иса оларың эрбет пикирлерини билип: «Эй икийүзлүлер, сиз нәме үчин мени сынаярсыңыз? 19 Ханы, маңа бир динар* гөркезиң» дийди. Олар хем оңа бир динар бердилер. 20 Иса олардан: «Мунуң йүзүнде кимиң суратыны ве адыны гөрйәрсиңиз?» дийип сорады. 21 Олар хем: «Патышаның*» дийип җогап бердилер. Иса-да: «Онда патышаныңкыны патыша, Худайыңкыны Худая бериң» дийди. 22 Олар бу сөзлери эшидип, хайран галдылар ве онуң янындан гитдилер.

23 Бир гезек дирелише ынанмаян саддукейлер Исаның янына гелип, шейле дийдилер: 24 «Мугаллым, Мусаның айтмагына гөрә, „Эгер бир адамың чагалары болман дүнйәден өтсе, доганы онуң аялына өйленип, неслини довам этмели“. 25 Бизиң арамызда еди доган барды. Оларың биринҗиси өйленип, несил галдырман арадан чыкды. Соңра онуң аялына доганы өйленди. 26 Ол хем арадан чыкды, соңра онуң үчүнҗи ве әхли еди доганы билен хем шейле болды. 27 Ахырында, ол аял хем арадан чыкды. 28 Доганларың едиси-де оңа өйленипди. Инди дирелишде ол хайсысының аялы болар?»

29 Иса олара шейле җогап берди: «Сиз Язгылары-да, Худайың гүйҗүни-де билмән ялңышярсыңыз. 30 Себәби дирелишде не өйленерлер, не-де дурмуша чыкарлар, олар гөкдәки перишделер ялы боларлар. 31 Сиз Худайың дирелиш бабатда айданларыны окамадыңызмы? 32 Ол: „Мен Ыбрайымың Худайы, Ысхагың Худайы ве Якубың Худайы“ дийди. Хава, ол өлүлериң дәл-де, дирилериң Худайыдыр». 33 Бу сөзлери эшидип, мәреке онуң өвредишине хайран галды.

34 Фарисейлер Исаның саддукейлери геплемез ялы эдендигини эшидип, онуң янына билелешип бардылар. 35 Оларың арасындан кануны өкде билйән бири Исаны сынап: 36 «Мугаллым, Мусаның канунында иң ваҗып табшырык хайсы?» дийип сорады. 37 Ол хем шейле дийди: «„Ехова* Худайыңы бүтин йүрегиң, бүтин җаның* ве бүтин аң-дүшүнҗәң билен сөй“. 38 Бу биринҗи ве иң ваҗып табшырыкдыр. 39 Икинҗи табшырык хем шуңа меңзешдир: „Якыныңы өзүңи сөйшүң ялы сөй“. 40 Мусаның кануны ве пыгамберлериң сөзлери шу ики табшырыга эсасланяндыр».

41 Иса фарисейлериң хенизем дурандыгыны гөрүп, олардан: 42 «Сиз Месих барада нәме пикир эдйәрсиңиз? Ол кимиң оглы?» дийип сорады. Олар: «Давудың оглы» дийип җогап бердилер. 43 Иса олара шейле сораг берди: «Онда нәме үчин Давут мукаддес рухуң тәсири билен оңа „Халыпам“ дийди? 44 Ол шейле языпды: „Ехова* мениң Халыпама: „Душманларыңы аякларың астында гойянчам, саг тарапымда отур“ дийди“. 45 Эгер Давут Месихе Халыпам диен болса, онда ол нәдип онуң оглы боляр?» 46 Оларың хич бири муңа җогап берип билмеди. Шол гүнден башлап, оңа хич ким сораг бермәге милт этмеди.