Еврейлер

10 Себәби Мусаның кануны гелмели ягшы затларың өзи дәл-де, көлегесиди. Канун* хер йыл берилйән шол бир гурбанлар аркалы Худая сежде эдйәнлери кәмиллиге етирип билмеди. 2 Эгер берилйән гурбанлар олары кәмиллиге етирен болсады, онда гурбан бермек герек болмазды. Адамлар хем эден гүнәлери үчин өзлерини гүнәкәр дуймаздылар. 3 Эмма хер йыл берилйән гурбанлар олара гүнәлидигини ятладярды. 4 Себәби өкүзлериң ве гечилериң ганы билен гүнәлериң айрылмагы мүмкин дәлдир.

5 Месих ер йүзүне геленде, Худая шейле дийди: «„Сен мал гурбанларының ве башга гурбанларың берилмегини ислемедиң, гайтам, маңа бир беден тайярладың. 6 Сен бүтинлей якылян ве гүнә үчин берилйән гурбанлары халамадың“. 7 Соңра мен: „Ине, Язгыларда* мен хакда айдылышы ялы, эй Худайым, мен сениң ислегиңи берҗай этмек үчин гелдим“ дийдим». 8 Мусаның канунына гөрә ол гурбан гетирмек бабатда: «Сен мал гурбанларыны, башга-да берилйән гурбанлары, бүтинлей якылян ве гүнә үчин берилйән гурбанлары ислемедиң хем халамадың» диенден соң: 9 «Ине, мен сениң ислегиңи берҗай этмек үчин гелдим» диййәр. Ол икинҗи зады ёла гоймак үчин биринҗи затлары арадан айырды. 10 Худайың шу «ислегине» гөрә, биз Иса Месихиң бедениниң гурбан хөкмүнде бир гезекде хемишелик хөдүрленмеги билен мукаддес эдилдик.

11 Шейле-де руханылар хер гүн мукаддес гуллугы берҗай этмек хем-де гүнәни долы айрып билмейән шол бир гурбанлары гайта-гайта хөдүрлемек үчин өз дурмалы ерине барярды. 12 Эмма Иса гүнәлер үчин хемишелик бир гурбан хөдүрләп, Худайың саг тарапында отурды. 13 Соңра Худай онуң душманларыны аягының астына салянча гарашды. 14 Шейдип, ол хөдүрлән гурбаны аркалы мукаддес эдиленлери хемишелик кәмиллиге етирди. 15 Галыберсе-де, мукаддес рух бизе шейле шаятлык этди: 16 «Ехова* шейле диййәр: „Шол гүнлерден соң мен олар билен әхт баглашарын. Канунларымы оларың аңларына гуюп, йүреклерине язарын“». 17 Шейле-де: «Мен оларың гүнәлерини ве эден эрбет ишлерини гайдып ятламарын» дийилйәр. 18 Хава, гүнәлериң багышланан еринде олар үчин гурбан хөдүрлемек асла герек дәл.

19 Шонуң үчин хем, доганлар, биз Исаның ганы аркалы Иң мукаддес отага ынамлы гирип билйәндирис. 20 Ол тутының аңырсына гирмек билен, ягны өз бедени аркалы бизе яшайша элтйән тәзе ёлы ачып* берди. 21 Худайың халкының үстүнден гойлан бейик руханымыз бардыр. 22 Шол себәпли, гелиң, акйүрекден ве берк иман билен Худая якынлашалың. Себәби йүрегимизиң хапаланан ынсабы ган* сепилип арассаланандыр, беденимиз хем сув билен ювландыр. 23 Гелиң, умыдымыз хакда мундан бейләк-де икирҗиңленмән гүррүң бермәге җан эделиң. Себәби ваданы берен ынамдардыр. 24 Гелиң, бир-биримизе үнсли болуп, бирек-биреги сөймәге ве ягшы ишлери этмәге хөвеслендирелиң. 25 Кәбирлериниң эндик эдиши ялы, йыгнаклара совук-сала гарамалың, гайтам, бир-биримизи рухландыралың. Себәби биз ол гүнүң барха голайлашяндыгыны гөрйәндирис.

26 Эгер биз хакыкат барада догры билим алып-да, билгешлейин гүнә этсек, онда гүнәлеримиз үчин хөдүрленҗек башга гурбан ёкдур. 27 Гайтам, Худая гаршы чыкян адамлар үчин горкы билен гарашылян хөкүм бардыр ве олары гүйчли гахар-газап ювутҗакдыр. 28 Мусаның канунына боюн болмадык адам ики я-да үч шаядың гөркезмеси билен рехимсиз өлдүрилмелиди. 29 Сиз нәхили пикир эдйәрсиңиз? Эгер адам Худайың Оглуна хормат гоймаса, өзүни мукаддес эден әхт ганына адаты зат ялы гарап, оны әсгермезлик этсе ве Худайың мерхемет рухуна дил етирсе, онда ол хас улы җеза мынасып болмазмы нәме? 30 Себәби биз: «Арыңы алян мендирин; гайтаргысыны өзүм берерин» диен Худайы танаярыс. Шейле-де: «Ехова* өз халкыны хөкүм эдер» дийип язылгыдыр. 31 Хава, дири Худайың элине дүшмек дийсең элхенчдир.

32 Эмма хакыкат билимини аланыңыздан соң, энчеме кынчылыклара гарамаздан, агыр сөвеш алып барып, чыдамлылык гөркезен гүнлериңизи ядыңыза салың. 33 Кәте сизи сахна чыкаран ялы, көпчүлигиң өңүнде ёвуз дарашып масгаралаярдылар. Кәте болса шейле кынчылыклары башдан гечирйәнлериң дердини чекишйәрдиңиз. 34 Себәби сиз түрмедәки доганлара дуйгудашлык билдирдиңиз. Сиз хас говы ве эгсилмез мирасыңызың бардыгыны билйәндигиңиз үчин эмләгиңиз талананда, шатлыгыңызы йитирмедиңиз.

35 Шонуң үчин батыргайлык* билен вагыз этмегиңизи бес этмәң, себәби сизе улы сылаг гарашяндыр. 36 Шоңа гөрә-де Худайың ислегини берҗай эдениңизден соң, онуң вада эден задыны алар ялы, чыдамлы болуң. 37 Себәби энтек «бираз вагт» бар, «ол хөкман гелер, эгленмез». 38 «Эмма мениң вепалы гуллукчым иманы аркалы яшар». «Эгер ол ызына доланса, мен ондан разы болмарын». 39 Биз горкудан яңа ыза чекилип, ёк эдилҗек адамлардан дәл-де, иман аркалы җаныны халас этҗек адамлардандырыс.