Эфеслилер

2 Шейле-де сиз этмишлериңиз ве гүнәлериңиз зерарлы өлен болсаңыз-да, Худай сизи дирелтди. 2 Сиз бирмахаллар шу дүнйәдәки* адамлар ялы ве оларың үстүнден агалык эдйән хованың хөкүмдарының ислегине, ягны Худая гулак асмаян адамларда херекет эдйән гарайша* гөрә яшаярдыңыз. 3 Хава, бизиң әхлимиз бирвагтлар оларың арасында тен хөвеслерине эерип яшаярдык. Тенимизиң ве пикиримизиң ислегини берҗай эдип, догланымыздан бәри, башга адамлар ялы Худайың газабына сезевар болҗак чагалардык. 4 Йөне Худай рехимдарлыга байдыр, ол бизи җуда сөййәндир. 5 Шонуң үчин хем бизи Месих билен биле дирелтди. Хатда гүнәлеримиз зерарлы өлен болсак-да, бизе мерхемет эдип халас этди. 6 Шейле-де Худай бизи Месих Иса билен дирелдип, шәгиртлери хөкмүнде гөкде онуң янында отуртды. 7 Ол тәзе дүнйәде бизе Месихиң шәгиртлери хөкмүнде мерхеметини боллук билен гөркезип, ягшылык эдер.

8 Сиз шу мерхемет аркалы иманыңыз билен халас болдуңыз. Муңа өз тагаллаңыз билен етмедиңиз, бу Худайың совгадыдыр. 9 Хава, сиз муны эден ишлериңиз билен газанмадыңыз. Шонуң үчин хем хич кимде өвүнмәге себәп ёкдур. 10 Биз Худайың эллериниң ишлеридирис ве Месих Исаның шәгиртлери хөкмүнде ягшы ишлери этмек үчин ярадыландырыс. Худай бизиң шейле болмагымызы өңүнден кесгитләпди.

11 Шонуң үчин сиз ехуды дәл-де, башга халкдан боландыгыңызы унутмаң. Ынсан тарапындан сүннетленен адамлар сизе «сүннетленмедик» диййәрдилер. 12 Шол вагтлар сиз Месихи танамаярдыңыз, ысрайыл халкындан дәлдиңиз, вада эдилен әхтлере-де дегишли дәлдиңиз; сиз шу дүнйәде умытсыз ве Худайсыз яшаярдыңыз. 13 Эмма өң сиз Худайдан узакда болсаңыз-да, инди Месих Исаның шәгиртлерисиңиз ве Месихиң ганы аркалы Оңа якынлашдыңыз. 14 Себәби Месих бизе парахатлык гетирди. Ол ики топары бирлешдирип, оларың арасында бөвет болуп дуран дивары* юмурды. 15 Ол өз өлүми* аркалы душманчылыгы айырды ве Мусаның канунындакы табшырыклары ятырды. Шейдип, ики топары бирлешдирип, бир тәзе топар* дөретди ве олара парахатлыгыны берди. 16 Ол җебир пүрси* аркалы олары Худай билен ярашдырып, ики топары бир беден этмек үчин өз өлүми билен душманчылыгы арадан айырды. 17 Ол гелип, сизе, ягны Худайы танамаянлара ве танаянлара парахатлык барадакы хош хабары ыглан этди. 18 Ине, шонуң үчин хем онуң өлүми аркалы ики топардан болан адамлар, ягны бизиң әхлимиз Ата бөкденчсиз дога эдип билйәрис. Себәби хеммәмиз шол бир мукаддес рухы аландырыс.

19 Инди сиз ят ве гелмишек дәлсиңиз, гайтам, мукаддеслер ялы раятсыңыз хем-де Худайың машгала агзаларысыңыз. 20 Сиз ресуллардан ве пыгамберлерден ыбарат болан дүйбүң үстүнде гурулдыңыз. Месих Иса болса шол дүйбүң эсасы дашыдыр*. 21 Тутуш бина Месих билен бирликдедир ве бинаның галан бөлеклери билен өзара багланышып, Ехованың* мукаддес ыбадатханасыны дүзйәндир. 22 Сиз хем Месих билен бирликде боландыгыңыз үчин, Худай месген тутян еринде сизи башгалар билен бирлешдирди, себәби ол ерде онуң рухы яшаяр.