Ресулларың ишлери
17 Павлус билен Силас Амфиполис ве Аполониядан гечип, Селаник шәхерине гелдилер. Ол ерде ехудыларың синагогасы барды. 2 Павлус эндигине гөрә синагога барып, хер Сабат гүни* үч хепделәп Язгылар эсасында адамлар билен пикир алшарды. 3 Ол адамлара Месихиң эҗир чекип, өлүмден дирелмелидигини Язгылар аркалы дүшүндирип, субут эдйәрди. Павлус: «Мениң сизе вагыз эдйән Исам — Месихдир» диййәрди. 4 Нетиҗеде, кәбир адамлар Исаның шәгирди болуп, Павлус билен Силаса гошулдылар. Оларың арасында Худая сежде эдйән көп греклер ве бирнәче абрайлы аяллар хем барды.
5 Эмма ехудылар гөриплик эдип, базарда ишсиз отуран биргиден эрбет адамлары йыгнап, тутуш шәхери галагоплыга салдылар. Олар Павлус билен Силасы мәрекәниң өңүне чыкармак максады билен, Ясоның өйүне күрсәп гирдилер. 6 Эмма олары тапмансоңлар, Ясоны ве башга-да кәбир доганлары шәхер ёлбашчыларының янына элтип, шейле дийдилер: «Бүтин ер йүзүни булашдырып йөрен адамлар шу ере-де гелдилер. 7 Ясон болса олары өйүне мыхман алды. Буларың бары Сезарың* буйругына гаршы чыкярлар ве Иса диен башга бир патыша бар диййәрлер». 8 Муны эшидип, бүтин мәреке ве шәхер ёлбашчылары ховсала дүшдүлер. 9 Соңра Ясондан ве башгалардан етерликли дереҗеде гирев алып, олары гойбердилер.
10 Гүн яшан бадына, доганлар Павлус билен Силасы Верия угратдылар. Олар шол ере барып, ехудыларың синагогасына гирдилер. 11 Верия шәхериниң адамлары селаниклилерден хас дүшүнҗелиди. Себәби олар Худайың сөзүни хөвес билен кабул этдилер ве эшидйән затларының хакыкатдыгыны хер гүн Язгылар эсасында барлаярдылар. 12 Шейдип, оларың көпүси, шол санда абрайлы грек аяллар ве башга-да кәбир адамлар Исаның шәгирди болдулар. 13 Йөне Селаникдәки ехудылар Павлусың Худайың сөзүни Верияда хем вагыз эдйәндигини билип, мәрекәни олара гаршы өҗүкдирмек үчин гелдилер. 14 Шонда доганлар Павлусы деррев деңзиң кенарына ёлладылар, йөне Силас билен Тимотеос гитмән, ол ерде галдылар. 15 Павлусың яны билен гиден доганлар оны Афины шәхерине элтип, ызларына доландылар. Павлус олар аркалы Силас билен Тимотеосың мүмкин болдугындан чалтрак гелмегини табшырды.
16 Павлус олара Афиныда гарашярка, шәхериң бутлардан долудыгыны гөрүп, дийсең гахары гелди. 17 Шонуң үчин ол синагогада ехудылар ве Худая сежде эдйән бейлеки адамлар билен хем-де базарда хер гүн душ гелйәнлер билен пикир алышярды. 18 Эмма кәбир эпикурчы* ве стоик* философлары онуң билен җеделлешип башладылар. Оларың кәбири: «Бу яңра нәме дийҗек боляр-ай?» дийсе, башгалары: «Ол өзге таңрыларың вагызчысы өйдйән» диййәрди. Себәби Павлус Иса барадакы хош хабары ве дирелиш хакда вагыз эдйәрди. 19 Шонда олар Павлусы Арес* депесине элтип: «Өвредйән тәзе диниң барада бизе-де гүррүң берип билермиң? 20 Сениң гүррүң берйән кәбир затларың бизиң гулагымыза гең болуп эшидилйәр, шонуң үчин биз олар барада билесимиз гелйәр» дийдилер. 21 Аслында, афинылыларың әхлиси ве башга ерден геленлер хич иш билен мешгулланман, бош вагтларыны шол ерде гечирердилер. Олар бир-бирине нәмедир бир затлары гүррүң берип, тәзе затлары диңләрдилер. 22 Павлус Арес депесиниң ортарасында дурды-да, шейле дийди:
«Эй афинылылар, гөрйән велин, сиз өрән худайхон ве башгалара гараныңда, таңрылардан дийсең горкян адамлар экениңиз. 23 Мен шәхерде айланып, сизиң сежде эдйән ерлериңизе үнсли сын эденимде, гурбанлык сыпаларыңызың биринде „Нәбелли Худайың сыпасы“ дийлен язгыны гөрдүм. Мен сизиң танамасаңыз-да сежде эдйән шол Худайыңыз хакда вагыз эдйәрин. 24 Дүнйәни ве ондакы затлары ярадан, гөгүң хем ериң Эеси болан Худай ынсан эллери билен ясалан ыбадатханаларда яшамаяр. 25 Ол ынсан эллериниң хызматына мәтәч хем дәл, чүнки әхли адамлара яшайшы, деми ве хемме затлары Онуң өзи берйәр. 26 Ол бир адам аркалы әхли миллетлери дөретди ве олары бүтин ер йүзүнде яшар ялы этди. Шейле-де мөвсүмлери белләп, адамларың яшаҗак ерлерине чәк гойды. 27 Худай адамларың Оны агтармакларыны, сермеләп тапмакларыны ислейәр. Аслында, ол бизиң хич биримизден узакда дәлдир. 28 Себәби биз ол аркалы яшаярыс, херекет эдйәрис ве бардырыс. Сизиң кәбир шахырларыңыз-да: „Биз хем онуң чагаларыдырыс*“ дийипдирлер.
29 Хава, биз Худайың чагаларыдырыс. Шол себәпли Худая ынсаның алтындан, күмүшден я-да дашдан ясан ве беҗерен шекилидир өйтмели дәл. 30 Догрудан-да, Худай адамларың бипервайлык эден дөврүне гөз юмды, эмма хәзир ол хеммелери тоба этмәге чагыряр. 31 Себәби Худай өз сайлан адамы аркалы ер йүзүниң әхли яшайҗыларыны адалатлы хөкүм этмек үчин бир гүн белледи. Худай муны этҗекдигини оны өлүмден дирелдип, әхли адамлара кепил гечди».
32 Адамлар дирелиш хакда эшиденлеринде, кәбирлери онуң үстүнден гүлүп башладылар, башгалары болса: «Биз сени башга бир гүн диңләерис» дийдилер. 33 Павлус хем ол ерден гайтды. 34 Эмма кәбир адамлар Исаның шәгирди болдулар. Оларың арасында Арес депесиндәки казыетиң казысы Дионис, Дамария атлы бир аял ве башга-да адамлар барды.