Еврейлер

11 Иман — умыт эдйән затларымызың гелеҗекде, хакыкатдан-да, болҗакдыгына ынанмакдыр. Гөрүнмейән затлары хамала бар ялы* гөрүп билмекдир. 2 Ата-бабаларымызың шейле иманы боландыгы үчин, Худай олардан разыдыгына гүвә гечипди.

3 Биз дүнйәниң* Худайың сөзи билен ярадыландыгына* иман аркалы гөз етирйәрис. Хава, Худай гөрүнмейән затлары уланып, гөрүнйән затлары яратды.

4 Хабыл иман эдендиги үчин Худая Кабылыңкыдан-да хас говы гурбан хөдүрледи. Онуң догручыл боландыгына иманы аркалы шаятлык эдилди, себәби Худай онуң берен совгатларындан хошалды. Ол арадан чыкан болса-да, иманы аркалы хенизем геплейәндир.

5 Ханок иман эдендиги үчин адаты өлүми датмады. Себәби Худай оны башга ере гечирди ве онуң җеседи тапылмады; ол башга ере гечирилмезден өң, Худай ондан разыдыгына гүвә гечипди. 6 Хава, адам иман этмесе, Худайың гөвнүнден туруп билйән дәлдир. Себәби Худая якынлашян адам онуң бардыгына ве оны йүрекден агтарянлары сылаглаҗакдыгына иман этмелидир.

7 Нух иман эдендиги үчин хениз гөрүнмейән затлар хакында Худайдан дуйдурыш алды ве Ондан горкуп, өй-ичерисини халас этмек үчин гәми гурды; ол иманы аркалы дүнйәни хөкүм этди ве иманы аркалы догручыл адам хасапланды.

8 Ыбрайым иман эдендиги үчин Худай оны чагыранда, гулак асып, мирас алмалы ерине гитмек үчин өз догдук меканыны терк этди; ол нирә баряндыгыны билмесе-де, чыкып гитди. 9 Ыбрайым иманы аркалы вада эдилен ят юртда гелмишек болуп яшады. Ол Ысхак ве Якуп билен чадырларда яшады, себәби олар хем шол бир ваданың мирасчыларыды. 10 Чүнки Ыбрайым гуруҗысы ве ярадыҗысы Худай болан берк эсаслы шәхере гарашярды.

11 Сара хем иман эдендиги үчин яшы бирчене етенем болса, гөврели* болар ялы, гүйч алды. Себәби ол вада берен Худайы ынамдар* хасаплаярды. 12 Шейдип, чагасы болмаҗак ялы болуп гөрүнйән* адамдан чагалар доглуп, гөкдәки йылдызлар ве деңзиң якасындакы чәгелер дей сансыз-саҗаксыз несил эмеле гелди.

13 Олар вада эдилен затларың берҗай болшуны яшан дөврүнде гөрмеселер-де, өлйәнчәлер иманда берк дурдулар; шол вадалары узакдан гөрүп, олара сабырсызлык билен гарашярдылар ве яшан юрдунда гелмишек хем-де вагтлайын яшайҗыдыкларыны ачык айдярдылар. 14 Шейдип, олар месген тутҗак ерлерини йүрекден гөзлейәндиклерини айдың гөркезйәрдилер. 15 Эгер олар чыкып гайдан ери барада элмыдама пикир эден болсадылар, онда ызларына доланмага мүмкинчилик тапардылар. 16 Эмма олар хас говы ере, ягны гөге дегишли зада ымтылярдылар. Шонуң үчин Худай өзүни оларың Худайы диймәге чекинмеди, себәби олар үчин бир шәхер тайярлапды.

17 Ыбрайым иман эдендиги үчин Худай оны сынанда, берлен вадалары йүрекден кабул эдип, еке-тәк оглы Ысхагы гурбан гетирҗек болды. Аслында, оны гурбан гетирди дийсе хем болар. 18 Ол өзүне: «Саңа вада берлен несил* Ысхакдан гелер» дийлен болса-да, шейле этди. 19 Себәби ол — Худай оглумы өлүмден дирелдип билер — дийип пикир этди, Худай хем онуң оглуны ызына гайдып берди. Бу вака гелеҗекде болҗак задың нусгасы болды.

20 Ысхак хем иман эдендиги үчин Якуп билен Эсава гелҗекки затлар бабатда пата берди.

21 Якуп иман эдендиги үчин өлүм яссыгында ятырка, Юсубың огулларына пата берди ве хасасына даянып, Худая сежде этди.

22 Юсуп иман эдендиги үчин өлмезинден өң, ысрайыл огулларының Мүсүрден чыкҗакдыгыны айдыпды ве сүңклерини алып чыкмагы табшырды.

23 Мусаның ата-энеси иман эдендиклери үчин доглан чагасыны үч айлап гизләп саклады. Себәби олар чаганың овадандыгыны гөрүп, патышаның буйругыны бозмакдан горкмадылар. 24 Муса иман эдендиги үчин улаланда, фараоның* гызының оглы дийилмекден йүз өвүрди. 25 Ол гүнәниң берйән вагтлайын леззетини аланындан Худайың халкы билен биле гөрги гөренини говы гөрди. 26 Муса Худайың Белләни* хөкмүнде масгара болмаклыгы Мүсүриң бүтин байлыгындан-да хас говы гөрди. Себәби ол үнсүни алҗак сылагына гөнүкдирипди. 27 Ол иман аркалы патышаның газабындан горкман, Мүсүри терк этди. Себәби ол гөрүнмез Худайы гөрйән ялы, иманда берк дурупды. 28 Ол иман эдендиги үчин Пасханы белледи ве Худайың перишдеси ысрайыллыларың новбахарларыны өлдүрмез* ялы, гапыларың сөелерине ган чалды.

29 Олар иман аркалы Гызыл деңзинден гуры ерден гечен ялы гечдилер. Мүсүрлилер хем гечҗек боланларында, сувда гарк болдулар.

30 Худайың халкы иман эдендиги үчин Эриханың дашындан еди гүн айланды. Шонда онуң диварлары юмрулды. 31 Бозук аял Рахав хем иман эдендиги үчин гулак асмадык адамлар билен биле хеләк болмады. Себәби ол ичалылары мәхирли кабул этди.

32 Мундан артык нәме диейин? Эйсем, Гидеон, Барак, Шимшон, Ефтах, Давут, Самувел ве башга пыгамберлер барада гүррүң бермәге вагтым етмесе герек. 33 Олар иман аркалы патышалары еңдилер, догрулыгыны иш йүзүнде гөркездилер, Худайың вадаларына эе болдулар, ёлбарсларың агзыны багладылар, 34 одуң ялны олара зыян етирип билмеди, йити гылычдан гутулдылар, эҗизлер гүйчли болдулар, айгытлы сөвеш алып бардылар, эсгерлерден үстүн чыкдылар. 35 Аялларың өлен чагалары дирелди, башга адамлар болса хас говы дирелиши алмак үчин азат болмакдан йүз өврүп, эҗир чекмеги макул билдилер. 36 Хава, башгалар болса үстлеринден гүлүнмек ве гамчыланмак* ялы кынчылыклара дөз гелдилер. Хатда олары зынҗырлара баглап, түрмә басдылар. 37 Олары дашладылар, гынадылар, бычгыладылар, гылычдан гечирдилер. Мәтәчлик ве кынчылык чекенлеринде, олара ёвуз дарашанларында, гоюндыр гечилериң дерисине гейнип гезйәрдилер. 38 Дүнйә шейле адамлара мынасып дәлди. Олар чөллерде, дагларда, говакларда ве чукурларда сергездан болярдылар.

39 Олар иман эдендиклери үчин говы шаятлык алан болсалар-да, берлен вадалара говушмадылар. 40 Олар бизсиз кәмиллиге етмесин дийип, Худай бизиң үчин хас говы затлары тайярлап гойды.