2 Тимотеос

4 Мен Худайың ве Месих Исаның өңүнде саңа берк табшырык берйәрин. Иса Месих гелеҗекде өз Патышалыгы ве аян болмагы билен дирилери хем өлүлери хөкүм эдер. 2 Шоңа гөрә-де Худайың сөзүни вагыз эт; оны аматлы вагтда-да, кын дөвүрде-де ыхласлы берҗай эт; кәе, берк дуйдур, өвүт-үндев бер, булары эдениңде, элмыдама сабырлы бол ве өкделик билен өврет. 3 Себәби адамларың сагдын* таглыматы диңлемән, өз хөвеслерине эерҗек дөври гелер. Олар гулакларына якян затлары гүррүң берҗек мугаллымлары дашына үйшүрерлер. 4 Хакыкатдан гулагыны совуп, роваятлары диңләрлер. 5 Сен велин әхли затда сагдын пикирлен, кынчылыклара чыда, хош хабары хемише вагыз эдип, гуллугыңы биркемсиз ерине етир.

6 Себәби мен гурбанлык сыпасына* ичги гурбаны кимин эййәм дөкүлйәрин*, дүнйәден өтмели вагтым хем голайлашяр. 7 Мен гайдувсыз гөреш алып бардым, ярышың соңуна ченли ылгадым, иманымы горадым. 8 Хәзир болса догрулыгың казысы болан Халыпамыз маңа догрулык тәҗини бермәге тайяр. Ол оны маңа хөкүм гүни берер. Шейле тәч диңе маңа дәл, эйсем, онуң аян болмагына гарашянларың әхлисине берлер.

9 Яныма чалтрак гелҗек бол. 10 Себәби Димас хәзирки дүнйәни* сөййәнлиги үчин мени ташлап Селаниге гитди. Крискис Галатя, Титус болса Далматия гитди. 11 Янымда диңе Лука галды. Шонуң үчин Маркусы алып гайт. Ол гуллугымда көмек эдер. 12 Мен Тихиги Эфесе угратдым. 13 Троасда Карпларда гоюп гайдан гыш эшигими ве голязмалары, эсасан-да, дериден ясаланларыны* алып гайт.

14 Мис уссасы Исгендер маңа кән яманлык этди. Ехова* оңа этмишлери үчин гайтаргы берер. 15 Сен хем ондан өзүңи горамалысың, себәби ол бизиң хабарымыза гүйчли гаршы чыкды.

16 Мен өзүми илкинҗи сапар горанымда, тарапымы тутан болмады, гайтам, хеммеси мени ташлап гитди. Худай мунуң хасабыны олардан сорамасын. 17 Эмма вагыз иши мен аркалы долы берҗай болуп, әхли халклар эшидер ялы, Халыпамыз маңа көмек этди ве гүйч берди. Шейдип, мен ёлбарсың агзындан халас болдум. 18 Халыпамыз мени әхли эрбетликден горар ве гөкдәки Патышалыгы үчин халас эдер. Оңа бакы ве эбеди шөхрат болсун. Омын.

19 Приска* билен Акила ве Онисифорың өй-ичерисине салам айт.

20 Эрастос Коринфде галды, эмма Трофими сыркавландыгы үчин Милетде гоюп гайтдым. 21 Гыш дүшмәнкә гелҗек бол.

Евул, Пуденс, Линус, Клавдия ве әхли доганлар салам айдяр.

22 Доганлар, догры гарайшыңыз үчин, гой, Халыпамыз сизе мерхемет этсин. Омын.