1 Петрус

5 Шейлеликде, мен Месихиң гөргүлериниң шаяды, онуң аян болмалы шөхратының шәриги ве яшулы хөкмүнде сизиң араңыздакы яшулулара* йүзленйәрин*. 2 Өзүңизе ынанылан Худайың сүрүсини бакың. Худайың өңүнде олара меҗбурлык билен дәл-де, мейлетинлик билен гөзегчилик эдиң*; харам газанч үчин дәл-де, хөвес билен гуллук эдиң. 3 Худайың мүлкүниң үстүнден агалык этмән, гайтам, сүрә гөрелде болуң. 4 Шонда баш чопан геленде, сиз солмаҗак шөхратлы тәҗе эе боларсыңыз.

5 Шонуң ялы-да, яшлар, өзүңизден улулара* табын болуң. Йөне хеммәңиз бирек-бирек билен песгөвүнли болуң*. Себәби Худай текепбирлере гаршы чыкяндыр, песгөвүнлилере болса мерхемет эдйәндир.

6 Шонуң үчин Худайың гүйчли эллериниң астында песгөвүнли болуң*, ол хем сизи өз вагтында бейгелдер. 7 Әхли йүкүңизи* онуң үстүне атың, себәби ол сизиң аладаңызы эдйәндир. 8 Хүшгәр болуң, хемише сагдын пикирлениң! Душманыңыз болан Иблис арлайҗы арслан кимин ювутҗагыны агтарып йөрендир. 9 Шонуң үчин оңа гаршы дуруң ве бүтин дүнйәдәки доганларыңызың* хем шейле кынчылыклары башдан гечирйәндигини билип, иманда берк дуруң. 10 Эмма бираз вагтлык азап чекениңизден соң, Месих билен бирликдедигиңиз үчин, сизи эбеди шөхратына чагыран ве мерхемете бай Худай сизе долы тәлим берер. Ол сизи беркидер, гүйчлендирер ве сарсмаҗак эсасың үстүнде гурар. 11 Гой, гүйч эбедилик онуңкы болсун. Омын.

12 Мен сизи рухландырмак ве Худайың сизе, хакыкатдан-да, мерхемет эдйәндигине йүрекден гүвә гечмек үчин вепалы доганымыз Силванус* аркалы бирки агыз хат яздым. Бу мерхемете берк япышың. 13 Сизиң ялы сайланан Вавилондакы аял* ве оглум Маркус сизе салам айдяр. 14 Бир-бириңизи сөйүң ве мәхирли* саламлашың.

Сизе, ягны Месих билен бирликде боланларың әхлисине парахатлык болсун.