Ресулларың ишлери
27 Фест бизи Италия гәмиде ибермек карарына геленде, Павлусы ве башга-да кәбир туссаглары Юлий атлы йүзбаша табшырдылар. Ол Августың* гошун бөлүминденди. 2 Биз Адрамитде гәмә мүнүп, Азия велаятының кенарякаларындан гечип гитдик. Янымызда Селаникден болан македониялы Аристархус хем барды. 3 Эртеси гүн биз Сидона барып етдик. Юлий Павлуса адамкәрчилик эдип, оны достларының янына гойберди ве оларың көмегинден пейдаланмага ругсат берди.
4 Ол ерден гәмә мүнүп, Киприң кенарякаларыны пеналап гитдик, себәби ел гаршымыза өвүсйәрди. 5 Соңра деңзиң җүммүши билен Киликия ве Памфилияның үстүнден гечип, Ликиядакы Мира гәми дуралгасына бардык. 6 Юлий Александриядан Италия гидйән гәмини тапып, бизи шоңа мүндүрди. 7 Энчеме гүн ювашлык билен йүзүп, зордан Книдоса гелдик. Ел өңе йүзмәге мүмкинчилик бермәнсоң, биз Салмонаның голайындакы Крити пеналап гитдик. 8 Кенары якалап, зордан Ласея шәхериниң голайында ерлешйән «Гөзел дуралгалар*» диен ере гелдик.
9 Арадан эсли вагт, хатда Гүнәден сапланма гүни* хем гечипди ве хәзир деңизде йүзмек ховплы боландыгы үчин, Павлус олара: 10 «Адамлар, инди ёлумызы довам этсек зыян чекерис. Диңе бир йүкүмизе ве гәмимизе зепер етмән, эйсем, өзүмиз хем хеләк боларыс» дийип маслахат берди. 11 Эмма йүзбашы Павлусың айданларыны диңлемегиң дерегине, сүрүҗи билен гәминиң хоҗайынына гулак асды. 12 Йөне гәми дуралгасы гышы гечирмәге аматлы дәлди. Шол себәпли көп адамлар башартса, Критиң демиргазык-гүндогар ве гүнорта-гүндогар тарапына бакып дуран Финикс гәми дуралгасына барып, гышы шол ерде гечирмекчидилер.
13 Гүнортадан мылайым шемал өвсенде, олар Финиксе барып билерис өйдүп, лабырлары чекип алдылар-да, Критиң кенарякалары билен ёла дүшдүлер. 14 Эмма бираз вагтдан демиргазык-гүндогардан гүйчли ел* турды. 15 Ел гәмини бүтинлей гуршап алды ве оңа гаршы йүзмек башартмансоң, биз гөрешмекден эл чекип, елиң угруна ковулдык. 16 Соңра Клавда дийилйән кичирәк аданы пеналап йүздүк, йөне гәминиң арка тарапындакы гайыга* эрк этмеги зордан башардык. 17 Шонда олар гайыгы галдырдылар-да, гәмини беркитмек үчин онуң дашыны даңып башладылар. Сиртде* сувуң сай* ерине дүшмекден горкуп, елкенлери дүшүрдилер-де, йүзмеги довам этдилер. 18 Елиң газаплы гүйҗемеси билен биз эйләк-бейләк чайканярдык. Шонуң үчин олар эртеси гүн гәминиң йүкүни еңледип башладылар. 19 Үчүнҗи гүни болса өз эллери билен гәминиң энҗамларыны зыңдылар.
20 Энчеме гүнләп гүн хем-де йылдызлар гөрүнмәндиги ве елиң гүйчли уруп дурандыгы үчин, биз дири галмак умыдымызы бүтинлей үздүк. 21 Адамлар көп вагтлап ийип-ичмәнсоңлар, Павлус еринден турды-да, шейле дийди: «Адамлар, эгер сиз мениң маслахатыма эерип, Критде галан болсаңыз, шейле зыян ве йитги чекмездиңиз. 22 Эмма батыргай болуң, себәби гәмиден башга хич бириңиз хеләк болмарсыңыз. 23 Гечен гиҗе мениң сежде эдйән ве мукаддес гуллугыны берҗай эдйән Худайым перишдесини иберип, 24 маңа: „Горкма, Павлус. Сен хөкман Сезарың өңүнде дурмалысың! Худай сениң яныңдакыларың әхлисини-де халас эдер“ дийди. 25 Шонуң үчин батыргай болуң, мен Худайың айдышы ялы этҗекдигине ынанярын. 26 Йөне биз хайсы-да болса бир ада барып дүшмелидирис».
27 Он дөрдүнҗи гүн дийленде, биз Адрия* деңзинде эйләк-бейләк ковлуп йөркәк, ярыгиҗе деңизчилер бир гуры ере голайландыкларыны аңдылар. 28 Олар сувуң чуңлугыны өлчәнлеринде, 36 метр* чыкды, ене бираз гечип өлчәнлеринде, 27 метр* экени. 29 Гая урулмакдан горкуп, олар дөрт лабыры-да ашак зыңдылар ве даңың атмагына сабырсызлык билен гарашдылар. 30 Эмма деңизчилер лабырлары деңзе ташламак баханасы билен гайыгы ашак дүшүрип гачҗак боланларында, 31 Павлус йүзбаша ве эсгерлере: «Эгер ол адамлар гәмиде галмасалар, сиз халас болуп билмерсиңиз» дийди. 32 Шонда эсгерлер гайыгың йүплерини кесип, оны ашак гойбердилер.
33 Даң атанда, Павлус хеммелери ийип-ичмәге чагырып, шейле дийди: «Сизиң биынҗалыкланып, хич зат иймән гарашып отурандыгыңыза шу гүн он дөрт гүн болды. 34 Шонуң үчин хайыш эдйәрин, ийип-ичсеңиз говы болар, чүнки хич бириңизиң сачыңызың бир тары-да гачмаз». 35 Соңра Павлус чөрек алды-да, хеммелериң өңүнде Худая миннетдарлык билдирди, оны бөлүшдирип иймәге башлады. 36 Шейлеликде, оларың хеммеси рухланып, ийип-ичип башладылар. 37 Гәмиде җеми 276 адам барды. 38 Ийип доянларындан соң, олар гәмини еңлетмек үчин бугдайы деңзе зыңдылар.
39 Гүн ягтыланда, олар кичирәк айлаглы бир кенар гөрдүлер, йөне онуң ниредигини билмедилер ве мүмкин болдугындан, гәмини шол кенара элтҗек болдулар. 40 Шейлеликде, олар лабырлары кесип, деңизде галдырдылар ве шол бир вагтың өзүнде күреклериң йүплерини чөздүлер-де, өңдәки елкени еле галдырып, кенара тарап уградылар. 41 Деңиз гәмини хер тарапдан урансоң, онуң бурны сувуң ялпак ерине дүшүп, гымылдап билмән галды. Толкунларың зарбына гәми бөлек-бөлек болуп даргап башлады. 42 Туссагларың хич бири сува бөкүп гачмаз ялы, эсгерлер олары өлдүрҗек болдулар. 43 Эмма йүзбашы муңа пәсгел берди, чүнки ол Павлусы халас этмекчиди. Ол йүзүп билйәнлере өңүрти деңзе бөкүп, кенара бармагы буюрды. 44 Галанларына болса тагталара ве гәми бөлеклерине япышып, оларың ызындан йүзмеги табшырды. Шейдип, оларың хеммеси халас болды.