Еврейлер

13 Бир-бириңизе мундан бейләк-де доганлык сөйгиңиз болсун. 2 Мыхмансөер болмагы* унутмаң, себәби кәбирлери өзлери-де билмән перишделери мыхман алдылар. 3 Туссагдакылары унутмаң, олары эдил өзүңиз туссаглыкда отуран ялы ятлаң. Гөрги гөрйәнлере өзүңиз* эҗир чекйән ялы гараң. 4 Гой, хеммелер ника хормат гойсун. Әр-аял бир-бирине икилик этмесин, себәби Худай ахлаксызлык* эдйән адамлары ве зынахорлары хөкүм эдер. 5 Яшайшыңызда пул сөйгүсине орун бермәң, бар задыңыза кайыл болуң, себәби Худай: «Мен сени хич хачан терк этмерин, сени асла ташламарын» диендир. 6 Шонуң үчин хем биз долы ынам билен: «Ехова* мениң көмекчимдир; мен горкмарын. Эйсем, адам маңа нәме эдип билсин?» диййәрис.

7 Худайың сөзүни өвредип, араңызда ёлбашчылык эдйән доганлары унутмаң. Оларың өзүни алып баршының говы нетиҗе берйәндиги хакда ойланып, иманларындан гөрелде алың.

8 Иса Месих дүйн хем, шу гүн хем, эбедилик шолдур. Ол үйтгейән дәлдир.

9 Дүрли-дүрли ве нәтаныш таглыматларың тәсирине дүшүп, ёлдан азашмаң. Йүрегиңизи иймит билен дәл-де, Худайың мерхемети аркалы беркидиң. Себәби иймите* даянянлара ол хич хили пейда гетирйән дәлдир.

10 Бизиң гурбанлык сыпамыз бардыр, йөне чадырда мукаддес гуллугы берҗай эдйәнлериң ондакы затлардан иймәге хакы ёкдур. 11 Баш руханы гүнәлер үчин хөдүрленйән малың ганыны алып, Иң мукаддес отага гирйәрди. Соңра гурбан гетирилен мал дүшелгәниң дашына чыкарылып якылярды. 12 Иса хем өз ганы аркалы адамлары мукаддес этмек үчин шәхериң дервезесиниң дашында эҗир чекипди. 13 Гелиң, биз хем дүшелгәниң дашына чыкып, Исаның ызына дүшелиң ве онуң чекен масгарачылыгыны чекелиң. 14 Себәби бу ерде бизиң хемишелик шәхеримиз ёкдур. Шонуң үчин гелҗекки шәхере йүрекден гарашалың. 15 Гелиң, Иса аркалы Худая элмыдама өвги гурбанларыны берелиң, ягны агзымыз билен онуң адыны хеммелере ыглан эделиң. 16 Галыберсе-де, ягшылык этмеги ве башгалар билен задыңызы пайлашмагы унутмаң. Себәби шейле гурбанлар Худая яраяндыр.

17 Ёлбашчылык эдйән доганлар сизиң җаныңыз хакда элмыдама алада эдйәрлер ве мунуң үчин хасабат берерлер. Шонуң үчин олара гулак асың ве табын болуң. Шонда олар борҗуны гам-гусса билен дәл-де, шатлык билен берҗай эдип билерлер. Ёгсам, бу сизе зыян етирер.

18 Бизиң үчин элмыдама дога эдиң, себәби биз ынсабымызың пәкдигине ынанярыс ве әхли затда өзүмизи догручыл алып бармак ислейәрис. 19 Эсасан-да, яныңыза тизрәк барып билер ялы, мениң үчин дога эдиң.

20 Гой, өз ганы аркалы эбеди әхти тассыклан ве гоюнларың бейик чопаны болан Халыпамыз Исаны өлүмден дирелден парахатлык Худайы 21 ислегини берҗай этмегиңиз үчин сизи әхли герекли затлар билен үпҗүн этсин. Ол сизи Иса Месих аркалы өзүне яраян затлары этмәге хөвеслендирйәр. Гой, Худая бакы ве эбеди шөхрат болсун. Омын.

22 Хәзир болса, доганлар, сабырлы болуп, шу рухландырыҗы сөзлере гулак асың, себәби сизе язан хатым гысгадыр. 23 Мен сизиң доганымыз Тимотеосың азатлыга чыкандыгыны билмегиңизи ислейәрин. Эгер ол тизден гелсе, биз сизи гөрмәге барарыс.

24 Сизе ёлбашчылык эдйәнлериң ве мукаддеслериң хеммесине салам айдың. Италияда яшаянлар хем сизе салам айдярлар.

25 Гой, Худайың мерхемети сизиң хеммәңиз билен болсун.