Римлилер
5 Биз иман аркалы догры хасапландык. Шол себәпли, гелиң, Халыпамыз Иса Месих аркалы Худай билен парахатлыгымызы саклалың. 2 Биз Месихе иман эдип, хәзирден Худайың мерхеметини газанярыс. Гелиң, шонуң үчин Худайың шөхратыны алмага умыт берлендигине бегенелиң. 3 Диңе мунуң үчин дәл, эйсем, кынчылыкларда хем шатланалың, себәби кынчылыклар чыдамлы болмагы өвредйәр; 4 чыдамлы болсак, Худайы разы эдип билерис; Худайы разы этсек, йүрекде умыт дөрейәр, 5 умыт болса гынандырян дәлдир, себәби бизе берлен мукаддес рух аркалы Худайың сөйгүси йүрегимизе гуйландыр.
6 Аслында, биз энтек гүнәликәк*, Месих белленен вагтда худайсыз адамлар үчин өлди. 7 Догры адам угрунда хич ким җаныны бермесе герек; йөне ягшы адам үчин кимдир бириниң өлмәге тайын болмагы-да мүмкин. 8 Эмма биз энтек гүнәликәк, Месих бизиң үчин өлди. Шейдип, Худай бизе болан сөйгүсини билдирди. 9 Худай бизи Месихиң ганы аркалы догры хасаплаян болса, онда биз Онуң газабындан халас болҗакдыгымыза хас-да ынамлы болуп билерис. 10 Эгер биз душманкак, Оглуның өлүми аркалы Худай билен ярашан болсак, онда Месихиң яшайшы аркалы халас болҗакдыгымыза хас-да ынамлы болуп билерис. 11 Диңе муңа дәл, эйсем, ярашмага ёл ачан Халыпамыз Иса Месих аркалы Худай билен якын гатнашыгымызың бардыгына бегенйәрис.
12 Шейлеликде, бир адам аркалы гүнәниң ве гүнә аркалы өлүмиң дүнйә гириши ялы, өлүм хем әхли адамлара гечди, себәби хеммелер гүнә этди. 13 Гүнә дүнйәде Канун берилмезден өң хем барды, эмма канун болмаса, эден гүнәси үчин хич кими айыплап болмаз. 14 Муңа гарамаздан, өлүм Адам атадан Муса ченли патыша кимин хөкүм сүрди. Ол хатда Адам атаныңкы ялы гүнә этмедик адамларың үстүнден хем хөкүм сүрйәрди. Аслында, Адам ата билен вада эдилен ынсаның арасында меңзешлик барды.
15 Эмма Худайың берйән совгады гүнәниң берйән нетиҗесинден тапавутланяр. Эгер бириниң гүнәси себәпли көп адамлар өлен болса, онда Худайың ве Иса Месихиң мерхемети билен берлен совгат көплере хас-да пейда гетирер. 16 Шейле-де берлен совгадың ве бир адамың эден гүнәсиниң нетиҗеси тапавутланяндыр. Себәби эдилен бир гүнә үчин әхли адамларың үстүнден хөкүм чыкарыляр, эмма энчеме гүнәлер үчин берлен совгат аркалы Худай көп адамлары догры хасаплаяр. 17 Эгер бир адамың гүнәси себәпли өлүм патыша кимин хөкүм сүрйән болса, онда бир адам, ягны Иса Месих аркалы адамларың яшап, патышалар хөкмүнде хөкүм сүрҗекдигине хас-да ынамлы болуп билерис. Себәби олар Худайың боллук билен берйән мерхеметине ве догры сайылмак совгадына эе болярлар.
18 Диймек, эдилен бир гүнә себәпли әхли адамлар язгарылян болса, онда бир ягшы иш аркалы-да әхли адамлар яшайыш үчин догры хасапланяр. 19 Бир адамың гулак асмазлыгы себәпли көплер гүнәли болан болса, онда бир адамың гулак асмагы билен хем көп адамлар догры хасапланды. 20 Адамларың көп гүнә эдйәндигини аян этмек үчин, Муса аркалы канун берилди. Эмма гүнәлериң көп еринде Худай хас-да көп мерхемет эдйәндир. 21 Нәме үчин? Гүнә билен өлүмиң патыша кимин хөкүм сүрши ялы, Худайың мерхемети хем патыша кимин хөкүм сүрсүн дийип эдилди. Шол себәпли адамлар догры хасапланып, Халыпамыз Иса Месих аркалы эбеди яшайша говшуп билйәр.