Римлилер
10 Доганлар, мен ысрайыллыларың халас болмагыны йүрекден ислейәрин, мунуң үчин Худая дилег эдйәрин. 2 Мен оларың Худайың гөвнүнден турмак ислейәндигине гүвә гечйәрин, йөне олар муны догры билиме лайык этмейәрлер. 3 Себәби олар Худайың догрулыгына дүшүнмедилер ве өз догрулыгыны тассыклаҗак болуп, Онуң догрулыгына табын болмадылар. 4 Кануның соңы Месихдир, шол себәпли оңа иман эден хер кес догрулыга етйәндир.
5 Мусаның догрулык бабатда язмагына гөрә: «Кануны берҗай эдйән адам яшар». 6 Эмма Язгыларда догры адам болмак үчин иман этмегиң хем ваҗыпдыгы айдыляр. Шейле-де онда: «„Ким гөге чыкар?“, ягны „Ким Месихи гөкден гетирер?“ 7 Я-да „Ким дүйпсүз чуңлуга инер?“, ягны „Ким Месихи өлүмден дирелтмек үчин дүйпсүз чуңлуга инер?“ дийип, ичиңден пикир этме» дийилйәр. 8 Эйсем, Язгыларда нәме дийилйәр? «Ол сөз сизиң яныңыздадыр, сизиң агзыңызда ве йүрегиңиздедир», ягны ол «сөз» бизиң вагыз эдйән хабарымыз болуп, адамдан иманы талап эдйәндир. 9 Эгер сиз Исаны Халыпамыз хөкмүнде агзыңыз билен вагыз эдип, йүрегиңизде Худайың оны өлүмден дирелдендигине иман этсеңиз, онда халас боларсыңыз. 10 Себәби догрулык үчин йүрек билен иман эдилйәндир, халас болмак үчин болса, агыз билен вагыз эдилйәндир.
11 Язгыларда: «Оңа иман эден адамың хич бири лапыкеч болмаз» дийилйәр. 12 Ехуды билен грегиң арасында тапавут ёкдур. Себәби хеммелериң Халыпасы* бирдир. Ол өзүни чагырянларың әхлисине җомартлык эдйәндир. 13 Чүнки «Ехованың* адыны чагыран хер бир адам халас болар». 14 Эмма олар иман этмедигини нәдип чагырсынлар? Эшитмедигине нәдип иман этсинлер? Вагыз эдилмесе нәдип эшитсинлер? 15 Иберилмеселер нәдип вагыз этсинлер? Себәби Язгыларда: «Ягшы затларың хош хабарыны ыглан эдйән вагызчыларың аяклары нәхили аҗайып!» дийип, язылгы ахырын.
16 Муңа гарамаздан, олар хош хабара гулак асмадылар. Ишая пыгамбер хем: «Ехова*, ким бизден эшиден задына иман этди?» дийипди. 17 Диймек, адам сөзи эшиденсоң иман эдйәндир. Сөзи болса кимдир бири Месих барада вагыз эденсоң эшидйәндир. 18 Эмма олар бу хабары эшитмедилерми? Элбетде, эшитдилер. Себәби «оны ер йүзүниң әхли яшайҗылары эшитди, хатда ол узак ердәкилере-де барып етди». 19 Эйсем, ысрайыллылар муны билмейәрмиди? Элбетде, билйәрди. Башда Муса: «Мен башга халклар аркалы сенде габанҗаңлыгы оярарын. Акылсыз халк аркалы сенде гүйчли гахар дөредерин» дийипди. 20 Эмма Ишая Худайың сөзүни батыргайлык билен ыглан эдип, шейле диййәр: «Мени агтармаянлар мени тапдылар; мени сорамаянлара өзүми аян этдим». 21 Ол ысрайыллылар хакда болса: «Мен гулак асмаян ве кесир халкы ызына доланмага хер гүн чагырярдым» диййәр.