Римлилер
2 Шейлеликде, эй башгалары язгарян адам, сен ким болсаң-да, өзүңи аклап билмерсиң. Сен башгалары язгарып, өзүңе хөкүм чыкарярсың, чүнки язгарылян ишлери өзүңем эдйәрсиң. 2 Биз Худайың шейле ишлери эдйән адамлары хакыката гөрә хөкүм этҗекдигини билйәрис.
3 Эмма сен шейле ишлери эдйән адамлара хөкүм чыкарып, өзүңем шол ишлери этсең, Худайың хөкүминден гачып гутуларын өйдйәрмиң? 4 Я-да сен Худайың чәксиз ягшылыгыны, сабырлылыгыны әсгермезлик эдйәрмиң? Онуң ягшылыгы саңа тоба этмәге мүмкинчилик берйәндигини билмейәрмисиң? 5 Йөне сен өз кесирлигиң ве тоба этмек ислемейәнлигиң себәпли, Худайың газабына сезевар боларсың. Ол газабыны хөкүм гүни аян эдип, адамлара адалатлы хөкүм чыкарар. 6 Худай хер бир адама эден ишине гөрә хакыны берер: 7 хемише* ягшы ишлери эдип, шөхрата, хормата ве солмаз яшайша ымтылян адамлар эбеди яшайша говшар. 8 Эмма давалашян, хакыката дәл-де, яманлыга гулак асян адамлар Худайың гахар-газабына сезевар боларлар. 9 Башгалара зыян етирйән ишлери эдйән адамлар — илки ехудылар, соңра греклер бетбагтчылыга ве кынчылыга учрарлар. 10 Йөне ягшылык эдйән адамлар — илки ехудылар, соңра греклер шөхрата, хормата ве парахатлыга эе болар. 11 Себәби Худай хич кими ала тутян дәлдир.
12 Гүнә эден адам Худайың кануныны билмесе-де, җезасыны алар, эмма Худайың кануныны билйән адам гүнә этсе, канун эсасында җезасыны алар. 13 Себәби Худайың өңүнде кануны диңлейәнлер дәл-де, оны берҗай эдйән адамлар догры хасапланяндыр. 14 Башга миллетдәки адамлар Худайың кануныны билмеселер-де, кануна лайык ишлери берҗай эдип, ягшыны ве яманы сайгарып билйәндигини гөркезйәрлер. 15 Олар эден ишлери үчин пикирлеринде өзлерини я гүнәкәрлейәрлер, я-да аклаярлар. Шейдип, олар канундакы принциплериң йүреклеринде языландыгыны гөркезйәрлер, хатда оларың ынсабы-да муңа шаятлык эдйәр. 16 Худай адамларың гизлинликде эдйән пикирлериниң ве ишлериниң үстүнден Месих Иса аркалы хөкүм чыкармага геленде, бу затлар аян болар. Мениң ыглан эдйән хош хабарым хем шу хакдадыр.
17 Сен ехуды болуп, кануна бил баглаян ве Худай билен достлугыңа өвүнйән болсаң, 18 Онуң ниетини билип, Мусаның канунында өвренен затларыңа чуңңур дүшүнйән болсаң, 19 көрлере ёл гөркезйәндигиңе, гараңкылыкда йөрейән адамлар үчин ягтылыкдыгыңа долы ынанян болсаң, 20 акылсызлары дүзедйән, чагаларың мугаллымы ве Худай барадакы билимиң хем-де Канунда Ол барада айдылян хакыкатың өзенине дүшүнйән болсаң, 21 онда башгалара өвредип, нәме үчин өзүңе өвретмейәрсиң? Башгалара «огурлама» дийип, нәме үчин өзүң огурлык эдйәрсиң? 22 «Зына этме» дийип, нәме үчин өзүң зына эдйәрсиң? Бутлары йигренйән болсаң, нәме үчин ыбадатханалары талаярсың? 23 Сен кануна буйсанян болсаң, нәме үчин кануны бозуп Худайы масгара эдйәрсиң? 24 Хава, «сиз себәпли башга халкларың арасында Худайың адына дил етирилйәр» дийип язылгыдыр.
25 Аслында, сүннетленмек диңе кануны берҗай эдйән болсаң пейдалыдыр. Йөне кануны бозсаң, сениң сүннетлилигиң сүннетсизлиге өврүлйәндир. 26 Шейлеликде, эгер сүннетленмедик адам Кануның талапларыны берҗай эдйән болса, онда Худай оны сүннетленен адам хасапламазмы нәме? 27 Эгер башга миллетдәки сүннетленмедик адам Кануны берҗай этсе, онда ол саңа, ягны сүннетленен ве кануна эе болуп-да, оны бозян адама хөкүм чыкаряндыр. 28 Өзүне «мен ехуды» диййән я-да сүннетленен адам ехуды дәлдир. 29 Себәби канун аркалы дәл-де, ичинден ве рух аркалы йүрегинде сүннетленен адам ехудыдыр. Шейле адамы ынсан дәл-де, Худай шөхрата эе эдйәндир.