Еврейлер
12 Бизи улы булут кимин гуршап алян шейле көп шаятларың бардыгы үчин, гелиң, эгнимиздәки хемме йүки ве аңсатлык билен чолашдырян гүнәни ташлап, өңүмизде гойлан ёлда чыдамлы ылгалың. 2 Үнсүмизи иманымызың Баш Ёлбашчысы ве Кәмиллешдириҗиси Иса гөнүкдирелиң. Себәби ол өңүнде гойлан шатлык үчин утанҗа галмалы болса-да, җебир пүрсүндәки* өлүме дөз гелди. Шейдип, ол Худайың тагтының саг тарапында отурды. 3 Догрудан-да, ядап рухдан дүшмез ялы, гелиң, гүнәкәрлериң өз-өзүне зыян етирип, душманчылык билен айдан сөзлерине чыдан адам хакда чуңңур ойланалың.
4 Гүнә гаршы сөвешде, сиз хениз ганыңыз дөкүлйәнчә гаршылык гөркезмедиңиз. 5 Сиз Худайың огуллары кимин берлен шу өвүт-үндеви бүтинлей унутдыңыз: «Оглум, Ехованың* тербиесине* бипервай гарама, ол сени дүзеденде рухдан дүшме; 6 себәби Ехова* сөййәнини тербиелейәндир, оглы хөкмүнде кабул эдйәнине хатда темми-де берйәндир*».
7 Гөрйән гөргүлериңизе тербие хөкмүнде гарап, чыдамлы болуң. Худай сизе өз огуллары кимин гараяндыр. Эйсем, оглуна тербие бермейән ата бармы нәме? 8 Эгер Худай сизи башгалара тербие бериши ялы тербиелемейән болса, онда сиз хакыкы огуллар дәл-де, никасыз доглан чагаларсыңыз. 9 Галыберсе-де, ынсан аталарымыз бизе өң тербие берйәрди, биз хем олара хормат гойярдык. Онда гөкдәки* Атамыза хас-да хөвес билен табын болуп яшамалы дәлми нәме? 10 Себәби ынсан аталарымыз ягшы хасаплаян затлары боюнча бизе аз вагтлык тербие берипдилер, эмма Худай муны бизиң пейдамыз үчин эдйәндир; ол бизиң өзи ялы мукаддес болмагымызы ислейәр. 11 Догрудан-да, темми берленде, ол башда шатлыклы дәл-де, гынанчлы болуп гөрүнйәндир; йөне шейдип тербие алан адам соңра догрулыгың парахатлык мивесини гетирйәндир.
12 Шонуң үчин говшан эллериңизи ве аякларыңызы беркидиң. 13 Бедениңизиң шикесли ери хас-да эрбетлешмән, гайтам, сагалар ялы, догры ёлдан йөремегиңизи довам эдиң. 14 Әхли адамлар билен парахат яшамага ве мукаддес болмага җан эдиң. Себәби мукаддес болмадык адам Халыпамызы* гөрүп билмез. 15 Араңыздан кынчылыклары дөредйән ве көплери хапалаян зәхерли көк чыкмаз ялы, сересап болуң, ёгсам Худайың мерхеметинден махрум боларсыңыз. 16 Араңызда ахлаксызлык* эдйән ве новбахарлык хакындан йүз өврүп, оны бир табак нахара чалшан Эсав ялы мукаддес затлары хапалаян адам болмасын. 17 Себәби сиз шуны билйәнсиңиз: Эсав соңра патаны мирас алмак ислесе-де, оңа берилмеди; ол какасының гелен карарыны үйтгетҗек болуп, нәче гөзяш дөксе-де, максадына етип билмеди.
18 Сиз от билен алавлап янян гөрнүп дуран дага, гара булуда, түм гараңкылыга ве апы-тупана голайлашан дәлсиңиз. 19 Сурнайың батлы сесини ве геплейәниң сөзлерини хем эшиден дәлсиңиз. Адамлар онуң сесини эшиденлеринде, гайдып геплемесин дийип ялбарыпдылар. 20 Себәби олар: «Хатда екеҗе хайван хем дага аяк басайса, дашланып өлдүрилмелидир» диен табшырыкдан җуда горкдулар. 21 Муса хем гөрен затларындан гаты горкуп: «Мен горкудан яңа титрейәрин» дийипди. 22 Эмма сиз Сион дагына, дири Худайың шәхери болан гөкдәки Иерусалиме ве он мүңлерче перишделериң йыгнанан ерине якынлашдыңыз. 23 Шейле-де атлары гөкде языланларың, ягны илкинҗи догланларың йыгнагына, хеммелериң Казысы болан Худая, мукаддес рухдан доглуп, кәмиллиге етен догруларың яшаян ерине, 24 тәзе әхтиң төвеллачысы болан Иса ве үстүмизе сепилен гана голайлашдыңыз. Бу ган Хабылың дөкүлен ганындан хем хас говудыр*.
25 Геплейәниң сесине совук-сала гарамакдан* әгә болуң. Эгер Худайың ер йүзүнде берен дуйдурышыны диңлемекден боюн гачыранлар җезадан гачып билмедик болса, онда Худай гөкден гепләнде, биз онуң сөзүнден йүз өвүрсек, җезадан асла гачып билмерис! 26 Шол вагт Худайың сеси ер йүзүни сарсдырыпды, эмма хәзир ол: «Мен ене бир гезек диңе ери дәл, эйсем, гөги хем сарсдырарын» дийип вада берди. 27 «Ене бир гезек» диен җүмле сарсдырылан затларың ёк эдилҗекдигини гөркезйәр, себәби Худай олары яратманды. Шонда сарсмадык затлар галып билер. 28 Биз сарсмаҗак Патышалыгы алҗакдыгымыз себәпли, гелиң, мундан бейләк хем Худайың мерхеметине эе болалың. Шонда биз ол аркалы горкы ве титреме билен Худая яраян мукаддес гуллугы берҗай эдип билерис. 29 Себәби бизиң Худайымыз якып ёк эдйән от киминдир.