Яхуда

1 Мен Иса Месихиң гулы ве Якубың доганы Яхуда, сайлананлара, Ата Худайымызың сөенлерине хем-де Иса Месих билен бирликде боландыклары үчин Худайың горанларына хат язярын.

2 Гой, Худайың мерхемети, парахатлыгы ве сөйгүси сизде артсын.

3 Эзиз доганларым, мен сизе гутулышымыз хакда язмак ислесем-де, мукаддеслере бир гезекде хемишелик берлен иман үчин гайдувсыз гөреш алып бармак хакында язмагы хас ваҗып сайдым. 4 Себәби Язгыларда өңден айдылышы ялы, хөкүм үчин белленен кәбир адамлар огрынча сизиң араңыза гирди. Бу худайсыз адамлар Худайымызың мерхеметини өз пейдасына уланып, хаясыз* ишлерини аклаярлар хем-де еке-тәк Хоҗайынымыз* ве Халыпамыз Иса Месихе бивепалык эдйәрлер.

5 Сиз буларың әхлисине долы дүшүнйән хем болсаңыз, мен сизе Ехованың* өз халкыны Мүсүрден алып чыкандыгыны, иман этмедиклери болса ёк эдендигини ятлатмак ислейәрин. 6 Худай илкибашдакы орнуны сакламадык ве өз яшаян ерлерини терк эден перишделери бейик хөкүм гүни гелйәнчә, хемишелик баглап, түм гараңкылыга ташлады. 7 Шонуң ялы-да Содом, Гоморра ве даш-төверекдәки шәхерлер йигренҗи ахлаксызлыга* берлип, азгын тен хөвеслерини канагатландырярдылар. Олар эбедилик от билен җезаландырылып, бизиң үчин сапак болдулар.

8 Муңа гарамаздан, бу адамлар хем өз арзув-хыялларына эерип, өзлериниң-де, башгаларың-да беденини хапалаярлар, ёлбашчылык эдйәнлери әсгермейәрлер, Худайың хорматлан адамларына сөгйәрлер. 9 Эмма баш перишде Микайыл Мусаның җеседи хакда Иблис билен җеделлешенде, оңа эрбет сөзлери айтмады, хөкүм чыкармады, гайтам: «Саңа Ехова* кәесин» дийди. 10 Бу адамлар болса дүшүнмейән затларына дил етирйәрлер, өзлерини хапалаярлар* ве акылсыз хайванлар ялы алып барярлар.

11 Оларың ягдайы өрән эрбетдир. Себәби олар Кабылың ёлуны сайладылар, сылаг алмак ислән Баламың ялңыш ёлуна дүшдүлер ве питнечи Корах ялы эрбет сөзлери айдандыклары үчин хеләк болдулар! 12 Олар сизиң отурышыкларыңыза геленлеринде-де, сувуң астында ятан гаялар* ялы ховплудыр, горкман өзлерини бакян чопанлардыр; ел билен эйләк-бейләк ковулян сувсуз булутлардыр; мивесини вагтында бермейән ве тутушлыгына гуран*, көки болмадык агачлардыр; 13 деңзиң гүйчли толкунларының көпүрҗиклери кимин оларың хаясыз ишлери гөрнүп дурандыр. Олар түм гараңкылыга эбедилик ташланҗак угурсыз йылдызлардыр.

14 Хава, Адам атадан гайдан единҗи несил Ханок хем олар хакда шейле пыгамберлик этди: «Ине, Ехова* энчеме* мукаддес перишделери билен гелди. 15 Ол әхли адамлары хөкүм эдер, худайсызлары залымлык билен эден эрбет ишлери үчин язгарар, худайсыз гүнәкәрлериң Оңа дил етирип, эден пис ишлерини паш эдер».

16 Бу адамлар бол яшайшындан нәгиле болуп игенйәрлер*, өз эрбет ислеглерине эерйәрлер ве күпүр гепләп өвүнйәрлер. Олар өз пейдасы үчин башгалара яранҗаңлык эдйәрлер.

17 Сиз болса, эзиз доганларым, Халыпамыз Иса Месихиң ресулларының айдан сөзлерини* ядыңыза салың. 18 Олар сизе шейле дийипди: «Соңкы гүнлерде худайсыз ишлери этмек үчин өз эрбет хөвеслерине эерйән яңсылайҗы адамлар болар». 19 Олар йыгнакда бөлүнишик дөредйән, Худайың рухы болмадык ве дүшүнҗесиз* адамлардыр. 20 Эзиз доганларым, сиз велин өзүңизи иң мукаддес иманыңыз аркалы беркидиң ве мукаддес рухуң тәсири билен дога эдиң. 21 Гөзүңизи эбеди яшайша дикип, Халыпамыз Иса Месихиң рехимдарлыгына гарашян вагтыңыз өзүңизи Худайың сөйгүсинде саклаң. 22 Шейле-де шүбхеленйәнлере рехимдар болуң. 23 Олары отдан чекип, өлүмден халас эдиң. Башгалара рехимдарлык этмегиңизи довам эдиң, йөне муны горкы ичинде эдиң, эрбет ишлер билен хапаланан эшиклери-де йигрениң.

24 Еке-тәк Халасгәр Худайымыз сизи бүдремекден горамагы ве шөхратлы хузурында улы шатлык билен айыпсыз сакламагы башаряндыр. 25 Халыпамыз Иса Месих аркалы гечмишден хәзире ченли хем-де бүтин гелеҗекде шөхрат, гудрат, гүйч, ыгтыяр Худайыңкы болсун. Омын.