Якуп
2 Доганларым, сиз шөхратлы Халыпамыз Иса Месихе иман эдйәрсиңиз, йөне шол бир вагтың өзүнде адамлары ала тутярсыңыз, шейле дәлми? 2 Айдалы, сизиң йыгнагыңыза ики адам гелйәр. Бири алтын йүзүкли ве гымматбаха эшикли, бейлекиси болса гарып хем-де көнелишен* эшикли. 3 Шонда сиз гымматбаха эшик геен адамы хорматлап: «Гелиң, төре гечиң», гарыба болса: «Сен дик дур» я-да «Гапының агзында отур*» диййән болсаңыз, 4 онда бир адамы бейлекиден ёкары сайып, эрбет карар чыкарян казылара меңземейәрмисиңиз?
5 Эзиз доганларым, диңләң. Худай бу дүнйәниң гарып сайян адамларыны сайлап, олары имана бай этди. Шейле-де Өзүни сөййәнлере вада бериши ялы, олары Патышалыгың мирасдарлары этмәге сайлады. 6 Йөне сиз гарыбы әсгермезлик эдйәрсиңиз. Эйсем, байлар сизе эзъет берип, казыете сүйрәп алып гитмейәрлерми? 7 Олар сизиң гөтерйән аҗайып адыңыза дил етирмейәрми нәме? 8 Эгер сиз Язгыларда айдылышы ялы, «Якыныңы өзүңи сөйшүң ялы сөй» диен патыша кануныны берҗай эдйән болсаңыз, ягшы эдйәрсиңиз. 9 Эмма адамлары ала тутян болсаңыз, гүнә эдйәрсиңиз ве гүнәкәрлер хөкмүнде канун тарапындан язгарылярсыңыз*.
10 Кимдир бири Кануның әхли табшырыкларыны берҗай эдип, бирисини бозян болса, ол онуң әхлисини бозяндыр. 11 Себәби «Зына этме» диен Худай «Адам өлдүрме» дийип хем айтды. Эгер сиз зына этмән, йөне адам өлдүрсеңиз, онда кануны бозярсыңыз. 12 Сизиң геплейшиңиз ве өзүңизи алып баршыңыз азатлык кануны боюнча хөкүм эдилҗек адамларыңкы ялы болсун. 13 Ким рехим этмесе, хөкүм чыкарыланда, онуң өзүне-де рехим эдилмез. Хава, рехимдарлык хөкүмден үстүн чыкяндыр.
14 Доганларым, кимдир бири Худая иман эдйәрин дийип-де, муны иш йүзүнде гөркезмесе нәме пейдасы бар? Хей-де, шейле иман оны халас эдерми? 15 Бир доганың я уяның геере эшиги*, я-да иере чөреги ёк болса, 16 сиз хем олара: «Саг-аман гидип, йылының ве ийип-ичип доюң» дийип-де, олара* герекли зады бермесе, мунуң нәме пейдасы бар? 17 Шонуң ялы-да иман хем иш йүзүнде гөркезилмесе өлүдир.
18 Эмма кимдир бири шейле дийип билер: «Сен иман эдйәрсиң, мен болса оны иш йүзүнде гөркезйәрин. Сен маңа ягшы ишлери болмадык иманыңы гөркез, мен болса саңа ягшы ишлери болан иманымы гөркезейин». 19 Сен Худайың еке-тәкдигине ынанярсың герек? Өрән говы. Йөне җынлар хем ынанярлар ве горкудан яңа сандырашярлар. 20 Эй акмак адам, сен иш йүзүнде гөркезилмейән иманың пейдасыздыгыны билмейәрмиң? 21 Атамыз Ыбрайым оглы Ысхагы гурбанлык сыпасына гоянсоң, догры адам хасапланмадымы нәме? 22 Үнс берен болсаңыз, ол иманыны иш йүзүнде гөркезди ве онуң иманы эден ишлери аркалы кәмиллешди. 23 Шонда Язгылардакы: «Ыбрайым Ехова* иман эдендиги үчин догры адам хасапланды» диен сөзлер берҗай болды. Шонуң үчин оңа Ехованың* досты дийилди.
24 Гөршүңиз ялы, адам диңе бир иман эдйәндиги үчин дәл, эйсем, иманыны иш йүзүнде гөркезйәндиги үчин догры хасапланяр. 25 Шонуң ялы-да бозук аял Рахав хем иберилен ичалылары мыхмансөерлик билен кабул эдип, соңра олары башга ёл билен угратды. Диңе шондан соң ол эден ишлери үчин догры адам хасапланмадымы нәме? 26 Догрудан-да, бедениң рухсуз* өли болшы ялы, иман хем иш йүзүнде гөркезилмесе өлүдир.