Римлилер
12 Шейлеликде, доганлар, Худайың рехимдарлыгы билен сизе ялбарярын: бедениңизи дири, мукаддес ве Худая ярамлы гурбан хөкмүнде хөдүрләң. Шонда сиз пикирленмек укыбыңызы уланып, мукаддес гуллугы берҗай эдип билерсиңиз. 2 Дүнйәниң* ишлерине эермегиңизи бес эдиң. Өзүңизи алып баршыңызы ве пикириңизи өзгердиң. Шонда Худайың ягшы, халаян ве кәмил ислегиниң нәмедигине дүшүнерсиңиз.
3 Худай мерхемети аркалы маңа ягшылык этди. Шонуң үчин мен сизе өзүңиз хакда ченденаша көп пикир этмезлигиңизи ве Худайың хер кесе берйән иманына гөрә сагдын дүшүнҗели болмагыңызы үндейәрин. 4 Бир беден көп агзалардан ыбаратдыр, йөне олар хер дүрли ишлери ерине етирйәндир. 5 Шонуң ялы биз хем көп болсак-да, Месих билен бирликде бир бедендирис ве бир-биримизе баглыдырыс. 6 Худай бизе мерхемети аркалы дүрли-дүрли укыплары берйәр. Пыгамберлик этмек укыбы берлен болса, гелиң, өзүмизе берлен иман аркалы пыгамберлик эделиң. 7 Эгер хызмат этмек берлен болса, хызмат эделиң; өвредйән адам өвретмегини довам этсин; 8 хөвеслендирйән адам хөвеслендирмегини, пайлаян адам хөвес билен бермегини, ёлбашчылык эдйән адам ыхлас билен ёлбашчылык этмегини, рехимдарлык эдйән адам оны шатлык билен этмегини довам этсин.
9 Сөйгиңиз икийүзли болмасын. Эрбетлиги йигренип, ягшылыга япышың. 10 Доганлык сөйгиңиз мәхирли болсун. Бирек-биреге хормат гоймага тайын болуң*. 11 Ялта дәл-де*, зәхметсөер* болуң. Рухда хыҗувлы болуң. Ехова* гул ялы хызмат эдиң. 12 Умытда шатланың. Кынчылыкларда чыдамлы болуң. Эрҗеллик билен дога эдиң. 13 Задыңызы мукаддеслериң зерурлыкларына гөрә пайлашың. Мыхмансөерлиги унутмаң. 14 Сизи ызарлаянлара гаргамаң, гайтам, Худайдан олара берекет диләң. 15 Шатланянлар билен шатланың; аглаянлар билен аглаң. 16 Башгалара өзүңизе гарайшыңыз ялы гараң. Өзүңиз барада хондан бәрси пикирде болмаң-да, гөвнүңизи пес тутуң. Өз гөзүңизде акылдар болмаң.
17 Яманлыга яманлык билен гайтаргы бермәң. Әхли адамлара ягшылык этмек үчин җан эдиң. 18 Мүмкин болдугындан, әхли адамлар билен парахат яшамак үчин элиңизде барыны эдиң. 19 Эзиз доганларым, өзүңиз үчин ар алмаң, гайтам, Худайың газабына ёл бериң. Чүнки: «Ехова* шейле диййәр: „Арыңы алян мендирин; гайтаргысыны өзүм берерин“» дийип язылгыдыр. 20 Йөне душманың ач болса, оны нахарла; сувсан болса, оңа ичере сув бер. Шейтсең, онуң башына гызгын көзлер гуярсың*. 21 Яманлыкдан еңилмәң-де, оны хемише ягшылык билен еңиң.