Ресулларың ишлери
28 Биз саг-аман кенара баранымызда, ол ериң Малта адасыдыгыны билдик. 2 Аданың яшайҗылары җуда адамкәрчиликли экен. Олар бизиң әхлимизи мәхирли гаршыладылар ве от якып бердилер, себәби ягыш ягып дурды, хова-да совукды. 3 Павлус чөплән одунларыны ода ташланда, одуң ховрундан бир зәхерли йылан чыкды-да, онуң элине япышды. 4 Ерли яшайҗылар Павлусың элине япышан йыланы гөрүп, өз араларында: «Бу адам ганхор болмалы. Себәби ол деңизден халас болса-да, Адалатың* өлүм җезасындан сыпып билмеди» дийишдилер. 5 Эмма Павлус элини силкди-де, йыланы ода ташлады ве оңа хич хили зыян етмеди. 6 Адамлар онуң хәзир бир ери чишип, тарпа-тайын өлер өйтдүлер. Көп вагт гарашанларындан соң, оңа хич зат болмандыгыны гөрүп, пикирини үйтгетдилер ве оңа таңры дийип башладылар.
7 Шол төверекде ада ёлбашчылык эдйән Публий атлы бир адамың меллеги барды. Ол бизи гүлер йүз билен гаршылап, үч гүнләп мыхман алды. 8 Публийиң какасының гызгыны галып, яраман дүшекде ятырды, ол ганлы ичгечмеден эҗир чекйәрди. Павлус онуң янына барып, дога этди ве элини үстүнде гойды-да, оны сагалтды. 9 Шу вакадан соң сыркав адамлар Павлусың янына гелип башладылар, ол хем олары сагалдярды. 10 Олар бизи хорматлап, көп совгатлары бердилер. Шейле-де ёла дүшенимизде, әхли герекли затлар билен үпҗүн этдилер.
11 Үч айдан соң, биз Александриядан угран ве гышы адада гечирен бир гәмә мүндүк. Ол гәмиде «Зевсиң огулларының*» шекили барды. 12 Сиракуза гәми дуралгасына баранымызда, ол ерде үч гүн галдык. 13 Соңра ол ерден гайдып, Регия гелдик. Бир гүн геченде, гүнортадан мылайым шемал өвүсди ве ики гүнден биз Путеола бардык. 14 Бу ерде биз доганлары тапдык. Олар бизден янларында еди гүн галмагы хайыш этдилер. Шейдип, биз Риме голайлапдык. 15 Римдәки доганлар муны эшиденлеринде, бизи гаршыламак үчин Аппиус базарына ве «Үч мыхманхана» дийлен ере гелдилер. Павлус олары гөрүп рухланды ве Худая шүкүр этди. 16 Биз Риме геленимизде, Павлуса эсгериң гөзегчилиги астында өз кирейне алан җайында галмага ругсат этдилер.
17 Үч гүн геченде, Павлус ехудыларың абрайлы адамларыны янына чагырды. Олар йыгнанышанда, Павлус шейле дийди: «Адамлар, доганлар, мен халкымыза я-да ата-бабаларымызың дәп-дессурларына гаршы хич зат этмесем-де, Иерусалимде мени туссаг эдип, римлилериң элине табшырдылар. 18 Олар мениң ишиме середенлеринде, өлүме мынасып иш этмәндигими билип, бошатҗак болдулар. 19 Эмма ехудылар муңа гаршы чыканларында, мен Сезара арз этмәге меҗбур болдум. Йөне муны халкымы гүнәкәрлемек ниети билен этмедим. 20 Ине, шонуң үчин мен сизиң билен гөршүп, геплешмеги хайыш этдим. Чүнки мен Ысрайылың умыт эдйән зады үчин шу зынҗырлар билен багландым». 21 Олар шейле дийдилер: «Биз сен хакда Яхудадан хат алмадык, ол ерден гелен доганларың хич бири-де сен хакда эрбет затлары не хабар бердилер, не-де айтдылар. 22 Эмма биз муны сениң өз агзыңдан эшитсек говы болар, себәби хемме ерде бу дини топара* гаршы айдылян гүррүңлери эшидйәрис».
23 Шонда олар Павлус билен ене-де гөрүшмек үчин бир гүн беллешип, онуң кирейне алан җайына хас көп болуп гелдилер. Павлус болуп гечен затлары дүшүндирип, ирденден агшама ченли Худайың Патышалыгы барада биркемсиз шаятлык этди ве Мусаның канунына хем-де пыгамберлериң айданларына салгыланып, Иса хакда ынандырыҗы делиллери гетирйәрди. 24 Онуң айданларына кәбирлери ынанса, кәбирлери ынанмадылар. 25 Олар бири-бири билен ылалашмансоңлар, даргашып башладылар. Шонда Павлус шейле дийди:
«Мукаддес рухуң Ишая пыгамбер аркалы ата-бабаларыңыза айдан шу сөзлери догры экен: 26 „Бар-да, бу халка шу сөзлери айт: „Сиз эшидерсиңиз, йөне дүшүнмерсиңиз; сиз середерсиңиз, йөне хич зат гөрмерсиңиз. 27 Бу халкың йүреги гатапдыр, гулагы агырлашыпдыр, гөзлери гапылыпдыр. Шол себәпли оларың гулаклары эшитмейәр, гөзлери гөрмейәр ве йүреклери билен дүшүнмейәр. Мен олары сагалдар ялы, маңа доланмаярлар““. 28 Инди болса билип гоюң: Худай башга халклара-да гутулышы ыглан эдйәр. Олар оңа хөкман гулак асарлар». 29 *——
30 Шейдип, Павлус ики йыллап кирейне алан җайында яшады ве янына гелйән әхли адамлары мәхирли гаршылап, 31 олара Худайың Патышалыгы барада вагыз эдйәрди хем-де Халыпамыз Иса хакда батыргайлык* билен бөкденчсиз өвредйәрди.