Римлилер

8 Шонуң үчин Месих Иса билен бирликде боланлар өлүме хөкүм эдилмейәр. 2 Себәби Месих Иса аркалы яшайыш берйән рухуң* кануны сизи гүнәниң ве өлүмиң канунындан азат эдйәр. 3 Бедениң бикәмилдиги себәпли, Худай Кануның башармадык задыны этди, ягны ол өз Оглуны гүнәли адамың кешбинде ер йүзүне иберип, гүнәни ёк этди ве адамың бедениндәки гүнәниң үстүнден хөкүм чыкарды. 4 Ол муны бизиң тен хөвеслерине гөрә дәл-де, мукаддес руха гөрә яшап, Канундакы адалатлы табшырыклары берҗай эдип билмегимиз үчин этди. 5 Себәби тен хөвеслерине гөрә яшаянлар тене дегишли затлар барада пикир эдйәрлер. Эмма мукаддес рухуң гөркезмесине гөрә яшаянлар руха дегишли затлар барада пикирленйәрлер. 6 Тен хөвеслери барада пикирленмеклик өлүме элтйәр, рухы затлар барада пикирленмеклик яшайша ве парахатлыга элтйәр. 7 Тен хөвеслери барада пикир этмеклик Худая душман эдйәр, себәби тен Худайың канунына табын болмаяр, табын болуп хем билмейәр. 8 Шейлеликде, тен хөвеслерине гөрә яшаян адамлар Худайың гөвнүнден туруп билмейәрлер.

9 Худайың рухы сизде, хакыкатдан-да, бар болса, онда сиз тен хөвеслерине гөрә дәл-де, рухуң гөркезмесине гөрә яшаярсыңыз. Йөне кимде Месихиң гарайшы* ёк болса, ол адам Месихиңки дәлдир. 10 Месих сизиң билен бирликде болса, тен гүнә үчин өлүдир, йөне сизиң догры адам хасапланяндыгыңыз себәпли, мукаддес рух сизе яшайыш берйәндир. 11 Эгер Исаны өлүмден дирелден рух сизде бар болса, Худай ол рух аркалы өлйән бедениңизи-де дирелдер.

12 Шейлеликде, доганлар, биз тене гөрә яшамага ве онуң хөвеслерине эермәге борчлы дәлдирис. 13 Эгер сиз тен хөвеслерине гөрә яшасаңыз, өлерсиңиз; эмма мукаддес рухуң көмеги билен гүнәли ишлери өлдүрсеңиз, яшарсыңыз. 14 Аслында, Худайың рухуның гөркезмесине эерйәнлер онуң перзентлеридир. 15 Себәби сиз гулчулыга салян ве горкы дөредйән рухы дәл-де, огуллыга кабул эдйән рухы алансыңыз. Биз шол рух аркалы: «Авва*, Ата!» дийип чагырярыс. 16 Бизиң Худайың перзендидигимизе мукаддес рухуң өзи йүрегимизде шаятлык эдйәр. 17 Эгер Худайың перзентлери болсак, онда мирасчылардырыс. Хава, Худайың мирасчыларыдырыс. Эгер Месих билен биле эҗир чекйән болсак, онуң билен мирасдаш болуп, онуң билен-де шөхратланарыс.

18 Хәзирки гөрйән гөргүлеримизи гелеҗекде биз аркалы аян болҗак шөхрат билен деңешдирениңде, олар хич зат болуп галяр. 19 Ярадылан затлар* Худайың перзентлериниң аян болҗак вагтына сабырсызлык билен гарашяр. 20 Себәби ярадылан затлар өз ислеги билен дәл-де, Худай аркалы бош яшайшың гулчулыгына табшырылды, йөне олара хем умыт берилди. 21 Хава, ярадылан затлар чүйреме гулчулыгындан азат болуп, Худайың перзентлериниң шөхратлы азатлыгына говшарлар. 22 Себәби бүтин ярадылышың шу вагта ченли иңңилдәп, гөрги гөрйәндигини билйәрис. 23 Диңе бир ярадылыш дәл, эйсем, мукаддес рухуң илкинҗи мивеси болан биз хем иңңилдейәрис ве төлег* аркалы беденимизден азат болуп, огуллыга алынҗак вагтымыза сабырсызлык билен гарашярыс. 24 Биз шол умыт билен халас эдилдик; эмма умыт эдйән задыңы гөрсең, оңа умыт дийип болмаз. Эйсем, адам гөрүп дуран задына умыт эдерми? 25 Йөне биз гөрмейән задымыза умыт этсек, чыдамлы болуп, оңа сабырсызлык билен гарашарыс.

26 Шонуң ялы-да мукаддес рух эҗизләнимизде-де бизе көмек эдйәр. Кәте биз нәме хакда дога этмелидигимизи билмейәрис. Шейле ягдайларда биз иңңилдәп, хич бир сөз айдып билмесек-де, мукаддес рух бизиң үчин Худая ялбаряр. 27 Йүреклери барлаян Худай хем мукаддес рухуң нәме диййәндигине дүшүнйәр, себәби рух мукаддеслер үчин Худайың ислегине гөрә ялбаряр.

28 Билшимиз ялы, Худай әхли ишлерини Өзүни сөййәнлере ве ислегине гөрә чагыранларына пейда гетирмек үчин этди. 29 Себәби Худай Оглуның көп доганларының арасында новбахар болмагы үчин илкибашдан гөз өңүнде тутан адамларының Оглуның кешбинде болмагыны иследи. 30 Шейле-де Худай гөз өңүнде тутан шол адамларыны чагырды; чагыранларыны хем догры адам хасаплады. Шейдип, олары шөхратландырды.

31 Онда айдылан затлар барада нәме дийсе болар? Худай бизиң тарапымызда болса, ким бизе гаршы чыкар? 32 Худай хатда өз Оглуны-да гайгырман, бизиң үчин өлүме табшыран болса, онда ол бизе Оглы билен бирликде галан әхли затлары-да хөвес билен бермезми? 33 Худайың сайланларыны ким айыплап билер? Олары Худайың өзи догры адам хасаплаяр ахырын. 34 Олара гаршы ким хөкүм чыкарар? Өлүмден дирелен Месих Иса Худайың сагында отурып, бизиң үчин ялбаряр ахырын.

35 Бизи Месихиң сөйгүсинден нәме айрып билер? Бетбагтчылыкмы, кынчылыкмы, ызарламамы, ачлыкмы, эгин-эшигиң ёклугымы, ховп-хатармы я-да гылычмы? 36 Язгыларда айдылышы ялы: «Сениң гуллукчың боландыгымыз үчин, бизи узаклы гүн өлдүрйәрлер; бизи өлдүрилмәге алнып барылян гоюн хасаплаярлар». 37 Эмма биз өзүмизи сөййән Месих аркалы бу ягдайларың әхлисини долы еңйәрис. 38 Себәби не өлүм, не яшайыш, не перишделер, не хәкимиетлер, не хәзирки затлар, не гелеҗекки затлар, не гүйчлер, 39 не бейиклик, не чуңлук, не-де ярадылан башга затлар бизи Халыпамыз Месих Иса аркалы Худайың сөйгүсинден айрып билер. Хава, мен оларың айрып билмеҗекдигине берк ынанярын.