Титус
1 Мен Худайың гуллукчысы ве Иса Месихиң ресулы Павлус. Иманым ве ресул хөкмүнде эдйән ишлерим Худайың сайланларының иманына, хакыкатың догры билимине, Худая болан вепалылыга лайык гелйәр. 2 Бу затлар эбеди яшайыш умыдына эсасланяр. Ялан сөзлемейән* Худай муны гадым дөвүрлерде вада берипди. 3 Эмма бу Халасгәр Худайың табшырыгына гөрә маңа өз вагтында ынанылан вагыз аркалы аян эдилди. 4 Мен шу хаты акйүрекли оглум ве имандашым Титуса язярын.
Гой, Ата Худайымыз ве Халасгәримиз Месих Иса саңа мерхемет хем парахатлык берсин.
5 Мен сени кемчиликлери дүзедип, табшырышым ялы, хер шәхерде яшулулары беллемегиң үчин Критде гоюп гайтдым. 6 Йыгнак яшулусы адамлар тарапындан айыпланмаян, бир аялың әри болмалы. Онуң азгын* ве гулак асмаян дәл-де, иманлы чагалары болмалы. 7 Себәби гөзегчи Худайың гуллукчысы хөкмүнде адамлар тарапындан айыпланян, өздиенли, гахарҗаң, аракхор, залым* ве харам газанҗың ышкына дүшен ачгөз болмалы дәл. 8 Йөне ол мыхмансөер, ягшы ишлери халаян, сагдын дүшүнҗели*, догручыл, вепалы, өзүне эрк эдйән, 9 Худайың ынамдар сөзүне* берк япышян болмалы, шонда ол өвреденде, сагдын* таглыматың эсасында маслахат берип*, гаршы чыкянлара болса кәйәп билер.
10 Себәби питнечи, бош сөзлери айдян, яланчы, эсасан-да, сүннетленмеклиге берк эерйән адамлар көпдүр. 11 Шейле адамлары дымдырмак герек, олар өз таглыматлары аркалы харам газанч үчин бүтин машгаланы иманындан дәндирйәрлер. 12 Оларың бир пыгамбери*: «Критлилер элмыдама ялан сөзлейән адамлардыр, йыртыҗы хайванлар ве ялта иерменлердир*» дийипди.
13 Бу шаятлык хакдыр. Шонуң үчинем иманда берк дурар ялы, мундан бейләк-де олара берк кәйинч берип дур. 14 Шейле-де олар ехудыларың эртекилерине ве хакыкатдан йүз өвүртҗек адамларың табшырыкларына үнс бермесинлер. 15 Пәк адамлар үчин әхли зат пәкдир. Йөне хапа ве имансыз адамлар үчин арасса зат ёкдур, чүнки оларың пикири-де, ынсабы-да хападыр. 16 Олар Худайы танаяндыкларыны илиң өңүнде айдярлар, эмма эдйән ишлери билен Худайдан йүз өвүрйәрлер. Себәби олар йигренҗи ве гулак асмаян адамлардыр, хич хили ягшы ишлери этмәге яраян дәлдирлер.