Галатялылар
2 Мен 14 йыл геченден соң, Барнабас билен ене-де Иерусалиме гитдим. Биз янымыз билен Титусы хем алдык. 2 Маңа ол ере доланмалыдыгым барада гөрнүш аркалы айдылыпды. Ол ерде мен йыгнага гөзегчилик эдйән доганлар билен айратын гөршүп, олара башга халклара вагыз эдйән хош хабарымы гүррүң бердим. Шейдип, мен өңем, хәзирем бидерек ере ылгамандыгыма гөз етирҗек болдум. 3 Янымда гелен Титус грек болса-да, хич ким ондан сүннетленмеги талап этмеди. 4 Эмма йыгнага огрынча гирен ялан доганлар гелип, кынчылык дөретдилер. Олар Месих Исаның шәгиртлери хөкмүнде берлен азатлыкдан бизи махрум эдип, ене-де Кануның гулы этмек ислейәрдилер. 5 Йөне биз сизиң хош хабар аркалы алан хакыкат билимиңизи йитирмезлигиңиз үчин олара сәхел вагтлык хем эглишик этмедик, табынам болмадык.
6 Эмма бу доганлар хорматланян ялы болуп гөрүнселер-де, маңа хич хили тәзе зат айтмадылар. Олар нәхили сыланян болсалар-да, мениң үчин тапавуды ёкды, себәби Худай адамың даш кешбине серетмейәр. 7 Эмма Петрусың сүннетли адамлара хош хабары вагыз этмәге белленилиши ялы, олар мениң хем сүннетленмедик адамлара вагыз этмәге белленендигиме гөз етирдилер. 8 Себәби Петруса сүннетли адамлара, маңа болса башга халклара ресуллык этмәге ыгтыяр берилди. 9 Доганлар Худайың маңа мерхемет эдендигине гөз етиренлеринде, йыгнагың диреглери хасапланян Якуп, Кифа* ве Яхя маңа хем-де Барнабаса саг эллерини узадып, бизиң билен хызматдашлык этмәге разыдыгыны гөркездилер. Шейдип, биз башга халклара, олар болса сүннетли адамларың арасына гитдилер. 10 Олар мәтәчлик чекйән доганлары хем унутмазлыгы хайыш этдилер. Менем муны ыхлас билен этмәге чалышярын.
11 Эмма Кифа* Антиохия геленде, мен оңа гаршы чыкып, гөз-гөртеле эдйән ялңышыны йүзүне айтдым. 12 Себәби Якубың иберен адамлары гелмезден өң, ол өзге миллетлилер билен ийип-ичйәрди. Йөне олар геленден соң, сүннетленмегиң тарапыны тутянлардан горкуп, муны этмегини гойды ве өзүни олардан четде тутуп башлады. 13 Башга ехудылар хем онуң икийүзлүлигине гошулдылар. Хатда Барнабасам оларың тәсирине дүшүп, икийүзлүлик этди. 14 Мен оларың хош хабарың хакыкатына гаршы гидйәндигини гөрүп, хеммелериң өңүнде Кифа*: «Сен ехуды болуп, ехудылар ялы дәл-де, өзге миллетлилер ялы яшаян болсаң, онда нәме үчин өзге миллетлилери ехудыларың дәп-дессурлары боюнча яшамага меҗбур эдйәрсиң?» дийдим.
15 Биз ехуды болуп догулдык ве өзге миллетлер ялы гүнәли дәлдирис. 16 Адам кануның талапларыны берҗай этмек билен дәл-де, диңе Месих Иса иман эдип догры хасапланяндыр. Биз Месих Иса иман эдйәрис, шонуң үчин хем кануны берҗай эдип дәл-де, Месихе иман эдип, догры адам хасапланып билйәрис. Себәби хич бир адам* кануның талапларыны берҗай эдип, догры хасапланып билмез. 17 Эгер биз Месих аркалы догры хасапланмак үчин гүнәкәр сайылян болсак, онда Месих бизи гүнә итерйәрми? Элбетде, ёк! 18 Эгер мен өң йыкан задымы гайтадан дикелдйән болсам, диймек, мен кануны бозярын. 19 Себәби мен Худай үчин яшар ялы, кануны берҗай эдип, канун үчин өлендирин. 20 Мен Месих билен биле пүрсе чүйлендим. Инди мен өзүм үчин дәл-де, Месих билен бирликде яшаярын. Догрудан-да, мен яшасам-да, Худайың Оглуна иман эдип яшаярын. Ол мени сөйди ве мениң үчин җаныны гурбан этди. 21 Мен Худайың мерхеметинден йүз өвүрмейәрин. Себәби адам кануны берҗай эдип догры хасапланян болса, онда Месихиң өлмеги бидерекдир.