Филипилилер

4 Доганларым, мен сизи сөййәрин ве җуда гөресим гелйәр. Шатлыгым ве башымың тәҗи болан эзиз доганларым, Худайың* ёлунда берк дуруң.

2 Эводияны ве Синтихияны Худая* гуллук этмекде бир пикирде болмакларыны үндейәрин. 3 Хава, хакыкы ишчилер хөкмүнде сизден хем шуны хайыш эдйәрин: хош хабары вагыз этмекде мениң билен биле эгинме-эгин гөрешен шу ики уямызы голдап дуруң. Олар Клемент ве яшайыш китабында атлары язылан башга-да ишдешлерим билен билеликде зәхмет чекендир.

4 Худая* хемише шатлык билен гуллук эдиң. Хава, ене-де айдярын, шатланың! 5 Гой, сизиң пайхаслылыгыңыз* хеммелере гөрүнсин. Худай янымыздадыр. 6 Хич задың аладасыны этмәң, гайтам, хер ягдайда Худайдан көмек сорап, миннетдарлык билен дога эдиң ве ялбарың. 7 Шонда ынсан дүшүнҗесинден ёкары болан Худайың парахатлыгы сизиң йүреклериңизи ве пикирлериңизи Месих Иса аркалы горар.

8 Шейлеликде, доганлар, диңе хакыкы, ваҗып, догры, пәк, сөйгә хөвеслендирйән, ягшы*, өвгә ве шөхрата мынасып затлар хакда ойланың. 9 Менден өвренен, кабул эден, эшиден ве гөрен затларыңызы эдиң, шонда Худайың парахатлыгы сизиң билен болар.

10 Худайың* гуллукчысы хөкмүнде мениң аладамы ене-де эдип башландыгыңыза җуда бегенйәрин. Сиз хемише-де мениң аладамы эдйәрдиңиз, йөне муны иш йүзүнде гөркезмәге мүмкинчилигиңиз болмаярды. 11 Мен муны мәтәчлик чекйәндигим үчин айтмаярын, себәби мен әхли ягдайларда барыма кайыл болмагы өврендим. 12 Догрудан-да, мен мәтәчлик чекмегиң ве болчулыкда яшамагың нәмедигини билйәрин. Әхли затда ве әхли ягдайда доклугың хем ачлыгың, болчулыкда хем мәтәчликде яшамагың сырыны өврендим. 13 Маңа гүйч берйән Худай* аркалы әхли зады этмәге гүйҗүм етйәндир.

14 Муңа гарамаздан, сиз маңа кынчылыкларымда көмек эдип, ягшы иш этдиңиз. 15 Аслында, сиз, филипилилер, мен Македониядан гайданымда, сизден башга хич бир йыгнак маңа көмек этмеди ве көмегими-де кабул этмеди. Сиз муны хош хабары эшиден гүнүңизден бәри эдип гелйәрсиңиз. 16 Селаникдекәм, сиз маңа ики гезек көмек ёлладыңыз. 17 Элбетде, мен сизден совгат алҗак болмаярын, гайтам, хас көп пейда гетирйән миве алмагыңызы ислейәрин. 18 Эмма мениң хемме задым етерлик, хатда артыгы биленем бар. Хава, хемме задым үпҗүн, хәзир болса сизиң Эпафродит аркалы иберен затларыңызы алдым. Олар якымлы ыслы ве Худая яраян гурбан киминдир. 19 Худай хем өз гезегинде, Месих Иса аркалы шөхратлы байлыгы билен сизиң әхли зерурлыкларыңызы долы канагатландырар. 20 Ата Худайымыза бакы ве эбеди шөхрат болсун. Омын.

21 Месих Исаның шәгиртлери болан әхли мукаддеслере мениң адымдан салам айдың. Янымдакы доганлар хем сизе салам айдярлар. 22 Мукаддеслериң әхлиси, эсасан-да, Сезарың* өй-ичерисиндәкилер сизе салам айдярлар.

23 Догры гарайшыңыз үчин Халыпамыз Иса Месих сизе мерхемет этсин.