Якуп
4 Араңызда нәме үчин уруш ве дава-җенҗел боляр? Эйсем, ичиңиздәки* тен хөвеслери зерарлы дәлми? 2 Сиз ислейәрсиңиз, йөне алып билмейәрсиңиз. Сиз йигренйәрсиңиз ве гөриплик эдйәрсиңиз, йөне максадыңыза етмейәрсиңиз. Сиз сөгүшип, бир-бириңиз билен урушярсыңыз. Худайдан дилесеңиз-де, дилән задыңызы алып билмейәрсиңиз. 3 Хава, дилесеңиз-де, алып билмейәрсиңиз, себәби тен хөвеслериңизи канагатландырҗак болуп, яман ниет билен дилейәрсиңиз.
4 Эй бивепалар*, сиз дүнйә билен дост болмагың Худая душман эдйәндигини билмейәрмисиңиз? Дүнйәниң досты болмак ислейән адам Худайың душманы боляндыр. 5 Эйсем, Язгылардакы: «Ичимизде месген тутан гөриплик* элмыдама бир затлар ислейәр» диен сөзлер йөне ере языландыр өйдйәрмисиңиз? 6 Эмма Худайың мерхемети хас улудыр. Себәби: «Худай текепбирлере гаршы чыкяр, песгөвүнли адамлара болса мерхемет эдйәр» дийип язылгыдыр.
7 Шейлеликде, Худая боюн болуң; Иблисе гаршы дуруң, шонда ол сизден гачар. 8 Худая якынлашың, ол хем сизе якынлашар. Эй гүнәкәрлер, эллериңизи арассалаң, эй икигөвүнлилер, йүреклериңизи тәмизләң. 9 Гынанып, хасрат чекиң, аглаң*. Гой, сизиң гүлкиңиз хасрата, шатлыгыңыз гам-гусса өврүлсин. 10 Ехованың* өңүнде песгөвүнли болуң, ол хем сизи бейгелдер.
11 Доганлар, бири-бириңизи яманламагыңызы бес эдиң. Доганыны яманлаян я-да оны язгарян* адам кануна гаршы чыкяндыр ве кануны язгаряндыр. Эгер кануны язгарян болсаңыз, онда сиз кануны ерине етириҗи дәл-де, казысыңыз. 12 Эмма еке-тәк Канун чыкарыҗы ве Казы бардыр. Ол адамлары хем халас эдип билйәр, хем ёк эдип билйәр. Якыныңы язгарар* ялы, сен ким болупсың?
13 Сизиң кәбириңиз: «Шу гүн я эртир пылан шәхере гидип, ол ерде бир йыл боларыс ве ишләп, пул газанарыс» диййәрсиңиз. 14 Эмма сиз эртир нәме болҗагыны билмейәрсиңиз. Чүнки сиз аз вагтлык пейда болуп, соңра ёк болуп гидйән үмүрсиңиз. 15 Муңа дерек сиз: «Ехова* ёл берсе, җанымыз саг болса, оны я-да муны эдерис» диймелисиңиз. 16 Сиз болса текепбирлик билен өвнүп, хондан бәрси болярсыңыз. Шейле өвүнҗеңлик эрбетдир. 17 Шоңа гөрә-де ягшылык этмелидигини билип-де, оны этмейән адам гүнә эдйәндир.