Ресулларың ишлери
6 Шәгиртлериң саны гитдигиче артярды. Шол гүнлер грекче геплейән ехудылар еврейче геплейән ехудылардан нәгиле болуп башладылар. Себәби гүнделик иймит пайлананда, оларың дул аяллары гөзден салынярды. 2 Шонда 12 ресул әхли шәгиртлери янларына чагырып, шейле дийдилер: «Биз иймит пайламак үчин Худайың сөзүни өвретмеги бес этсек, догры* болмаз. 3 Шонуң үчин, доганлар, шу ише гөзегчилик эдер ялы, өз араңыздан мукаддес рух ве акылдарлыкдан долы еди саны гөрелдели адамы сайлаң. 4 Биз болса өзүмизи дога этмәге ве Худайың сөзүни өвретмәге багыш эдерис». 5 Шәгиртлер оларың гелен карары билен ылалашдылар. Шейлеликде, олар берк иманлы, мукаддес рухдан долы болан Стефанусы хем-де Филипусы, Прохорусы, Никаноры, Тимоны, Парминасы ве ехуды динине гечен* антиохиялы Николаусы сайладылар. 6 Соңра олары ресулларың янына гетирдилер. Ресуллар хем дога эденлеринден соң, оларың үстлерине эллерини гойдулар.
7 Нетиҗеде, Худайың сөзи гитдигиче яйраярды ве Иерусалимде шәгиртлериң саны барха артярды. Хатда энчеме руханылар хем иман этдилер.
8 Худайың мерхеметинден ве гүйҗүнден долы болан Стефанус адамларың арасында көп аламатлар хем гудратлар гөркезйәрди. 9 Эмма «Азат эдиленлер» синагогасының кәбир агзалары, киреналы ве александриялыларың кәбири хем-де Киликия билен Азиядан геленлер Стефанус билен җеделлешип башладылар. 10 Йөне Стефанусың акылдарлыгына, онуң мукаддес рухуң гүйҗи билен айдян сөзлерине гаршы чыкып билмедилер. 11 Шонда олар бирнәче адамы: «Биз онуң Муса хем-де Худая дил етирендигини эшитдик» диен сөзлери айтмага ырдылар. 12 Олар Стефанусың гаршысына адамлары, халкың яшулуларыны ве канунчылары өҗүкдирдилер. Олар хем оны тутуп, Меҗлисе* гетирдилер. 13 Олар ялан шаятлары хем чагырдылар. Ялан шаятлар: «Бу адам шу мукаддес ере ве Мусаның канунына дил етирйәр. 14 Ол назаретли Исаның шу ери юмурҗакдыгыны ве Мусаның табшыран дәп-дессурларыны үйтгетҗекдигини айтды. Биз муны өз гулагымыз билен эшитдик» дийдилер.
15 Меҗлисде отуранларың әхлиси Стефануса середенлеринде, онуң йүзүниң перишдәниң йүзи ялыдыгыны гөрдүлер.