Еврейлер

5 Хер бир баш руханы Канун тарапындан белленилип, адамларың Худая сежде этмек билен баглы ишлеринде көмек эдйәндир. Ол адамларың совгатларыны ве гүнәлери үчин берйән гурбанларыны Худая хөдүрлейәндир. 2 Ол дүшүнҗесиз ве ялңышян адамлара дуйгудашлык билдирсе-де, онуң өзи хем гүнәниң голы астындадыр. 3 Шол себәпли ол адамларың гүнәлери үчин гурбан гетириши ялы, өзи үчин хем гурбан гетирмелидир.

4 Галыберсе-де, хич ким өзүни бу хорматлы гуллуга беллейән дәлдир. Муны диңе Харуны беллән Худай эдип билйәндир. 5 Шонуң ялы Месих хем өз-өзүни баш руханы эдип, шөхратландыран дәлдир. Оңа: «Сен мениң оглумсың; шу гүн мен сениң атаң болдум» диен сөзлери айдан Худай шөхратландырандыр. 6 Язгыларың башга еринде болса Худай оңа: «Сен Мелкиседек ялы эбеди руханысың» диййәр.

7 Месих ер йүзүнде ынсан болуп* яшан дөври, өлүмден халас этмеги башарян Худая ахы-нала ве гөзяшлар билен ялбарып, йүрекден хайыш эдипди. Худайдан горкяндыгы үчин, ол догаларына җогап алды. 8 Ол Худайың оглы болса-да, гөрги гөрүп гулак асмагы өвренди. 9 Месих бу бабатда кәмиллик дереҗесине етенде, Худай оны гулак асян адамларың әхлисине эбеди гутулышы бермәге җогапкәр эдип гойды. 10 Шейдип, Худай оны Мелкиседек ялы баш руханы эдип белледи.

11 Бизиң Месих хакда гүррүң бермәге задымыз көп, йөне гулакларыңызың гапыландыгы себәпли, олары сизе дүшүндирмек кын. 12 Шу вагта ченли* сиз эййәм мугаллым болмалыдыңыз, йөне Худайың мукаддес хабарының эсасы таглыматларыны башдан-аяк өвретмәге сизиң өзүңизе бир мугаллым герек. Сиз агыр нахара дәл-де, сүйде мәтәчсиңиз. 13 Сүйт ичйән адам Худайың догрулык сөзүни билйән дәлдир, себәби ол хениз чагадыр. 14 Эмма агыр нахар рухы тайдан етишен адамлар үчиндир. Олар аң-дүшүнҗесини ягшы ве яманы сайгармагы өвренишдирендирлер.