2 Яхя
1 Мен яшулы*, сайланан аяла* ве онуң чагаларына хат язярын. Сизи мен хем, хакыкаты кабул эденлериң әхлиси хем йүрекден сөййәр. 2 Себәби биз хакыкат боюнча яшаярыс, хемише-де яшарыс. 3 Шонда Ата Худайың ве онуң Оглы Иса Месихиң мерхемети, рехимдарлыгы, парахатлыгы, хакыкаты ве сөйгүси бизиң билен болар.
4 Мен сениң кәбир чагаларыңың хакыкатда гезйәндигини эшидип, өрән бегенйәрин, себәби Ата бизе шейле табшырык берди. 5 Шонуң үчин бири-бириңизи сөймеги сизден хайыш эдйәрин. Бу тәзе дәл-де, озал-башдан берлен табшырыкдыр. 6 Сөйги — Худайың табшырыкларыны берҗай этмекдир. Сиз бу табшырыгы илкибашдан эшидипдиңиз, шоңа гөрә-де яшамалысыңыз. 7 Себәби дүнйәде Иса Месихиң беденде гелендигини инкәр эдйән алдавчылар көпелди. Олар алдавчы хем-де Месихиң душманыдыр.
8 Хакыкат ёлунда газананларыңызы йитирмекден хабардар болуң. Шонда сиз Худайың берҗек әхли сылагларыны аларсыңыз. 9 Месихиң таглыматындан совлан хер бир адам Худайы кабул эдйән дәлдир. Эмма шу таглымата эерйән адам Атаны-да, Оглы-да кабул эдйәндир. 10 Эгер бири яныңыза гелип, бу таглымата гөрә өвретмесе, оны өйүңизе салмаң, салам хем бермәң. 11 Себәби оңа салам берйән адам онуң эрбет ишлерине шәрик боляндыр.
12 Мен сизе көп затлары айтмак ислейәрин, йөне муны хат үсти билен язасым гелмейәр. Сизиң шатлыгыңыз хас-да артар ялы, мен яныңыза барып геплешмеги умыт эдйәрин.
13 Сайланан уям, аял доганыңың чагалары саңа салам айдяр.