Якуп
1 Худайың ве Халыпамыз Иса Месихиң гулы Якупдан ер йүзүне яйран 12 тайпа салам болсун!
2 Доганларым, дүрли кынчылыклара учраныңызда, оларың барыны шатлык билен кабул эдиң. 3 Себәби иманыңыз сыналанда, чыдамлы болмагы өвренйәрсиңиз. 4 Сиз чыдамлы болмак билен, өзүңизи долы тербиеләрсиңиз. Шонда әхли затда кәмил, айыпсыз боларсыңыз ве хич затда етмезиңиз болмаз.
5 Эгер бириңизе акылдарлык етмейән болса, гой, ол Худайдан дилесин, оңа берлер. Себәби Худай игенмән*, хеммелере җомартлык билен берйәндир. 6 Эмма ол иман билен дилесин, асла шүбхеленмесин. Себәби шүбхеленйән адам ел билен чайканып, дүрли тарапа ковулян деңиз толкуны киминдир. 7 Аслында, шейле адам Еховадан* бир зат аларын өйтмесин. 8 Ол әхли ёлларында дурнуксыз, икирҗиңленйән адамдыр.
9 Гой, гарып* доган Худайың өңүнде бейгелендигине бегенсин*. 10 Бай адам хем өзүниң песелендигине бегенсин, ёгсам ол мейдан гүли кимин солуп гидер. 11 Гүн чыкып, җөвзасы билен оты гурадяр, онуң гүли дөкүлип, оваданлыгы гачяр. Шонуң ялы бай адам хем хысырдылары билен гечип гидер.
12 Сынага чыдаян адам багтлыдыр, себәби ол Ехованы* разы эдип, Оны сөййәнлере вада берлен яшайыш тәҗини алар. 13 Сынага дүшенде, хич ким: «Худай мени сынаяр» диймесин. Себәби Худайы эрбетлик билен сынап болмаяр, онуң өзи-де хич кими сынамаяр. 14 Эмма хер ким өз хөвесине гызыгып, алданан махалы сыналяр. 15 Соңра хөвес гүйҗәп*, адамы гүнә итерйәр, гүнә болса өлүме элтйәр.
16 Эзиз доганларым, алданмаң. 17 Хер бир говы ве кәмил совгат ёкардан, асмандакы нурлар Атасындан инйәндир. Худай көлеге ялы үйтгәп дурян дәлдир. 18 Ол ярадан затларының илкинҗи мивеси болмагымыз үчин бизи өз ислеги билен хакыкат сөзи аркалы яшайша гечирди.
19 Эзиз доганларым, мен сизиң шуны билмегиңизи ислейәрин: хер бир адам диңлемәге тайын, геплемәге ховлукмаян, чалт гахарланмаян болмалы. 20 Себәби гахар Худайың догрулыгына гаршы гелйәндир. 21 Шонуң үчин хер хили хапалыкдан, ислендик эрбет ёлдан* дашда дуруң ве Худай халас* эдиҗи сөзүни сизде өсдүрер ялы, оны песгөвүнлилик билен кабул эдиң.
22 Худайың сөзүни диңе бир диңлемән, эйсем, оны ерине етириң. Өзүңизи ялан пикирлер билен алдамаң. 23 Кимдир бири Худайың сөзүни диңләп-де, оны ерине етирмесе, ол өз йүз кешбини айнада сынлаян адам ялыдыр. 24 Ол өзүни сынлап, соңра гидйәр-де, нәхилидигини шол бада унудяр. 25 Эмма азат эдйән кәмил кануна ичгин середип, шоңа гөрә яшаян адам сөзи унудян диңлейҗи дәл-де, оны ерине етириҗидир. Ол өз эдйән ишлеринден хошал болар.
26 Кимдир бири Худая сежде эдйәндирин өйдүп, дилини сакламаса*, ол өз-өзүни* алдаяндыр, эдйән сеждеси-де бидерекдир. 27 Ата Худайымызың өңүнде тәмиз, чирксиз сежде этмек үчин кынчылык чекйән етимлериң, дул аялларың аладасыны этмели хем-де өзүңи бу дүнйәден тегмилтсиз сакламалы.